TE Santiago sok te Judas te jaʼ yijtsʼinab te Jesús, yan stukel te Pedro sok te Juan jaʼ jpuk kʼopetik yuʼun. Ta swenta xchʼul espíritu te Dios, ta xchanebal te winiketik ini la stsʼibayik jukeb cartaetik yuʼun te Achʼ Testamento, te jaʼnix yichʼojbey sbiilik te machʼa la stsʼibaye. Te bin yuʼun la yichʼ stsʼibayel te cartaetik ini jaʼ ta swenta skoltayel te jchʼuunjeletik yuʼun Cristo te junuk yoʼtan ya yakʼ sbaik ta stojol te Jehová sok te Ajwalinel yuʼune.

Te bitʼil ya yichʼ akʼel ta ilel te chʼuunel oʼtanil. Ma tikʼuknax-a teme ay machʼa ya yal te ay xchʼuunel yoʼtane, ya skʼan akʼel ta ilel sok yaʼtelul. Jich bitʼil ya yal te Santiago, «lajem te chʼuunel oʼtanil teme mayuk yaʼtelule» (Santiago 2:26). Te machʼa ay xchʼuunel yoʼtan te kʼalal ay swokole, jichme ya xkujchxan yuʼun. Te jchʼuunjel yuʼun Cristo te ya skʼan lek ya xkʼot ta lokʼel ya skʼan te yakuk skʼanbey spʼijil te Dios sok te ayuk smukʼul yoʼtan te ya x-akʼbot yuʼune. Te Jehová lek ya yil te machʼa ya xkujch yuʼun te wokolile. (Santiago 1:2-6, 12). Te Dios spisil ora ya skoltay te machʼa ya yakʼ ta ilel te jun yoʼtan ya yakʼ sba ta stojole. Jaʼ yuʼun jich la yal te Santiago: «Nopajanik ta stojol Dios, jich ya xnopoj ta atojolik» (Santiago 4:8).

Te jchʼuunjeletik yuʼun Cristo ya skʼan te yakuk stulantes xchʼuunel yoʼtanik yuʼun jich ya xjuʼ yuʼunik stsalel te sujel ta mulil sok te bintik chopol ya yichʼ pasele. Te kʼalal kuxin te Judas ay bayal bintik chopol yak ta yichʼel pasel-a, jaʼ yuʼun jich la yalbey te jnopojeletike «yame xkʼopojex yuʼun te xchʼuunel awoʼtanik» (Judas 3, XCD).

Ya skʼan te lekuk te jtaleltike. Te Jehová ya skʼan te lekuk stalelik te j-abatetik yuʼun ta spisil te bintik ya spasike. Te Pedro la stsʼibay: «Chʼultesbilukex ta spisil bintik yak apasik, como jich tsʼibabil jilel: ‹Chʼultesbilukex, como joʼon [Jehová] chʼul Dioson›» (1 Pedro 1:15, 16). Jaʼ yuʼun ya skʼan kʼayinbeyel stalel te Cristo, melel «kʼax swokol te Cristo ta akuentaik» jich la yal te Pedro, sok la yalxan «jich la yakʼbeyex jilel anopik yuʼun jich yak atʼunik bael» (1 Pedro 2:21). Manchukme ya yichʼ tael wokolil yuʼun ta xchʼuunbeyel smantal te Diose, jaʼukmeto te bin tulan skʼoplale jaʼ te «lekuk te bin ya yalbat te awoʼtane» (1 Pedro 3:16, 17). Te Pedro la xchaʼyalxan te bayal skʼoplal te lekuk stalelik sok te yakuk yakʼik ta ilel sok yaʼtelul te bitʼil yichʼojik ta mukʼ te Dios te bitʼil mato xtal te slajibal te bintik chopol sok te yachʼil balumilal te albil skʼoplal, te banti «ya xnain te bin toj te pasele» (2 Pedro 3:11-13).

Te bitʼil ya yichʼ akʼel ta ilel te kʼuxul oʼtanil. «Jkʼuxul oʼtanil stukel te Diose», xiʼ te Juan. Te Jehová la yakʼ ta ilel te kʼax kʼuxotik ta yoʼtan te kʼalal la stikun talel te Xnichʼan yuʼun la yakʼ ta lajel ta swenta «stojel te jmultike». ¿Bin ya skʼan stijbotik koʼtantik ta spasel yuʼun te kʼuxul oʼtanil ini? Te Juan jich ya yal: «Kermanotak te kʼuxex ta koʼtane, te bitʼil jich kʼux la yaʼiyotik ta yoʼtan stukel te Diose, jich yuʼun ya skʼan te talel kʼaxel kʼux ya kaʼiy jbatike» (1 Juan 4:8-11, XCD). Te bin uʼtil ya xjuʼ kakʼtik ta ilel te xkʼuxul koʼtantik ta stojol te kermanotaktik te pajal xchʼuunel koʼtantik soke jaʼ te kʼalal ya jkoltaytike (3 Juan 5-8).

¿Bin utʼil ya yakʼik ta ilel te jchʼuunjeletik te kʼux ta yoʼtanik te Jehovae? Te Juan ya yakʼbey sujtib: «Yuʼun chikan te kʼux ta koʼtantik te Dios teme ya jchʼuumbeytik te mandariletik yuʼune. Maba wokol ta chʼuunel te mandariletik yuʼune» (1 Juan 5:3; 2 Juan 6). Te machʼatik ya xchʼuunbeyik smantal te Dios ya snaʼik te spisil ora ya smulanbeyik te Xkʼuxul yoʼtan te Dios ta «kuxlejalil ta sbajtʼel kʼinal» (Judas 21).

(Lokʼem ta Santiago, 1 Pedro, 2 Pedro, 1 Juan, 2 Juan, 3 Juan sok Judas.)