1. ¿Bin-a te naʼbil sba yuʼunik ta lek te ants winiketik te ya kiltik baele?

BAYAL miyon ta tul ants winiketik, naʼbil sba yuʼunik te skʼoponel Dios te la yakʼ jilel ta nopel te Jesucristo kʼalal la yalbey te jnopojeletik yuʼun te bin-utʼil ya skʼoponik te Diose, jaʼ ini kʼax bayal skʼoplal. Akʼa kiltik te oxchajp bin nail la yichʼ kʼanele, jichme ya xkʼot lek ta awoʼtan te bin ya yakʼ ta nopel ta smelelil te Bibliae.

2. Albeya skʼoplal oxchajp te bin la yakʼbey snop Jesús te jnopojeletik yuʼun ta skʼanel te kʼalal ya yichʼ kʼoponel te Diose.

² Ta sjajchibal te skʼoponel Diose, te Jesús la yalbey te machʼatik tey ayik-ae: «Jtatic te ayat ta chʼulchan, acʼa ichʼotuc ta mucʼ achʼul bihil. Acʼa taluc te cuentahinel [Ajwalinel] awuʼun; acʼa yichʼ pasel ta bahlumilal te bin ya scʼan awoʼtan, hich te bin utʼil yac ta pasel ta chʼulchan» (Mateo 6:9-13). ¿Bin ya skʼan ya yal te bintik oxchajp la yichʼ kʼanele?

3. ¿Bintik-a te tulan skʼoplal te ya skʼan ya jnaʼbeytik swentail ta stojol te Ajwalinel yuʼun te Diose?

³ Lame jnoptikix ta lek ta swenta te sbiil te Diose te jaʼ Jehová. Sok ay kalojbeytikix skʼoplal te bin-a te skʼanojel yoʼtan te Diose, ta swenta te bin spasojix sok te bin yato spas ta stojol te ants winiketike. Jaʼukmeto ¿bin la skʼan la yal te Jesús ta swenta te «Acʼa taluc te cuentahinel awuʼun» te xchie? ¿Bin-a te Ajwalinel yuʼun te Diose? ¿Bin-utʼil ya xtal  yakʼ ta ichʼbeyel ta mukʼ o chʼultesbeyel sbiil te Diose? Soknix ¿bin-utʼil snitojbey sba skʼoplal te ya xtal te Ajwalinel yuʼun te Dios sok te bitʼil ya xpastaj te skʼanojel yoʼtan te Diose?

4. ¿Bin-a te Ajwalinel yuʼun te Diose sok machʼa-a te Ajwalil yuʼune?

⁴ Te Ajwalinel yuʼun te Diose jaʼnix schajpanoj te Jehová jaʼ te bin-utʼil ya xmantalteswan stukele sok jaʼnix stsaoj te Ajwalile. ¿Machʼa-a te Ajwalil–abi? Jaʼ te Jesucristoe, te machʼa ma spaj te ajwaliletik yuʼun te balumilale, jaʼ yuʼun ya xjuʼ ya kaltik te jaʼ te «Ajwalil yuʼun ajwaliletic soc Yajwal principaletic» (1 Timoteo 6:15). Te Jesús ay yuʼel ta spasel bayal bintik lek ma spaj te biluk ajwaliletik yuʼun te balumilal, manchukme ya spasik ta lek te yaʼtelike.

5. ¿Banti ay te Ajwalinel yuʼun te Diose sok bin-a te ya swentaine?

⁵ ¿Banti ay te Ajwalinel yuʼun te Diose? Nopa awaʼiy, ¿banti ay te Jesuse? Jich bitʼil te la jnoptikixe, laj te Jesuse, ta patil chaʼkuxaj, 40 kʼajkʼal ta patil mo bael ta chʼulchan (Hechos 2:33). Jich yuʼun te Ajwalinel yuʼun te Diose ay ta chʼulchan. Jaʼ yuʼun te Biblia ya yal te jaʼ «te cuentahinel yuʼun ta chʼulchan» (2 Timoteo 4:18). Manchukme ay ta chʼulchan yame swentain te Balumilale (kʼopona te sjun Apocalipsis 11:15).

6, 7. ¿Bin yuʼun jaʼ jtul Ajwalil te maʼyuk machʼa ya xpajot yuʼun te Jesuse?

⁶ Te Jesús jaʼ jtul Ajwalil te maʼyuk machʼa ya xpajot yuʼune, melel maʼyuk bin-ora ya xlaj stukel. Te Biblia ya yal te ma spaj te ajwaliletik yuʼun te balumilale, melel «ha nax stuquel ma xcham, te nahinem ta sacal qʼuinal te ma xhuʼ ochel tey a» (1 Timoteo 6:16). Jaʼ yuʼun spisil te bintik lek ya spase maba ya xlaj skʼoplal stukel. Bayalme bin ya xbajtʼ spas.

⁷ Ilawil te bin albil jilel skʼoplal ta Biblia ta swenta te Jesuse: «Te espíritu yuʼun Jehová ya xhul ta stojol: ha te espíritu yuʼun pʼijil-oʼtanil soc snaʼbeyel scuentahil, te espíritu yuʼun jʼacʼ-oʼtanil soc yuʼel, te espíritu yuʼun bin ay ta naʼel soc xiʼel  te Jehová; soc ha lec yoʼtan yuʼun te yichʼel ta mucʼ te Jehová. Ma haʼuc ya schahpan yuʼun te bin ya yil ta sit, ma haʼuc ya schahpan yuʼun te bin ya yaʼiy ta schiquin; ha toj ya schahpan te pobrehetic, stojil ya schahpan te machʼatic peqʼuel ayic ta bahlumilal» (Isaías 11:2-4). Te texto-abi ya yakʼ ta ilel te ya xmantalaj ta stojil sok skʼuxul yoʼtan te Jesús ta stojol te ants winiketike. ¿Yabal akʼan te ayuk jich ya swentainat jtul ajwalil-abi?

8. ¿Machʼatik ya xwentainwanik sok te Jesuse?

⁸ Kilbeytik yan skʼoplal te Ajwalinel yuʼun te Diose. Te Jesuse ma stukeluknax ya xwentainwan, melel ay sjoʼtak ta ajwalil. Te jpuk-kʼop Pablo jich la yalbey te Timoteo: «Teme ya xcʼax jwocoltic, ha nix hich pajal ya xʼochotic ta cuentahinwanej soc» (2 Timoteo 2:12). Yuʼun-nix jich-a, te Pablo, Timoteo sok yantikxan ants winiketik te jun yoʼtan ayik ta stojol te Diose sok te jaʼnix tsabilik yuʼune yame xwentainwanik sok te Jesús ta chʼulchan. ¿Jayeb ta tul ya staik te mukʼul aʼtelil ini?

9. ¿Jayeb ta tul ants winiketik ya xwentainwanik sok te Jesuse sok bin-ora jajchik tal ta tsael yuʼun te Diose?

⁹ Jich bitʼil te la yichʼix alel ta sjukebal kapitulo yuʼun te libro ini, te jpuk-kʼop Juan akʼbot yil yuʼun Dios te «teqʼuel ta wits Sión [te banti ay ta Ajwalil ta chʼulchan] te Jcolel Tuminchij [Jesucristo], joquimbil yuʼun waxaclajunpic (144,000) ta tuhl te tsʼihbalambil ta stiʼbahic te sbihil soc te sbihil te State». ¿Machʼatik-a te 144,000 ta tule? Jaʼnix ya scholbey skʼoplal te Juane: «Haʼic te ya stʼunic ta bayuc ya xbaht te Jcolel Tuminchij. Mambil scolelic ta yohlil ants-winiquetic scuenta sba sit ya xcʼoht ta stojol Dios soc ta stojol te Jcolel Tuminchij» (Apocalipsis 14:1, 4). Jich yuʼun, jaʼ jtsʼaklinwanejetik te jun yoʼtanik ta stojol te Jesucristo te ya yichʼik tsael yuʼun ya sjokin sbaik ta wentainwanej sok ta chʼulchan. Te kʼalal lajemikix-ae sok te kʼalal chaʼkuxajemikix ta chʼulchan-ae «ya me yaʼiyic cuentahinwanej ta bahlumilal»  sok te Jesuse (Apocalipsis 5:10). Kʼalalto ta skʼajkʼalel te jpuk-kʼopetike, te Dios jajch tal ta stsael j-abatetik te jun yoʼtanik ta stojol yuʼun jich ya stsʼakaj-a te yajtalul 144,000.

10. ¿Bin yuʼun te yakʼoj ta ilel skʼuxul yoʼtan te Jehová te bitʼil la snop te jaʼ lek te ya xpasawan ta mantal te Jesús sok te 144,000 ta stojol te ants winiketike?

¹⁰ Te Jehová yakʼoj ta ilel skʼuxul yoʼtan te kʼalal la snop te jaʼ lek te ya xmantalaj ta stojol ants winiketik te Jesús sok te 144,000 te tsabilik yuʼune. Ta sjajchibal, te Jesuse kuxin jich bitʼil winik ta Balumilal jaʼ yuʼun ya snaʼ te wokoliletik yuʼun te ants winiketike. Jaʼ ta swenta te jich la yal te jpuk-kʼop Pablo: «Ma yuʼunuc ma snaʼbotic yoʼbolil jbahtic yuʼun te mayuc quiptic, como hich nix la yaʼiy tsajel ta spisil hich te bin utʼil te hoʼotic, pero ma ba stahoj smul stuquel» (Hebreos 4:15; 5:8). Te machʼatik ya xmantalajik sok te Jesuse jaʼnix jich kʼaxem yuʼunik-euk te wokoliletike. Ta skaj te jmulawiletik-euke, jaʼnix jich spasojik tulan ta spasel te bintik leke sok kʼaxem yuʼunik te jayeb ta chajp chamel aye. Jich yuʼun yananix xkʼot ta yoʼtanik-a te wokoliletik ya xkʼax ta stojol te ants winiketike.

11. ¿Bin yuʼun la yalbey te jnopojeletik yuʼun Jesús te akʼa skʼanbeyik Dios te akʼa yichʼ pasel te skʼanojel yoʼtan ta chʼulchane?

¹¹ Te Jesuse jaʼnix jich la yalbey te jnopojeletik yuʼun te akʼa skʼanik te yakuk xkʼot ta pasel te skʼanojel yoʼtan te Jehová ta Balumilal, jich te bin-utʼil yak ta pasel ta chʼulchan. Ta chʼulchan te banti ay te Diose, te chʼul-abatetik te jun yoʼtan yakʼoj sbaik ta stojole spisil-ora spasojik te skʼanojel yoʼtan te Diose. Ta yoxebal kapitulo yuʼun te libro ini, la jnoptik ta swenta jtul chʼul-abat te la yijkʼitay spasel te skʼanojel yoʼtan te Diose sok la yakʼ chʼayuk ta mulil te Adán sok te Evae. Ta slajunebal kapitulo yatome jnoptikxan te bin ya yal te Biblia ta swenta te chʼul-abat-abi, te sbiilinej Satanás. Te Dios la yakʼ ayinuk ta chʼulchan te Satanás sok te chopol espirituetik  te tʼunot yuʼune, jaʼnax yuʼun te la yajtaybey te jayeb tiempo ya x-ayinik tey-ae. Jich yuʼun ma spisiluk te machʼatik ayik ta chʼulchan yakik ta spasbeyel-a te skʼanojel yoʼtan te Diose. Jaʼukmeto jelon te kʼalal jajch ta mantal te Jesús te banti ay te Ajwalinel yuʼun te Diose sok te kʼalal la yaʼiy tsalaw sok te Satanase (kʼopona te sjun Apocalipsis 12:7-9).

12. ¿Bin-a te cheb mukʼ skʼoplal kʼot ta pasel te ya yal ta Apocalipsis 12:10?

¹² Te bin albil jilel skʼoplal ta namey ya yakʼ ta ilel te bin kʼot ta pasele: «Patil la jcaʼiy ay machʼa tulan cʼopoj ta chʼulchan, hich la yal: Yorahilix te colel, te yuʼel soc te cuentahinel yuʼun te Dios cuʼuntic, soc te ya yichʼ yaʼtel te Cristo yuʼune. Como chʼojotix loqʼuel [te Satanás] te machʼa yac slehbebel smul te quermanotactic, te cʼahcʼal ahcʼabal yac ta slehbeyel smul ta stojol te Dios cuʼuntique» (Apocalipsis 12:10). ¿Labal awil te ay bin cheb mukʼ skʼoplal kʼot ta pasel te ya yal te textoe? Ta sbabial, jaʼ te bitʼil jajch ta pasaw ta mantal te Ajwalinel yuʼun te Dios ay ta skʼab te Jesucristoe. Ta schebal jaʼ te bitʼil la yichʼ chʼojel lokʼel ta chʼulchan te Satanás, jich chʼojot koel tal ta Balumilal.

13. ¿Bintik kʼot ta pasel yuʼun te la yichʼ chʼojel lokʼel ta chʼulchan te Satanase?

¹³ Te bin cheb skʼoplal la yichʼix alele kʼoemikix ta pasel jich bitʼil yato kiltik baele. ¿Bintik kʼot ta lokʼel yuʼun? Akʼa kiltik te bin kʼot ta pasel ta chʼulchane: «Ha yuʼun tseʼeluc me awoʼtan, haʼat chʼulchan, soc haʼex te nahinemex tey a» (Apocalipsis 12:12). Yuʼun-nix jich-a, te chʼul abatetik te jun yoʼtanik ta stojol te Diose tseʼelnax yoʼtanik ta swenta te bitʼil chʼojot lokʼel te Satanás sok te chopol espirituetik yuʼune, jich yuʼun spisil te chʼul-abatetik te jilik ta chʼulchan te jun yoʼtan yakʼoj sbaik ta stojol te Jehovae, ay lamalkʼinal yuʼunik sok jun-nax ayik. Jaʼ yuʼun tey ta chʼulchan yakix ta pasel te skʼanojel yoʼtan te Diose.

14. ¿Bin kʼoem ta pasel yuʼun te bitʼil chʼojbilix koel tal ta Balumilal te Satanase?

¹⁴ ¿Bin ya xjuʼ ya kaltik ta swenta te Balumilale? Te Biblia  jich ya yal: «¡Pero ay me swocolic te machʼatic nahinemic ta bahlumilal soc ta mar! Como te pucuje, soc bayel yilimba cohemix tal ta atojolic, yuʼun ya snaʼ te nopol ya xlaj ora yuʼun» (Apocalipsis 12:12). Te Satanás kʼax bayal slab yoʼtan yuʼun te bitʼil la yichʼ chʼojel lokʼel ta chʼulchan sok te bitʼil ya xlajix te ora yuʼune. Jich bitʼil te kʼax bayal ilineme baem yoʼtan ta yakʼel wokoliletik ta Balumilal. Ta yan kapitulo yame jnoptikxan bael ta swenta te wokoliletik-abi. Jaʼukmeto, ta swenta te bin la kiltikix tale ay bin ya skʼan ya jojkʼoybey jbatik yuʼun: ¿bin-utʼil ya xkʼot ta pasel te skʼanojel yoʼtan te Dios ta swenta te Ajwalinel yuʼune?

15. ¿Bin-a te skʼanojel yoʼtan te Dios ta swenta te Balumilale?

¹⁵ Julukme ta awoʼtan te bin-a te skʼanojel yoʼtan te Dios ta swenta te Balumilale. Jich bitʼil la anopix ta yoxebal kapitulo, te Jehová la yakʼ ta ilel ta tsʼumbil kʼinal te ya skʼan te ya xpastaj ta nichimal kʼinal te Balumilale sok te ya xnoj ta tojil ants winiketik te maʼyuk bin-ora ya xlajike. Kʼalal te Satanás la yakʼ chʼayuk ta mulil te Adán sok te Evae, jich maba kʼot ta pasel te skʼanojel yoʼtan te Dios ta yorail-abi, jaʼukmeto yatome xkʼot ta pasel. Te Jehová ya skʼan te ya xkʼot ta pasel ini: «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29). Jaʼme ya spas te Ajwalinel yuʼun te Diose. ¿Bin-utʼil ya spas?

16, 17. ¿Bin ya yalbotik te Daniel 2:44 ta swenta te Ajwalinel yuʼun te Diose?

¹⁶ Ta Daniel 2:44 jich albil jilel skʼoplal: «Te yorahil te ajwaliletic ini te Dios ta chʼulchan ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel». ¿Bin ya skʼan ya yalbotik te bin albil jilel skʼoplale?

¹⁷ Ta sbabial, ya yalbotik te kʼalal ya xjajch ta aʼtel-a te Ajwalil tsabil yuʼun te Diose jaʼme-a te kʼalal «te yorahil te ajwaliletic»  jaʼ ya skʼan ya yal te kʼalal ayikto ta aʼtel-a te yantik ajwaliletike. Ta schebal, ya yal te maʼyuk bin-ora ya xlaj skʼoplal te wentainel yuʼune. Maʼyuk yan ajwalil ya xlajinot yuʼun sok maʼyuk machʼa ya xjelolinot yuʼun. Ta yoxebal, ya yakʼ kiltik te ya x-ayin guerra yuʼun te Ajwalil tsabil yuʼun te Dios sok te ajwaliletik yuʼun te balumilale sok ya yal te jaʼ ya xjuʼ yuʼun tsalaw te Ajwalil ini. Ta slajibal, jaʼnax stukel te machʼa Ajwalil ya xjil yuʼun te ants winiketike sok jaʼnaxme kʼax lek stukel te jich ya xbajtʼ yichʼik wentainel yuʼune.

18. ¿Bin sbiil te guerra yuʼun te Ajwalil tsabil yuʼun te Dios sok te ajwaliletik yuʼun te balumilale?

¹⁸ Te Biblia bayal ya yalbey skʼoplal ta swenta te guerra yuʼun te Ajwalil tsabil yuʼun te Dios sok te ajwaliletik yuʼun te balumilale. Jich bitʼil te ya yichʼ albeyel skʼoplal te kʼalal nopolix-a te slajibal kʼajkʼale, te chopol espirituetik ya xjajch spukik lotil kʼopetik yuʼun ya sloʼlayik «te ajwaliletic te ayic ta swohlol bahlumilal». ¿Bin yuʼun te jich ya spasike? «Yuʼun ya stsobic ta guerra ta yorahil te mucʼ scʼahcʼalel yuʼun Dios te spisil ya xhuʼ yuʼune». Te ajwaliletik ini yame yichʼik tsobel «ta jun lugar Armagedón sbihil ta hebreo» (Apocalipsis 16:14, 16). Jich bitʼil la kiltikix te bin ya yal te cheb textoe, te kʼalal ya sitintay sbaik te ajwaliletik yuʼun balumilal sok te Ajwalil tsabil yuʼun te Diose, jaʼ sbiil guerra yuʼun Armagedón.

19, 20. ¿Bin yuʼun te maba yak ta kʼoel ta pasel te skʼanojel yoʼtan Dios liʼ ta Balumilale?

¹⁹ Ta swenta te guerra yuʼun Armagedón, ¿bin ya yakʼ spas te Ajwalinel yuʼun te Diose? Akʼame juluk ta koʼtantik te skʼanojel yoʼtan te Jehová ta swenta te Balumilale, jaʼ te ya xpastaj ta nichimal kʼinal sok te ya xnoj ta tojil ants winiketik te ya x-abatinik ta stojole. ¿Bin yuʼun te maba yak ta kʼoel ta pasel te skʼanojel yoʼtan te Dios ta ora ini? Jaʼ ta skaj te jmulawilotike jich yuʼun ya stsakotik chamel sok ya xlajotik. Jaʼukmeto ta yoʼebal kapitulo la jnoptik te laj ta jtojoltik te Jesús yuʼun jich ya xkuxinotik ta sbajtʼel kʼinal. Yatoniwan  xjul ta awoʼtan te bin tsʼibaybil ta sjun Juan: «Como hich cʼux ta yoʼtan Dios te bahlumilal te la sticon tal te hip jtuhl Snichʼan, scuenta yuʼun spisil te machʼatic ya schʼuhunic ma ba ya xchʼayic, ay scuxlejalic sbahtel qʼuinal yuʼun» (Juan 3:16).

²⁰ Ay yan te bin yuʼune, jaʼ te bitʼil ay bayal ants winiketik te chopol stalelike. Ya spasik lot, ya xloʼlaywanik sok ya spasik muliletik. Ma skʼan ya spasbeyik te skʼanojel yoʼtan te Diose. Jaʼ yuʼun te machʼatik chopolike yame yichʼik lajinel ta Armagedón te guerra yuʼun te Diose (kʼopona te sjun Salmo 37:10). Te yanxan swentail te maba yak ta kʼoel ta pasel te skʼanojel yoʼtan te Dios ta Balumilale, jaʼ te bitʼil te ajwaliletik maba ya stijbey yoʼtan te ants winiketik ta spasel te bin ya skʼan te Diose. Bayal ta tul te maʼyuk yip te mantaltesel yuʼunike, ay kʼax tulan yoʼtanik o ya xloʼlaywanik. Te Biblia jich jamal ya yal: «Jtuhl winic ya smosohin yan winic yuʼun ya yaʼbe swocol» (Eclesiastés 8:9).

21. ¿Bin-utʼil ya xkʼot ta pasel te skʼanojel yoʼtan te Dios ta Balumilal ta swenta te Ajwalinele?

²¹ Jich yuʼun te kʼalal kʼaxemix-a te Armagedone, jaʼnaxme te Ajwalinel yuʼun te Diose yame swentain te ants winiketik ta Balumilale sok jaʼnixme ya yakʼ xkʼot ta pasel te skʼanojel yoʼtan te Diose soknix yame yakʼ talel bayal utsilal. Jich bitʼil te ya yichʼik chʼojel ochel ta xaab ta jmil jaʼbil te Satanás sok te chopol espirituetik yuʼune (kʼopona te sjun Apocalipsis 20:1-3). Ta swenta te bitʼil la yakʼ sba ta lajel te Jesuse, te ants winiketik mame stsakotikix ta chamel sok maba ya xlajikix, melel ya staik kuxlejalil sbajtʼel kʼinal (Apocalipsis 22:1-3). Jaʼnix jich yame spas ta nichimal kʼinal te Balumilale. Jich te Ajwalinel yuʼun te Dios yame yakʼ xkʼot ta pasel te skʼanojel yoʼtan Dios ta Balumilal sok yame yakʼ ta chʼultesbeyel te sbiile. ¿Bin ya skʼan ya yal-abi? Ta swenta te Ajwalinel-abi, spisil te ants winiketik yame yichʼik ta mukʼ sok bayalme skʼoplal ya xkʼot ta yoʼtanik te sbiil Jehovae.

22. ¿Bin-utʼil ya jnaʼtik te ma jaʼuk tal-a te Ajwalinel yuʼun te Dios kʼalal ay ta Balumilal-a te Jesuse, ni jaʼuk te kʼalal chaʼkuxajemix-ae?

²² Kʼalal te Jesús la yalbey te jnopojeletik yuʼun te akʼa skʼanbeyik te Dios «Acʼa taluc te cuentahinel awuʼun» te xchie, jamal la yakʼ ta naʼel te yuʼun mato talemuk-a te Ajwalinele. ¿Jaʼbal tal-a te kʼalal mo bael ta chʼulchan te Jesuse? Maʼuk, melel te Pedro soknix te Pablo la yakʼik ta naʼel te kʼalal chaʼkuxajemix-a te Jesuse kʼot ta pasel ta stojol te bin tsʼibaybil jilel ta Salmo 110:1: «Te Jehová hich la yalbe te Cajwal: Huclan ta jwaʼel-cʼab ha to cʼalal ya caʼbat scuenta scajtajib awoc te acontratac» (Hechos 2:32-35; Hebreos 10:12, 13). Ta swenta-abi, te Jesucristo la smaliy te jayeb tiempo kʼaxe.

23. 1) ¿Bin-ora jajch ta pasaw ta mantal te Ajwalinel yuʼun te Diose? 2) ¿Bin ya yichʼ nopel ta yan kapitulo?

²³ ¿Jayeb tiempo la smaliy? Te kʼalal aytoniwan skʼan 40 jaʼbil yuʼun ya sta-a te jaʼbil 1914, te jtsojb machʼatik te smelelil la snopik te Bibliae kʼot ta yoʼtanik te jayeb tiempo ya skʼan ya xkʼaxe, jaʼ ini kʼot ta yaʼbilal 1914. (Teme ya akʼan ya anaʼbeyxan skʼoplal te ajtal ini, ilawil te apéndice «1914: jaʼ jun jaʼbil te mukʼ skʼoplal ta swenta te bintik albil jilel skʼoplal ta Bibliae».) Te bintik kʼoem ta pasel kʼalalto ta 1914 ya yakʼ ta ilel te la snaʼik yajtayel te tiempo te machʼatik la snopik te Bibliae. Te bintik yak ta kʼoel ta pasel te tsʼibaybil jilel ta Biblia ya yakʼ ta ilel te Jehová la yotses ta Ajwalil te  Jesucristo ta 1914 soknix jajch ta pasaw ta mantal te Ajwalinel yuʼune. Jich yuʼun yakotikix ta kuxinel ta tiempo yuʼun te Satanás te nopol ya xlajixe (Apocalipsis 12:12; Salmo 110:2). Jaʼnix jich ya xjuʼ ya kaltik te nopol ya xjajch ta aʼtel te Ajwalinele, yuʼun jich ya yichʼ pasel te skʼanojel yoʼtan te Dios ta swenta te Balumilale. ¿Lekbal ya awaʼiy te bin la yichʼix alele? ¿Yabal achʼuun te yuʼun-nix jich ya xkʼot ta pasel-ae? Te yan kapitulo ya yakʼbat awil te bin ya yakʼ ta nopel ta smelelil te Biblia ta swenta te bintik la yichʼix alele.