1, 2. ¿Banti ya xjuʼ ya jnakʼ jbatik ta lek?

NOPA awaʼiy te ay banti yakat ta beele, tey-abi ya xmajk tal te kʼinale. Ta oranax ya xtil ta chʼulchan te tsantsewaletike sok ya xjajch ta kʼop te chawuke, ta patil ya yakʼ tulan jaʼal. Tey-abi ya xlokʼat ta animal yuʼun ya xbajtʼ ale te banti ya akʼases te jaʼale. Ta be ya awil te ay mukʼul chʼen te takin yutile. ¿Mabal jichuk te bujtsʼanax kʼinal ya awaʼiy yuʼune?

² Ta kʼajkʼal ini xiʼbantiknax sba te balumilale, melel xkechkon ta bolobel. Jaʼukmeto, ¿banti ya xjuʼ ya jnakʼ jbatik yuʼun jich ma xyichʼ utsʼinel te schʼuunel koʼtantike sok te manchuk ya jchʼaytik te kuxlejalil sbajtʼel kʼinale? Ilawil te bin ya yal te Bibliae: «Hich me ya calbe te Jehová: “Haʼat ahnibalat cuʼun soc toyol tsʼahcat cuʼun, Diosat cuʼun te smucʼulinejat coʼtan”» (Salmo 91:2).

3. ¿Bin-utʼil ya xkʼot ta anibal kuʼuntik te Jehovae?

 ³ Te Jehová, jaʼ te Jpaswanej sok te machʼa jaʼnax stukel Mukʼ Ajwalile, ya xjuʼ xkʼot ta anibal kuʼuntik, ¿mabal jichuk te kʼax bayal yutsil ini?, melel maʼyuk machʼa ya xpajot yuʼun sok maʼyuk bin ya xpajbot yuʼel stukel. Manchukme ay ya kichʼtik utsʼinel, te Jehová ya xjuʼ ya skoltayotik ta swenta biluk wokolil te ya xkʼax ta jtojoltike. ¿Bin-utʼil ya xkʼot ta anibal kuʼuntik te Jehovae? Jaʼ te kʼalal ya kakʼtik smukʼul koʼtantik ta stojole. Jaʼnix jich te Bibliae ya yikʼotik ta spasel ini: «[Ayinanikme] ta stojol te scʼuxul yoʼtan Dios» (Judas 21). Jich yuʼun-abi ya skʼan te ya x-ayinotik ta stojol te skʼuxul yoʼtan te Diose sok te junuknax ya kakʼ jbatik ta stojol te jTatik te ay ta chʼulchane. Teme jich ya jpastike jichme ya xjuʼ xkʼot ta anibal kuʼuntik. Jaʼukmeto, ¿bin ya xjuʼ ya jpastik yuʼun jich lekxan ya yilotik-a te Jpaswaneje?

4, 5. ¿Bintik-utʼil yakʼojbotik kiltik te skʼuxul yoʼtan te Diose?

⁴ Ay bayal te bintik-utʼil yakʼojbotik ta ilel skʼuxul yoʼtan te Diose. Akʼa kiltik chaʼoxchajpuk, melel teme jich ya jpastike ya skoltayotik yuʼun ya x-ayinotik ta stojol skʼuxul yoʼtan te Diose. Nopa awaʼiy chaʼoxchajpuk te bintik la anopix ta Bibliae. Swenta yuʼun ya jmulantik te kuxlejalile, te Jpaswaneje yakʼojbotik te Balumilal te banti ya xkuxinotike, te banti ay bayal weʼelil, jaʼ, teʼetik sok yantikxan biluketik te ya jtuuntestike, chambalametik te tʼujbiliknax ta ilele sok te bintik ya jtatik ta ilel te tʼujbiliknaxe. Jaʼnix jich la yakʼbotik te Biblia te banti ya yalbotik te bin sbiile sok te bintik talelil ay yuʼune. Jaʼnix jich ya scholbey skʼoplal te jaʼ la stikun tal ta Balumilal te sNichʼane sok te la yakʼ kʼaxuk swokol soknix te la yakʼ lajuk ta jwentatike (Juan 3:16). Ta swenta ini, jich la yakʼbotik jun mukʼul  majtʼanil, jaʼ te ya jmaliytik te tʼujbil kuxlejalil ta pajel chaʼbeje.

⁵ Swenta jich ya xkʼot ta pasel ta pajel chaʼbej ini, ayme binxan schajpanoj te Diose, jaʼ te Ajwalinel yuʼun ta chʼulchane. Te Ajwalinel ini nopolme ya slajin spisil te jwokoltike sok yame spas ta nichimal kʼinal te Balumilale. ¡Kʼax bayalme yutsil ini! ¡Jaʼtome ya jtatik tseʼel oʼtanil-abi sok yame xkuxinotik ta lamalkʼinal! (Salmo 37:29.) Jich bitʼil te mato xkʼot yoraile, te tojobtesel ya yakʼbotik te Diose ya skoltayotik ta kʼajkʼal ini, swenta jich ya xjuʼ xlekubxan te jkuxlejaltike. Ay yan majtʼanil te yakʼojbotik te Jehovae, jaʼ te ya xjuʼ ya jkʼopontike. Jaʼme chaʼoxchajp-abi te bintik-utʼil yakʼoj ta ilel skʼuxul yoʼtan te Dios ta jtojoltike soknix ta stojol spisil te ants winiketike.

6. Jich bitʼil te yakʼojbat awil skʼuxul yoʼtan te Diose, ¿bin ya skʼan ya apas te jaʼate?

⁶ Jaʼ yuʼun ya skʼan ya ajojkʼoybey aba: «¿Bin ya skʼan ya jpas ta swenta te skʼuxul yoʼtan yakʼojbon kil te Jehovae?». Ayniwan bayal machʼatik te jich ya yalik ini: «Jaʼ te kʼuxuk ya kaʼiy ta koʼtane». ¿Jichbal ya awal-euk-abi? Te Jesús la yal te jaʼ mukʼul mantalil ini: «Kʼuxme xa awaʼiy ta awoʼtan te Jehová te Dios awuʼun sok spisil awoʼtan sok spisil akuxlejal sok spisil apʼijil» (Mateo 22:37, TNM). Ta melel, bayalme te bintik yuʼun ya skʼan kʼux ya awaʼiy ta awoʼtan te Jehovae. Jich yuʼun, ¿bin-utʼil ya kakʼtik ta ilel te kʼux ya kaʼiytik sok spisil koʼtantik sok spisil jkuxlejaltik sok spisil jpʼijiltik te Diose?

7. Ta swenta te skʼuxul koʼtantik ta stojol te Diose, ¿bin ya skʼan ya skoltayotik ta spasel yuʼun-abi? Cholbeya skʼoplal.

⁷ Te Biblia ya yal te bayal skʼoplal te kʼuxuk ta koʼtantik te Diose. Ta swenta-abi, ¿bin ya skʼan ya skoltayotik ta  spasel? Swenta ya xkʼotxan lek ta koʼtantik akʼa jpajbeytik skʼoplal sok ini: Nopa awaʼiy te ya akʼan aloʼ jpʼijuk mansanae, ¿tikʼatbal-a teme jaʼnax ya yakʼbatik te sbakʼe? Maʼuk. Melelnix-a te jaʼ ya xchʼi te sbakʼ te mansanae, jaʼukmeto te bin ya akʼane, jaʼ te sit teʼe. Jichme kʼoem te skʼuxul koʼtantik ta stojol te Diose jaʼtonaxme sjajchibal-abi, melel yame skʼan ya yakʼ sit. Te Bibliae jich ya yakʼ ta nopel: «Chican te cʼux ta coʼtantic te Dios teme ya jchʼuhumbetic te mandariletic yuʼune. Ma ba wocol ta chʼuhunel te mandariletic yuʼune» (1 Juan 5:3). Te skʼuxul koʼtantik ta stojol te Diose yame skʼan ya sitin-euk, yame skʼan te ya kakʼtik ta ilel sok yaʼtelul (kʼopona te sjun Mateo 7:16-20).

8, 9. ¿Bin-utʼil ya kakʼtik ta ilel te kʼux ta koʼtantik te Diose sok te ya kalbeytik wokol ta swenta te bintik spasoj ta jtojoltike?

⁸ Ya kakʼtik ta ilel te kʼux ta koʼtantik te Dios kʼalal ya jchʼuunbeytik te mantaliletik yuʼune sok te kʼalal ya jpastik ta jkuxlejaltike, melel te leyetik yuʼun te Jehovae maba kʼax wokoluk ta pasel. Kichʼojtik akʼbeyel swenta jich ya jtatik  tseʼel oʼtanil sok swenta ya jmulanbeytik yutsilal te kuxlejalile (Isaías 48:17, 18). Te kʼalal ya kakʼ jbatik ta tojobtesel yuʼun te Jehovae, jich ya kakʼtik ta ilel te bayal skʼoplal ta koʼtantik spisil te bintik spasoj ta jtojoltike. Mel-oʼtantik sba te bitʼil ay chaʼoxtulnax te machʼatik jich ya snopik-abi. Te joʼotike ma jkʼantik te jich jtaleltik te bitʼil chaʼoxtul ants winiketik ta skʼajkʼalel te Jesuse. Ta jun buelta, te Cristo la slekubtes lajuntul winiketik te yichʼojik kʼaʼel chamele, jaʼukmeto jtulnax te machʼa sujt yalbey wokol te Jesuse (Lucas 17:12-17). Jaʼme ya skʼan ya jkʼayinbeytik stalel te winik-abi.

⁹ Jich yuʼun, ¿bin mantaliletik yuʼun Jehová te ya skʼan ya jchʼuuntike? Ay la kilbeytikix skʼoplal chaʼoxchajpuk ta libro ini. Jaʼukmeto akʼa kilbeytik junchebuk skʼoplal, melel teme ya jchʼuunbeytik te mantaliletik yuʼun te Diose, jich maba wokol ya kaʼiytik te ya x-ayinotik ta stojol skʼuxul yoʼtan te Diose.

10. ¿Bin yuʼun ma skʼan ya jkom jbatik ta snaʼbeyelxan sba te Jehovae?

¹⁰ Te kʼalal ya jnaʼbeytikxan sba ta lek te Jehovae, jaʼme ya yakʼ xnoptsajotikxan ta stojol. Mame ayuk bin-ora ya skʼan ya jkom jbatik ta spasel. Nopa awaʼiy te ayukat ta teʼtikil ta jun ajkʼabal te ay bayal sik tey-ae, jich yuʼun ya atsum kʼajkʼ yuʼun ya akʼatin. ¿Yabal awakʼ xtupʼ ta kʼunkʼun te kʼajkʼe? Maʼuk. Yaniwan awakʼbeyxan siʼul yuʼun jich ya xtilxan-a, jich ma xlajat ta sik-a. Jich bitʼil te siʼ te ya yakʼ xtilxan te kʼajkʼe, jichme kʼoem te snaʼbeyel sba te Diose maba ya yakʼ xtupʼ te skʼuxul koʼtantik ta stojole (Proverbios 2:1-5).

11. ¿Bin yaʼiyel la yaʼiy sbaik te jnopojeletik ta swenta te bin cholbot yuʼun te Jesuse?

¹¹ Te Jesús ma la skʼan te ya xtupʼ skʼuxul yoʼtan te jnopojeletik  yuʼun ta stojol te Jehová sok ta swenta te smelelil kʼope. Te kʼalal chaʼkuxajemix-a te Jesuse la scholbey yaʼiy chaʼtul jnopojeletik yuʼun ta swenta chaʼoxchajp te bintik albil jilel skʼoplal ta Escrituras Hebreas te kʼot ta pasel ta stojole. ¿Bin yaʼiyel la yaʼiy sbaik yuʼun? Ta patil jich la yalik te jnopojeletike: «Jaʼ cati swentail te bayal sbujtsʼ la caiytic ta coʼtantic te cʼalal yac tel ta aiyej ta be soc te la xcholbotic caiytic te Scʼop Diose» (Lucas 24:32, XCD).

12, 13. 1) ¿Bin kʼoem ta pasel ta stojolik jteb ma spisiluk te ants winiketik ta swenta te skʼuxul yoʼtanik ta stojol te Diose sok te Bibliae? 2) ¿Bin ya xjuʼ ya jpastik yuʼun jich ma xtupʼ te skʼuxul koʼtantike?

¹² Te kʼalal yakat ta snopel tal-a te bintik ya yakʼ ta nopel ta smelelil te Bibliae, ¿mabal jichuk te ay yutsil kʼot ta awoʼtan, te la yakʼbat stseʼelil awoʼtan, sbujtsʼkʼinal sok te kʼux la awaʼiy ta awoʼtan te Diose? Ay bayal te machʼatik jich la yaʼiy sbaik-euke. Tey-abi te bin tulanxan skʼoplale jaʼ te manchuk ya xtupʼ te kʼuxul oʼtanile sok te yakuk xmukʼubxane. Mame jaʼuk ya skʼan ya jtʼunbeytik stalel te ants winiketik te bitʼil la yalbey jilel skʼoplal te Jesuse: «Bayel machʼatic ya xpehcʼaj te scʼuxul yoʼtanique» (Mateo 24:12). ¿Bin ya xjuʼ ya apas yuʼun jich ma sikub te skʼuxul awoʼtan ta stojol te Jehovae sok te bintik smelelil ya yal te Bibliae?

¹³ Mame xa akom aba ta snaʼbeyelxan sba te Jehová Dios sok te Jesucristoe (Juan 17:3). Nopa lek ta awoʼtan te bin ya akʼopon ta sJun Diose sok jojkʼoybeya aba: «¿Bin ya yakʼbon jnop ta swenta te Jehovae? ¿Yabal yakʼ te kʼux ya kaʼiyxan sok spisil koʼtan sok spisil jkuxlejal sok spisil te jpʼijile?» (kʼopona te 1 Timoteo 4:15). Teme jich ya anop ta awoʼtan ini, maʼyuk bin-ora ya xtupʼ te skʼuxul awoʼtan ta stojol te Jehovae.

14. ¿Bin yuʼun tulan skʼoplal te ya jkʼopontik Jehová swenta jich ma xtupʼ te skʼuxul koʼtantik ta stojole?

¹⁴ Te bin yan ya skoltayotik yuʼun ma xtupʼ te skʼuxul  koʼtantik ta stojol te Jehovae, jaʼ te ya jkʼopontik ta spisil-orae (1 Tesalonicenses 5:17). Ta sjuklajunebal kapitulo yuʼun te libro ini la jnoptik te jaʼ jun mukʼul majtʼanil te bitʼil ya xjuʼ ya jkʼopontik te Diose. Teme spisil-ora jich ya jpastike jichme lekxan ya kil jbatik sok-a te Jehovae. Yame skʼan te mame jaʼuknax ya kalulantik te bin kʼayemotikix ta yalele. Te kʼalal ya jkʼopontik te Jehovae yame skʼan te jichuk ya jpastik te bitʼil jtul tut kerem te kʼalal ya skʼopon te state. Yame skʼan ya kichʼtik ta mukʼ Dios te kʼalal ya jkʼopontike sok te yakuk kalbeytik ta jamal te bin ay ta koʼtantike (Salmo 62:8). Jaʼ yuʼun-abi, swenta lek ya kichʼtik ta mukʼ te Diose bayalme skʼoplal te yakuk jnoptik te Biblia ta jtukeltiknax sok te yakuk jkʼopontik sok spisil koʼtantik te Diose. Jich maba tulan ya kaʼiytik te ya x-ayinotik ta stojol te skʼuxul yoʼtan te Diose.

15, 16. ¿Bin yuʼun ya skʼan ya kiltik jich bitʼil jun tʼujbil aʼtelil sok bitʼil jun kʼulejalil te scholbeyel skʼoplal te Ajwalinel yuʼun te Diose?

¹⁵ Te bintik-utʼil ya kichʼtik ta mukʼ ta jtukeltiknax te Diose jaʼ te kʼalal ya jkʼopontike sok te kʼalal ya jnoptik te Bibliae. Jaʼukmeto ay yan te bin ya jpastik sok te j-abatetik yuʼun Diose, jaʼ te scholel skʼop Diose. ¿Aybal machʼa la acholbeyix yaʼiy ta swenta te bintik ya yakʼ ta nopel te Bibliae? Teme jiche, laniwan amulanix spasel te tʼujbil aʼtelil te yakʼojbotik te Jehovae, jaʼ te scholel te lek yachʼil kʼop yuʼun te Ajwalinel yuʼune (kʼopona te sjun Mateo 24:14; 28:19, 20).

¹⁶ Te jpuk-kʼop Pablo kʼax bayal skʼoplal kʼot ta yoʼtan te scholel te skʼop Diose la yal te jaʼ jich bitʼil jun kʼulejalile (2 Corintios 4:7). Maʼyuk yan aʼtelil te kʼax tʼujbil te bitʼil ya kalbeytik skʼoplal te Jehová soknix te skʼanojel yoʼtane. Te kʼalal jich ya jpastik ini yakotik ta abatinel ta  stojol te lekil Ajwalil kuʼuntike, ma jaʼuknax-abi, ay bintik lek ya jtatik yuʼun. Te kʼalal ya jcholtik te skʼop Diose, ya jkoltaytik te machʼatik yuʼun-nix ya skʼan ya xnoptsajik ta stojol-a te jTatik te ay ta chʼulchane sok te ya x-ochik ta be te ya x-ikʼawan bael ta kuxlejalil ta sbajtʼel kʼinale. ¿Aybal yan aʼtelil te jich ya yakʼbotik sbujtsʼ koʼtantik-abi? Soknix te kʼalal jich ya jpastike, ya xmukʼubxan te schʼuunel koʼtantike sok te skʼuxul koʼtantik ta stojol te Diose. Bayalme skʼoplal ta yoʼtan Jehová te kʼalal ya jpastik tulan ta spasbeyel te yaʼtele (Hebreos 6:10). Jich bitʼil te la kiltikixe, te kʼalal ma jkom jbatik ta spasel te aʼtelil-abi, jaʼ ya skoltayotik swenta ya x-ayinotik ta stojol skʼuxul yoʼtan te Diose (kʼopona te 1 Corintios 15:58).

17. ¿Bin yuʼun te ya skʼan ya kaʼtelintik te scholel skʼop Diose?

¹⁷ Mame skʼan ya xchʼay ta koʼtantik te ya skʼan ya kaʼtelintik scholbeyel skʼoplal te Ajwalinel yuʼun te Diose. Te Biblia jich ya yal: «Hala te scʼop Dios, aʼtelina spasel ta yorahil o teme ma yorahiluc» (2 Timoteo 4:2). ¿Bin yuʼun te ya skʼan ya kaʼtelintik te scholel skʼop Diose? Jaʼ ta swenta te bin ya yal te sKʼop Diose: «¡Nopolix te smucʼul cʼahcʼalel yuʼun Jehová! ¡Nopolix yorahil!» (Sofonías 1:14). Jaʼ yuʼun-abi, kʼax nopolme ayix talel te skʼajkʼalel te Jehovae te jaʼ yorail te ya slajin spisil te bintik swenta balumilale. ¡Te ants winiketike yame skʼan ya snaʼik stojol ini! Yame skʼan ya xkʼot ta yoʼtanik te yorailto te ya skʼan ya schʼuunbeyik smantal te Jehová te jaʼnax mukʼul Ajwalil stukele, melel te slajibal te bintik swenta balumilale «ya xcʼoht ta pasel ta mero yorahil» (Habacuc 2:3).

18. ¿Bin yuʼun te ya skʼan pajal ya kichʼtik ta mukʼ te Dios sok te yantik j-abatetik yuʼune?

¹⁸ Te Jehová ya skʼan te ya kichʼtik ta mukʼ sok te yantik j-abatetik yuʼune. Ta swenta-abi jich ya yal te Bibliae: «Acʼa jnoptic bin utʼil talel cʼaxel ya juc jbahtic ta cʼuxultaywanej  soc ta spasel lequil aʼteliletic, ma me jquehchantic te ya jtsobilan jbahtic, hich te bin utʼil ay cʼahyemic ta spasel, talel cʼaxel acʼa jtsits jbahtic; soc cʼaxuc hich ay scʼoblal awuʼunic a, te bin utʼil yac awilic te yac ta talel te yorahil ya xtal te Cajwaltique» (Hebreos 10:24, 25). Te kʼalal ya jtsob jbatik sok te kermanotaktike, ya xjuʼ ya kichʼtik ta mukʼ te Dios te kʼux ta koʼtantike sok ya xjuʼ ya kalbeytik yutsil skʼoplal. Jaʼnix jich ya jmukʼubtesbey jba koʼtantik sok talel kʼaxel ya juk jbatik ta kʼuxultaywanej.

19. ¿Bin ya xjuʼ ya jpastik swenta yuʼun jich kʼux-xan ya kaʼiy ta koʼtantik te kermanotaktik ta kongregasione?

¹⁹ Te kʼalal ya jtsob jbatik sok te yantik j-abatetik yuʼun te Jehovae, jichme pajal kʼux ya kaʼiy jbatik, jaʼnix jich lek ya kilxan jbatik sok te hermanoetik ta kongregasione. Tulanme skʼoplal te jaʼuk ya xbajtʼ ta koʼtantik ta yilel te slekil talelik te yantike, jich te bitʼil ya yil te Jehová ta jtojoltik-euke. Mame xa akuy te tojil ants winiketik te kermanotaktike. Julukme ta awoʼtan te ya xchʼayotik-euke sok te bitʼil ma pajaluk te bitʼil ya xchʼi te schʼuunel koʼtantik ta jujuntule (kʼopona te sjun Colosenses 3:13). Amigoina te machʼatik kʼux ta yoʼtanik ta smelelil te Jehovae, jichme ya awil te bitʼil ya xmukʼubxan te schʼuunel awoʼtan ta stojol te Diose. Teme jun ayotik sok te kermanotaktik ta yichʼel ta mukʼ te Jehová, jich maba wokol ya awaʼiy te ya x-ayinat ta stojol te skʼuxul yoʼtan te Diose. Yame kiltik bin-utʼil ya smajtʼantes Jehová te machʼatik jun yoʼtanik ya x-ichʼot ta mukʼ yuʼune sok te ya x-ayinik ta stojol te skʼuxul yoʼtane.

20, 21. ¿Bin-a te smelelil kuxlejalile sok bin yuʼun te bayal yutsil te jich ya jtatik-abi?

²⁰ Te majtʼanil ya yakʼ te Jehová ta swenta te j-abatetik yuʼun te jun yoʼtanik ta stojole jaʼ te kuxlejalile,  jaʼukmeto ¿bin yilel te kuxlejalil-abi? Jteb ma jpisiltikuk yaniwan kaltik te kuxulotikixe, melel ya kichʼtik ikʼ, ya xweʼ uchʼotik. Jaʼnix jich te kʼalal tseʼelnax koʼtantike ayniwan jich ya kaltik: «¡Yakon ta smulanbeyel yutsilal ta smelelil te kuxlejalile!». Jaʼukmeto te Biblia ya yal te maʼyuk jtul ants winik te yak ta smulanel te smelelil kuxlejalile.

²¹ Te Biblia ya yal te yakuk jtatik te smelelil kuxlejalile (1 Timoteo 6:19). Te kʼopil smelelil kuxlejalile, jaʼ ya skʼan ya yal te kuxlejalil te yakotik ta smaliyel ta pajel chaʼbeje. Te kʼalal tojil ants winikotikix-ae, yame jtatik te smelelil kuxlejalile, melel jichme ya xkuxinotik te bitʼil snopoj te Dios ta sjajchibale. Te kʼalal ya sta yorail te ayotikix ta Nichimal Kʼinal te banti maʼyukix chamele, te ya x-ayin lamalkʼinal sok te tseʼel oʼtanile, jaʼto-abi ya jtatik te smelelil kuxlejalile, jaʼ te kuxlejalil ta sbajtʼel kʼinale (1 Timoteo 6:12). ¿Mabal jichuk te kʼax tʼujbil te bin ya xkʼot ta pasel ta pajel chaʼbeje?

22. ¿Bin-utʼil ya xjuʼ ya ata te smelelil kuxlejalile?

²² ¿Bin-utʼil ya xjuʼ ta tael te smelelil kuxlejalile? Te kʼalal mato yalojuk-a te Pablo ta swenta te smelelil kuxlejalile, la yalbey te jchʼuunjeletik «te acʼa spasic te bin lec» sok «haʼuc me scʼuhlejalic te lequil aʼteliletic» (1 Timoteo 6:18). Jich yuʼun tulanme skʼoplal te ya jpastik ta jkuxlejaltik te bintik la jnoptik ta Bibliae. Ta swenta ini, ¿yuʼunbal la skʼan la yal Pablo te jaʼnax ta swenta lek kaʼteltik ya jtatik te smelelil kuxlejalile? Maʼuk, melel jaʼnax ya jtatik ta swenta te yutsil yoʼtan te Diose (Romanos 5:15). Jaʼukmeto, te Jehová ya smulan smajtʼantesel te machʼatik jun yoʼtanik ya x-abatinik ta stojole. Jaʼ ya skʼan te yakuk ata te kuxlejalil sbajtʼel kʼinal te ya yakʼ tseʼel oʼtanil sok ya yakʼ lamal-oʼtanil. Te kuxlejalil-abi ya smaliyik spisil te machʼatik ya x-ayinik ta stojol te skʼuxul yoʼtan te Diose.

23. ¿Bin yuʼun tulan skʼoplal te ya x-ayinotik ta stojol te skʼuxul yoʼtan Diose?

 ²³ Ya skʼan te jich ya jojkʼoybey jbatik ta jujuntule: «¿Yakonbal ta yichʼel ta mukʼ te Dios jich bitʼil ya yal ta mantal ta Bibliae?». Teme jich yakotik ta spasel ta jujun kʼajkʼale, lekme yakotik ta spasel-abi. Jichme ya xjuʼ xkʼot ta anibal kuʼuntik te Jehovae. Ta swenta te bintik xiʼbantik sba ya xkʼot ta pasel ta slajibal kʼajkʼal yuʼun te bintik swenta balumilale, te Jehová yame skanantay te lum yuʼun te jun yoʼtan ya yakʼ sba ta stojole. Jaʼnix jich yame yakʼ xkuxinotik ta tʼujbil yachʼil balumilal te nopol ayixe. ¡Ya yakʼ bayal sbujtsʼ koʼtantik yuʼun-abi! ¡Kʼax bayalme ya xbajtʼ yakʼ stseʼelil koʼtantik teme la jnaʼtik stsael te bin lek ta pasel ta slajibal kʼajkʼal ini! Teme jaʼ ya atsa te bin lek ta pasel ta ora ini, yame xbajtʼ amulanbey yutsilal ta sbajtʼel kʼinal te smelelil kuxlejalile, jaʼ te kuxlejalil te spisil-ora jich skʼanoj te Jehová Dios te ya xkuxinotike.