1, 2. ¿Bin yuʼun te jaʼ lek te ya jpastik jojkʼoyeletik cheʼoxebuk bueltae?

¿AYBAL awaʼiyoj stojol te bayal bintik ya sjojkʼoyik te alaletike? Ay bayal ta tul te ya spasik jojkʼoyeletik te kʼalal ya snaʼikix jtebuk-a te kʼope. Jich yuʼun ay alaletik te jich ya sjojkʼoyike: «¿Banti ya xbajtʼ te kʼajkʼal te kʼalal ya x-ijkʼub te kʼinale?» «¿Bin yuʼun te ma xkʼopojik te chambalametike?» o «¿Bin yuʼun te ma xjuʼ ta tsakel te ikʼe?». Manchukme ya jpastik tulan ta sutbeyel te bintik ya sjojkʼoyike, ay ma jnaʼtik te bin ya kalbeytike. Manchukme ya kakʼbeytik sujtib te jojkʼoyel ya spasike yananix schaʼpasik yan jojkʼoyel-a.

² Ma jaʼuknax ya spasik jojkʼoyeletik te alaletike. Jaʼnix jich te machʼatik ayix yaʼbilalike, yuʼun-niwan ya skʼan ya snaʼik te bin-utʼil ya xjuʼ xkʼotik ta jun lugar, o yuʼun ya skʼan ya stsajtay sbaik ta swenta te ay bin ya xjuʼ x-utsʼinotike o yuʼun-nax ay bin ya skʼan ya snaʼik stojol. Jaʼukmeto jich yilel te ay bayal ants winiketik te ya yijkʼitayik spasel te  jojkʼoyeletik te kʼax tulanik skʼoplale. O ya yijkʼitayik ta slebeyel te sujtibe.

3. ¿Bin yuʼun te ay bayal ants winiketik te ma slebeyikix sujtib te jojkʼoyeletik te tulanik skʼoplale?

³ Nopa awaʼiy ta swenta te jojkʼoyel te ay ta spat te libro ini sok ta swenta te jojkʼoyeletik te ayik ta sbabial pajinaetike soknix ta sjajchibal te kapitulo ini. Jaʼme te chaʼoxchajp jojkʼoyeletik te tulanik skʼoplale. Jaʼukmeto ay bayal ants winiketik te ma slebeyikix sujtib te jojkʼoyeletike. ¿Bin yuʼun? ¿Yabal xjuʼ ta tabeyel sujtib ta Biblia? Ay chaʼoxtul te machʼatik chujkʼul ya yaʼiyik te sujtib ya yakʼ te Bibliae. Ay yantik te ma spasik jojkʼoyel ta skaj kʼexlal. Sok ay yantik ya yalik te jaʼnax ay ta swenta te jwolwanejetik sok te jpʼijubteswanejetik yuʼun te relijionetik ta spasel te jojkʼoyeletik-abi. ¿Bin ya anop yuʼun te jaʼate?

4, 5. ¿Bin cheʼoxeb jojkʼoyeletik te tulanik skʼoplal te ya xjuʼ ya jpasbey jbatike? ¿Bin yuʼun te ya skʼan ya jlebeytik te sujtibe?

⁴ Ta melel, awoʼtanuk ya akʼan ya anaʼbey sujtib te jojkʼoyeletik te tulanik skʼoplal ta swenta te kuxlejalile. Jich bitʼil: «¿Bin swentail te ayotik ta kʼinale? ¿Jaʼnaxbal kuxlejalil-a ini? ¿Bin yilel te Diose?». Lek teme ya apasbey aba te jojkʼoyeletik ini, jich yuʼun bayalme skʼoplal te ma xa akom aba ta slebeyel te sujtib jaʼto teme la atabey te banti jamal ya scholbat awaʼiye. Te Jesucristo te naʼbil sba jich bitʼil te jpʼijubteswanej te kʼax mukʼxan skʼoplale, jich la yal: «Cʼanahic, hich me ya xʼaʼbotex. Lehahic, hich me yac atahic ta lehel. Cʼopojanic, hich me ya xjambotex» (Mateo 7:7).

⁵ Teme ya aleulanxan te sujtib te jojkʼoyeletik te kʼax tulanik skʼoplale, yame awil te ma tojoluknax te ya apas tulane (Proverbios 2:1-5). Manchukme bayal bintik yalojbatikix, te jojkʼoyeletik ini ayme sujtib sok ayme ta akʼab snopel. Ya xjuʼ ta tael ta Biblia sok ma chujkʼuluk ta nopel. Te bin lekxan ya jtatik yuʼune, jaʼ te bitʼil ay bin ya yakʼ jmaliytik sok ya yakʼ stseʼelil koʼtantik soknix ya jtatik sbujtsʼ koʼtantik ta jkuxlejaltik ta kʼajkʼal ini. Yame xjajch kilbeytik  skʼoplal jun jojkʼoyel te bayal ya smel yoʼtan yuʼun te ants winiketike.

6. ¿Bin yuʼun te ay bayal machʼatik ya yalik te maʼyuk skʼoplal ta yoʼtan Dios te wokoliletik ya xkʼax ta jtojoltike?

⁶ Ay bayal machʼatik te jich ya snopik-abi. Ay ya yalik teme yuʼun-nix ay jkʼoplaltik ta yoʼtan-a te Diose, yanwan yilel-a te jkuxlejaltik te jichuke. Melel te Balumilale nojel ta guerra, pʼajel sok te bintik ya yakʼ jwokoltike. Jpisiltik ya stsakotik chamel, ya xwoklajotik soknix ay machʼatik ya xlaj kuʼuntik. Jaʼ yuʼun ay machʼatik jich ya yalik: «Te yuʼunuknix ay jkʼoplaltik ta yoʼtan-a te Diose, ¿mabal yakuk slajin spisil te bintik ya yakʼ jwokoltike?».

7. 1) ¿Bin yuʼun ya yichʼ alel te ay bayal jpʼijubteswanejetik yuʼun te relijionetik ya yakʼbeyik snop te ants winiketik te malaj snaʼ yoʼbolil jbatik te Diose? 2) ¿Bin ya yakʼ ta nopel ta smelelil te Biblia ta swenta te wokolil ya xkʼax ta jtojoltike?

⁷ Te bin kʼax chopolxane, jaʼ te bitʼil bayal jpʼijubteswanejetik yuʼun te relijionetik te ya yakʼbeyik snop te ants winiketik te malaj snaʼ yoʼbolil jbatik te Diose. Jich bitʼil te ay bin ma lekuk ya xkʼot ta pasele ya yalik te jaʼlaj jich skʼanojel yoʼtan te Diose. Te kʼalal ya yalik-abi, jich kʼoem te jaʼ ya yakʼbeyik smulin Dios te bintik chopol ya xkʼot ta pasele. Jaʼukmeto ¿smelelilbal te bin ya yalike? ¿Bin ya yakʼ ta nopel ta smelelil te Bibliae? Jich ya yakʼbey sujtib te sjun Santiago 1:13: «Te machʼa ay ta sujel ta mulil, ma me scuy te ha ay ta sujel yuʼun Dios, como te Dios ma xhuʼ ya sujot ta mulil yuʼun, soc mayuc machʼa ya suj ta mulil». Jich yuʼun te Diose maʼyuk bin-ora jaʼ ya yakʼ xkʼot ta pasel te bintik chopol ya xkʼax ta Balumilale (kʼopona te sjun Job 34:10-12). Melelnix-a te ma skom te bintik chopol ya xkʼot ta pasel ta Balumilal te Diose, jaʼukmeto mame pajaluk sok te jaʼ ya yakʼ xkʼot ta pasel te bintik chopole.

8, 9. 1) ¿Bin yuʼun te kʼalal ma xyichʼ komel te bintik chopol ta pasele ma pajaluk sok te ay machʼa ya yakʼ xkʼot ta pasele? Cholbeya skʼoplal te bitʼil la yichʼ pajbeyel skʼoplale. 2) ¿Bin yuʼun te ma stojiluk te jaʼ ya kakʼbeytik smulin Dios te bitʼil maba smakojbey te schopol be te ants winiketike?

 ⁸ Nopa awaʼiy ta stojol jtul tatil te pʼij yoʼtan sok ay skʼuxul yoʼtan te ay ta sna jtul snichʼan te ayix yaʼbilale. Te kʼalal ya xjajch stoy sba te nichʼanil ini, ya snop ya xlokʼ bael ta sna, jaʼukmeto ma xyichʼ komel yuʼun te state. Te nichʼanil ini ya xjajch spas te bintik chopole jich ya schʼik sba ta kʼop. ¿Yabal xjuʼ ya kaltik te jaʼ smul te tatil te bitʼil la schʼik sba ta tulan kʼopetik te nichʼanile? Maʼuk (Lucas 15:11-13). Jaʼnix jich-euk te Diose maba smakojbey sbe te ants winiketik ta spasel te bintik chopole, jaʼukmeto maba ya skʼan ya yal-abi te jaʼ ya yakʼ xkʼot ta pasel te bintik chopol te Diose, melel jaʼnix ya sleik swokolik. Jich yuʼun ma stojiluk te jaʼ ya kakʼbeytik smulin Dios ta swenta spisil te wokolil te ya xkʼax ta stojol te ants winiketike.

⁹ Jaʼnax ya snaʼ stukel te Dios te bin yuʼun ma skomoj te ants winiketik ta stʼunel te chopol bee. Ta swenta te bitʼil jaʼ Jpaswanej kuʼuntik te ay yuʼel sok te pʼije, ma puersauk ya yakʼ jnaʼtik te bin yuʼun te jich ya xkʼot ta pasele. Jaʼukmeto ya yakʼ jnaʼtik stojol ta skaj te bitʼil kʼuxotik ta yoʼtane. Yatome kilbeytik lek skʼoplal ta sbuluchebal kapitulo te bin yuʼune. Jaʼukmeto yame xjuʼ ya smukʼulin awoʼtan te ma jaʼuk smul te Dios ta swenta te jwokoltike. Melel te Diose yakʼojbotik smukʼul koʼtantik te jaʼ ya schajpan te bintik ya yakʼ jwokoltike (Isaías 33:2).

10. ¿Bin yuʼun ya xjuʼ ya kakʼtik smukʼul koʼtantik ta stojol Dios te bitʼil jaʼ ya slajin spisil te wokolil te ay ta skaj te bintik chopole?

¹⁰ Jaʼnix jich chʼul Dios stukel (Isaías 6:3). Jaʼ ini ya skʼan ya yal te saknax yoʼtan stukel, te maʼyuk jxujtʼuk schopolil te Diose. Ta swenta-abi ya xjuʼ ya kakʼtik smukʼul koʼtantik ta stojol, te ma xjuʼ jich ya jpastik ta stojol te ants winiketike, melel ay ma tojuk ya spasik te yaʼtelike. Ni jaʼuk te ajwalil te toj ya spas te yaʼtele ya xjuʼ yuʼun schajpanel te  bintik ya spasik te chopol ants winiketike. Yan stukel te Dios te spisil ya xjuʼ yuʼune jaʼ ay ta skʼab slajinel spisil te wokolil te ay ta skaj te bintik chopol ya yichʼ pasele, yananixme slajin stukel-a. Te kʼalal ya sta yoraile, yame slajin ta jkʼaxel te chopolile (kʼopona te sjun Salmo 37:9-11).

11. 1) ¿Bin-utʼil ya yil Dios te bintik ma tojuk ta pasele? 2) ¿Bin-utʼil ya yaʼiy sba te Dios te kʼalal ya yil te ayotik ta wokole?

¹¹ ¿Bin-utʼil ya yaʼiy sba te Dios ta swenta te bintik yak ta kʼaxel ta Balumilal soknix ta jkuxlejaltike? Te Biblia ya yakʼ ta nopel te «cʼux ta yoʼtan te bin stojil ta pasel» (Salmo 37:28). Kʼax bayal skʼoplal ta yoʼtan teme ay bin lek yak ta kʼoel ta pasele sok ya yil te bintik chopole sok kʼaxemto ya yilay spisil te bintik ma tojuk ta pasele. Te Biblia ya yal te «tal scʼuxul ta yoʼtan» te Dios te kʼalal noj ta chopolil te Balumilal ta namey kʼinale (Génesis 6:5, 6). Sok maba yanajem yoʼtan te Diose (Malaquías 3:6). Maba yijkʼitayoj ta yilayel te bintik chopole soknix maba skomoj sba ta snaʼbeyel yoʼbolil sba te machʼatik ayik ta wokole. Te Biblia jich ya yal ta jamal: «Ayex ta canantayel yuʼun» (kʼopona te 1 Pedro 5:7).

12, 13. 1) ¿Bin yuʼun te ay chaʼoxchajp jtaleltik jich bitʼil te kʼuxul oʼtanile? ¿Bin-utʼil ya stij koʼtantik te kʼuxul oʼtanil ta swenta te wokoliletik te yak ta kʼaxel ta Balumilale? 2) ¿Bin yuʼun ya jnaʼtik te yananix slajin spisil-a te Dios te wokolil te ay ta Balumilale?

¹² ¿Bin yuʼun ya jnaʼtik ta lek te jkʼaxel ma smulan te Dios te kʼalal ya yil te ayotik ta wokole? Akʼa kilbeytik yan skʼoplal. Te Dios la spas te winik jichnix te bitʼil yilel stukele, melel jich ya yakʼ ta nopel te Bibliae (Génesis 1:26). Jich yuʼun, ta swenta te bitʼil ay lek jtaleltike jaʼ ta skaj te bitʼil jaʼ jich stalel te Diose. Ta swenta-abi, ¿yabal anaʼbey yoʼbolil sba te kʼalal ya awil te ayik ta wokol te ants winiketik te maʼyuk smulike? Teme kʼux ya awaʼiy te bintik ma tojuk ya yichʼ pasele, naʼame te kʼaxto jich kʼux ya yaʼiy stukel te Diose.

 ¹³ Te bin talelil ya yakʼxan ta ilel ta lek te ants winiketike jaʼ te kʼuxul oʼtanile. Ta swenta ini jich ya xchiknaj ta ilel te pajal jtaleltik sok te Jpaswanej kuʼuntike, melel jich ya yakʼ ta nopel te Biblia te «Jcʼuxul-oʼtanil stuquel te Diose» (1 Juan 4:8, XCD). Kʼux ya kaʼiy ta koʼtantik te yantike, melel te Diose jaʼnix jich kʼux ya yaʼiy ta yoʼtan te yantike. Te ayuk ta akʼab slajinel spisil te wokolil sok te bintik ma stojiluk ya yichʼ pasel ta Balumilale, ¿mabal jichuk te ya alajine? ¿Mabal jaʼuk te kʼuxul oʼtanil te ya stijbat awoʼtan ta slajinel te chopolile? ¡Jaʼ! Jich yuʼun ayukme ta awoʼtan te yananix yichʼ lajinel yuʼun Dios-a te wokoliletik ta Balumilale. Te bintik albil skʼoplal te ya xkʼot ta pasel te la kiltikix ta sjajchibal te libro ini mame lotiluk, yame xjuʼ ya jmaliytik, melel jaʼ jich yaloj te Diose, jich yuʼun yananixme xkʼot ta pasel yuʼun-a. Jaʼukmeto teme ya jkʼan ya kakʼtik schʼuunel koʼtantik ta swenta te bintik albil skʼoplale, yame skʼan te ya jnaʼbeytikxan sba ta lek te Dios te jaʼ albil yuʼune.

14. ¿Bin sbiil te Diose sok bin yuʼun te ya skʼan ya jtuuntesbeytike?

¹⁴ ¿Bin-a te nail ya awal te kʼalal ya akʼan te ay machʼa ya snaʼbat abae? ¿Mabal jaʼuk nail ya awalbey te abiile? Jich yuʼun, ¿aybal sbiil te Diose? Ay bayal relijionetik te ya yakʼik ta nopel te «Dios» o «Kajwal» te sbiile, jaʼukmeto ma biililuk stukel-abi. Jaʼ jich kʼoem te bitʼil ya yichʼ alel «ajwalil» o «presidente». Te Biblia ya yakʼ ta naʼel te ay bayal bin-utʼil ya yichʼ naʼbeyel sba te Diose, jich bitʼil «Dios» sok «Kajwal». Jaʼnix jich ya yakʼ ta nopel te bin sbiil te Diose: Jehová te sbiile. Ta Salmo 83:18 jich ya yal: «Acʼa snaʼic te ha Jehová te abihile, te haʼat atuquel te Machʼa toyol ayat ta stojol spahmal te qʼuinale». Teme ma xchiknaj sbiil te Dios ta aBibliae, yame kikʼatkotik ta yilel te apéndice yuʼun te libro ini, «Te bin-utʼil ta tuuntesel sok bin ya skʼan ya yal te sbiil Diose». Ta melel, te sbiil te Diose bayal mil buelta ya xchiknaj ta ilel ta junetik te la yichʼ tsʼibayel ta namey kʼinale. Jich yuʼun te Jehová ya skʼan te yakuk  anaʼbey te sbiile sok te yakuk atuuntesbeye. Te Diose jaʼ ya stuuntes te Biblia yuʼun jich ya anaʼbey sba-a.

15. ¿Bin ya skʼan ya yal te biilil Jehová?

¹⁵ Te biilil Jehová, te jaʼnix jich la sbiilintes sba te Diose, ay bayal ta chajp swentail te sbiile. Jaʼ ya skʼan ya yal te ya xjuʼ yuʼun spasel spisil te bintik yaloje sok te ya spas spisil te bintik ya skʼane. * Te sbiil te Diose jaʼnax ay ta swenta stukel te jich ya sbiiline. Ta melel, ay bayal swentail te bin yuʼun te maʼyuk machʼa ya xpajot yuʼun te Jehovae. Akʼa kiltik chaʼoxchajpuk.

16, 17. ¿Bin ya yakʼ jnoptik ta swenta te bin-utʼil naʼbil sba te Jehová jich bitʼil te: 1) «Machʼa bayel yuʼel»? 2) «Ajwalil te sbahtel qʼuinal ay»? 3) «Jpaswanej»?

¹⁶ Jich bitʼil la kiltikix ta Salmo 83:18 te jich ya yal ta swenta te Jehovae: «Haʼat atuquel te Machʼa toyol ayat». Jaʼnix jich, jaʼnax stukel te Dios «te Machʼa bayel yuʼel» (Lucas 1:49). Te bin ya skʼan ya yakʼ ta naʼel ini, jaʼ te maʼyuk machʼa ya xjuʼ xpajbot te yuʼele. Maʼyuk machʼa jich yuʼel te bitʼil yuʼel stukele. Ta 1 Timoteo 1:17 tey ya yichʼ alel ta swenta te Dios te jaʼ «Ajwalil te sbahtel qʼuinal ay», jaʼ ini ya yakʼbotik jnaʼtikxan te maʼyuk machʼa ya xpajot yuʼune, jaʼnax stukel te aynanix ta sbajtʼel kʼinal-ae. Ta Salmo 90:2 jich ya yal: «Stalel sbahtel qʼuinal haʼat Diosat atuquel». ¿Mabal jichuk te chajpnax ta aʼiyel-a te bitʼil aye?

¹⁷ Ayxan yan te bin yuʼun maʼyuk machʼa ya xpajot yuʼun te Jehovae, jaʼ te bitʼil jaʼnax Jpaswanej stukele. Ta Apocalipsis 4:11 jich ya yal: «Hich ya scʼan  te yac awichʼ awutsilal, ichʼel ta mucʼ, soc awuʼel, como haʼat la apas spisil bintic ay, soc ta scuenta scʼanojel awoʼtan cuxajtic soc la yichʼticlan pasel». Jaʼnax Jpaswanej stukel te Jehová ta swenta spisil te bintik aye, jich bitʼil te espirituetik te ayik ta chʼulchan te ma xjuʼik ta ilele, te ekʼetik te xlemetnax xojobilik ta chʼulchane, te sit teʼetike, te chayetik te ayik ta mar sok ta mukʼul jaʼetik sok te yantikxan bintik aye.

18. ¿Bin yuʼun te ay machʼatik ya skuyik te maʼyuk bin-ora ya xjuʼ ya xnoptsajik ta stojol te Diose, jaʼukmeto bin ya yakʼ ta nopel te Bibliae?

¹⁸ Ay machʼatik ya xiwik jtebuk te bitʼil maʼyuk machʼa  ya xpajbot te jayebto ta chajp stalel te Jehovae. Ya skuyik te maʼyuk bin-ora ya xjuʼ xnoptsajik ta stojol o te maniwan x-ichʼotik ta wenta ta jkʼaxele. ¿Lekbal te jich ya yichʼ nopel-abi? Te Bibliae yan bin ya yakʼ ta nopel stukel, melel jich ya yal ta swenta te Jehovae «ma ba namal ay ta jtojoltic» (Hechos 17:27). Jaʼnix jich te Biblia ya yikʼotik ta spasel ini: «Nohpojanic ta stojol Dios, hich ya xnohpoj ta atojolic» (Santiago 4:8).

19. 1) ¿Bin-utʼil ya xjuʼ xnoptsajotik ta stojol te Diose sok bintik lek ya jtatik yuʼun? 2) ¿Bintik talelil yuʼun Dios te ya yikʼbatxan awoʼtane?

¹⁹ ¿Bin ya skʼan ya apas yuʼun ya xnoptsajat ta stojol te Jpaswaneje? Jaʼ te ma xa akom aba ta spasel te bin yakat ta spasel ta ora ini, jich bitʼil te yakatix ta snopel ta swenta te Diose. Te Jesuse jich la yal: «Hich ay te cuxlejal sbahtel  qʼuinal: ha te ya snaʼbat aba, te haʼat mero Diosat atuquel, soc te ya snaʼbe sba te Jesucristo te ticombil tal awuʼune» (Juan 17:3). Jich bitʼil te ya yakʼ ta nopel te Bibliae, te snaʼbeyel sba te Jehová sok te Jesuse ya x-ikʼawan bael ta «cuxlejal sbahtel qʼuinal». La kiltikix te «Jcʼuxul-oʼtanil te Diose» (1 Juan 4:16, XCD). Jaʼukmeto aytoxan bayal ta chajp talelil yuʼun te Jehovae, spisil kʼax tʼujbilik sok ya yikʼbotik koʼtantik ta skʼayinel. Jich bitʼil ya yal te Biblia «te ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan» (Éxodo 34:6). Jaʼnix jich lek yoʼtan sok jpasperdon stukel (Salmo 86:5). Ya snaʼ maliywanej (2 Pedro 3:9). «Stalel jun yoʼtan» (1 Corintios 1:9.) Te kʼalal ya akʼopon bael te Bibliae, yame awil te bin-utʼil yakʼoj ta ilel te stalel te Jehová te tʼujbiliknaxe sok te ay yantikxan stalele.

20-22. 1) ¿Yabal smakotik ta snaʼbeyel sba te Dios te bitʼil ma xjuʼ ta ilele? Cholbeya skʼoplal te sujtibe. 2) ¿Bin ya xjuʼ ya yalbat sok slekil yoʼtanik chaʼoxtul ants winiketik, jaʼukmeto bin ya skʼan ya apas?

²⁰ Melelnix-a te ma xjuʼ ta ilel te Diose, melel jaʼ jun espiritu (Juan 1:18; 4:24; 1 Timoteo 1:17). Jaʼukmeto, te Bibliae ya scholbotik kaʼiytik te bin yilele. Jich bitʼil la yal te ajwalil David, te ya xjuʼ jich ya awal-euke «yuʼun ya quilbe stʼujbilal te Jehová» (Salmo 27:4; Romanos 1:20). Te kʼalal ya anopxan ta stojole, jichme ya xkʼot ta awoʼtan te yuʼun-nix ay-a te Jehovae, jichme kʼux ya awaʼiyxan ta awoʼtan sok nopol ya awaʼiy aba ta stojol.

²¹ Kʼunkʼunme ya xkʼot ta awoʼtan te bin yuʼun ya yalbotik te Biblia te akʼa kiltik jich bitʼil jTatik te Jehovae (Mateo 6:9). Ma jaʼuknax la yakʼbotik te jkuxlejaltik, jaʼ ya skʼan te akʼa jmulanbeytik yutsilale, jaʼ jich te bitʼil te meʼil tatiletik te ya skʼanik ta stojol te yal snichʼnabike (Salmo 36:9). Jaʼnix jich te Biblia ya yakʼ jnoptik te ya xjuʼ ya xkʼootik ta yamigo te Jehovae (Santiago 2:23). ¡Nopanax awaʼiy te ya xkʼoat ta yamigo te Jpaswanej yuʼun spisil te bintik ay ta Balumilal sok te bintik solem kʼaxel ta chʼulchane!

 ²² Te kʼalal ya anopxan lek ta swenta te Bibliae, ayniwan te machʼatik sok slekil yoʼtanik ya yalbat te yakuk awijkʼitay snopel te Bibliae. Ayniwan jich ya yalbatik ta skaj te ma skʼanik te ya ajel te bintik achʼuuneje. Jaʼukmeto mame xawakʼ te ay machʼa ya skomat ta snaʼbeyelxan sba te Diose, jaʼme te bin kʼax lek ya xjuʼ ya apase.

23, 24. 1) ¿Bin yuʼun te ma skʼan ya xkʼexawat ta sjojkʼoyel ta swenta te bin yakat ta snopele? 2) ¿Bin ya kiltik ta yan kapitulo?

²³ Yame awil te ay bintik ma xkʼot lek ta awoʼtan te kʼalal ya xjajchat ta snopel te Bibliae. Jaʼukmeto mame xkʼexawat ta skʼanel koltayel. Te Jesús la yal te jaʼ lek te pekʼeluk koʼtantik jich bitʼil te alaletike (Mateo 18:2-4). Ya jnaʼtik te spisil-ora ay bin ya sjojkʼoyik te alaletike. Te Diose jaʼ ya skʼan te ya atabey sujtib te jojkʼoyeletik awuʼune. Ta Biblia ya yalbey skʼoplal chaʼoxtul ants winiketik ta namey kʼinal te la skʼan la snaʼbeyik sba ta lek te Diose. Jaʼ ta swenta te la yoʼtantayik yilel ta lek te bin tsʼibaybil ta sJun te Diose sok la yilik ta lek teme yuʼun-nix smelelil-a te bin yakik ta snopel-ae (kʼopona te sjun Hechos 17:11).

²⁴ Te bin-utʼil ya xjuʼ ya jnaʼbeytik sba ta lek te Jehovae jaʼ te kʼalal ya jnoptik te bin ya yal te Bibliae, te jaʼ jun libro te ma spaj te yantik libroetike. ¿Bin-a te ma xpajot yuʼune? Yatome kiltik ta yan kapitulo.