TE JCHʼUUNJELOTIK yuʼun Cristoe ya skʼan ya jpasulantik te Snaʼojibal slajel te Cristoe, te jaʼnix jich naʼbil sba bitʼil «weʼelil [uchʼel] yuʼun Cajwaltique» (1 Corintios 11:20). ¿Bin yuʼun te bayal skʼoplal te ya skʼan pasele? ¿Bin-ora sok bin-utʼil ya skʼan pasel?

Jaʼnix te Jesucristo te la sjachbey jilel skʼoplal ta ajkʼabal te kʼin Pascua yuʼun te judioetik ta yaʼbilal 33 ta jkʼajkʼaleltik. Te kʼin Pascuae jaʼnax ya yichʼ pasel jun buelta ta jaʼbil ta skʼajkʼalel 14 yuʼun nisán (u yuʼun  skalendario judío). Ta u-abi jaʼ ya xjajch-a te kʼalal ya xkaj ta chiknajel te unin ue, te kʼalal kʼaxemix jun semana yuʼun-a te u yuʼun marzoe, tey-abi te judioetike ya yajtayik chanlajuneb kʼajkʼal, te kʼalal ya stsʼakaj-abi ya xjajch spasik te kʼin Pascua te kʼalal yakix ta ijkʼubel-a te kʼinale.

Ta ajkʼabal-abi, te Jesús la spas te kʼin Pascua sok te jpuk-kʼopetik yuʼune, ta patil la stikun lokʼel te Judas Iscariote, jich jajch spas te Weʼel Uchʼel yuʼun Kajwaltike. Te weʼel uchʼele, jaʼ la sjelolin jilel te kʼin Pascua yuʼun te judioetike, jich yuʼun jaʼnax jun buelta ta jaʼbil ya yichʼ pasel.

Ta sjun Mateo ya scholbey skʼoplal te bin kʼot ta pasele: «Te cʼalal yacalic ta weʼel a, te Jesús la stsac te pan, la yaʼbe bendición, la xetʼ soc la spucticlambe te jnopojeletic yuʼune, hich la yal: Tsaca, weʼanic; ha jbaqʼuetal ini, xchi. Soc la stsac te copa, la yalbe wocol Dios yuʼun soc la yacʼticlambe, hich la yal: Uchʼanic ta apisilic; ha jchʼichʼel ini yuʼun te yachʼil chapbil-cʼop, te ha ya yichʼ malel scuenta tsobolic yuʼun schʼayojibal mulil» (Mateo 26:26-28).

Ay machʼatik ya skuyik te Jesús lalaj skʼatpʼun ta sbakʼetal te pane soknix lalaj skʼatpʼun ta schʼichʼel te vinoe. Jaʼukmeto stalel ay-a te sbakʼetal Jesús te kʼalal la yakʼ kʼaxel te pane. Jich yuʼun, ¿yabal xjuʼ ta alel te yuʼun-nix jaʼ la sweʼbeyik-a te sbakʼetal sok la yuchʼbeyik schʼichʼel Jesús te jnopojeletike? Maʼuk, melel te yuʼunuk jich la yichʼ pasele jich kʼot te la sweʼbeyik sbakʼetal jtul winik sok la skʼaxuntayik te leyetik yuʼun Dios te jichuke (Génesis 9:3, 4; Levítico 17:10). Jich bitʼil la yal te Jesús ta sjun Lucas 22:20: «Ha nix hich te cʼalal laj yoʼtanic ta weʼel, la stsac te copa, hich la yal: Te copa ini ha te yachʼil chapbil-cʼop ta scuenta jchʼichʼel te ya yichʼ malel ta acuentahic». ¿Yuʼun-nixbal jaʼ kʼatpʼuj ta yachʼil chapbilkʼop-a te copa-abi? Maʼuk, melel te chapbilkʼope jaʼ jun trato, ma jaʼuk te ay bin ya xjuʼ ta tsakele.

Jich yuʼun te pan sok te vinoe jaʼnax jun señail kʼot. Te pane jaʼ señail kʼot te sbakʼetal te Cristo te maʼyuk smul stukele. Te Jesuse la stuuntes te xejtʼelul pan te jil yuʼun te kʼin Pascua te maba yichʼoj levadura o te maba pajubtesbile (Éxodo 12:8).  Te Biblia ya stuuntes te kʼopil levadura jich bitʼil señail mulil sok bin ma tojuk ta pasel. Jich yuʼun te pane jaʼ señail kʼot te sbakʼetal te Jesús te maʼyuk smul te la yakʼ ta lajele (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Te tsajal vinoe jaʼ señail kʼot te schʼichʼel Jesuse, te jaʼ yakʼbey yip te yachʼil chapbilkʼope. Te Jesús la yal te ya smal te schʼichʼel ta swenta «schʼayojibal mulil». Ta swenta-abi, ay ants winiketik te lek ya yichʼik ilel yuʼun te Jehovae sok te ya sjokinik te Jesús ta swenta te yachʼil chapbilkʼope (Hebreos 9:14; 10:16, 17). Yame xbajtʼik ta chʼulchan 144,000 ta tul j-abatetik te jun yoʼtan yakʼoj sbaik ta stojol te Dios, ta swenta te yachʼil chapbilkʼope. Tey ya x-ochik ta ajwalil-a sok ta sacerdoteil ta swenta skoltayel spisil te ants winiketike (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Machʼatiknax ya xjuʼ ya sweʼik te pan sok ya yuchʼik te vino te ya yichʼ tuuntesel ta swenta Snaʼojibal slajel te Cristoe? Jaʼnax ya xjuʼ ya sweʼik te machʼatik ochemik ta yachʼil chapbilkʼop, jaʼik te machʼatik ya xbajtʼik ta chʼulchan. Jaʼ te chʼul espiritu ya x-akʼbotik snaʼ ta yoʼtanik te tsabilik yuʼun ya xbajtʼik jich bitʼil ajwaliletik ta chʼulchan (Romanos 8:16). Jaʼnix ochem skʼoplalik ta chapbilkʼop yuʼun te Ajwalinel sok te Jesuse (Lucas 22:29).

Jich yuʼun, ¿bin ya spasik te machʼatik ya smaliyik kuxlejalil sbajtʼel kʼinal liʼ ta Balumilal te kʼalal pastajemix ta nichimal kʼinal-ae? Jich bitʼil la yal ta mantal te Jesuse, ya xbajtʼik ta tsoblej-euk ta swenta Snaʼojibal slajel te Cristoe, jich ya yakʼik ta ilel te bitʼil bayal skʼoplal ta yoʼtanik, manchukme maba ya sweʼ yuchʼik te bintik ya yichʼ kʼasesele. Te stestigotak Jehová ya spasik te Snaʼojibal slajel te Cristo jun buelta ta jaʼbil te kʼalal jaʼ yak ta jajchel-a te skʼajkʼalel 14 yuʼun nisán, jaʼ te kʼalal yakix ta ijkʼubel-a te kʼinale. Manchukme chaʼoxmilnax ta tul te ants winiketik te yakik ta smaliyel te ya xbajtʼik ta chʼulchane, spisil te jchʼuunjeletik yuʼun te Cristoe, kʼax bayal skʼoplal ta yoʼtanik spasel te snaʼojibal te slajele, melel ya xjuʼ ya snop ta yoʼtanik-a te bin-utʼil yakʼoj ta ilel te skʼuxul yoʼtan te Jehová Dios soknix te Jesucristoe (Juan 3:16).