1. ¿Bin yuʼun te la skʼan la yichʼ jaʼ jtul winik yuʼun Etiopiae?

«AY HAʼ liʼi, ¿bin ya smacon teme ya quichʼ haʼe?», jich la yal jtul winik yuʼun Etiopía ta sbabial siglo. Jtul jchʼuunjel te sbiilinej Felipe lajeltonax yoʼtan ta yakʼbeyel yil ta sJun Dios-a te yuʼun-nix jaʼ-a te Jesús te Mesiase. Te winik ini chajpnax la yil te bin la snope, jaʼ yuʼun la skʼan la yichʼ jaʼ (Hechos 8:26-36).

2. ¿Bin yuʼun ya skʼan te yakuk anopix te ya awichʼ jaʼe?

² Teme la anopix tal ta lek te yantik kapituloetik yuʼun te libro ini sok jtul testigo yuʼun Jehová, jichniwan ya xjuʼ ya ajojkʼoybey aba: «¿Bin ya smakon teme ya kichʼ jaʼe?». Lame anopix te bin jamal ya yal te Biblia ta stojol te ants winiketik te bitʼil ya xkuxinik ta sbajtʼel kʼinal ta Nichimal Kʼinale (Mateo 5:5; Apocalipsis 21:3, 4). Jaʼnix jich ya anaʼix te bin-utʼil ayik ta smelelil te machʼatik lajemikixe sok te smaliyel te chaʼkuxajele (Eclesiastés 9:5; Juan 5:28, 29). Ayniwanix bayal kʼajkʼal te jajchat ta bael  ta tsoblejetik yuʼun te stestigotak Jehovae sok laniwan awilix te jaʼik te machʼatik ayik ta smelelil relijione (Juan 13:35). Te binxan tulan skʼoplale, jaʼ te bitʼil yakniwanix ta mukʼubel te skʼuxul awoʼtan ta stojol te Jehová Diose.

3. 1) ¿Bin mantalil la yakʼ jilel te Jesuse? 2) ¿Bin-utʼil ya yichʼ akʼel te ichʼjaʼ yuʼun te j-abatetik yuʼun te Diose?

³ ¿Bin-utʼil ya xjuʼ ya awakʼ ta ilel te ya akʼan ya awakʼ aba ta abatinel ta stojol te Diose? Te Jesuse jich la yal ta mantal: «Bahanic, otsesahic ta jnopojel spisil te nacionetic, acʼticlambeyahic yichʼic haʼ» (Mateo 28:19). Jaʼnix te Jesús la yakʼbotik jilel ta ilel, melel la yichʼ jaʼ-euk. Jaʼnax yuʼun te ma jaʼuknax la yichʼ tsijtsinbeyel jaʼ ta sjol sok maba la yichʼ malbeyel ta sjol (Mateo 3:16). Te ichʼjaʼ te ya yichʼ alel ta tseltale, te bin-nix swentail ta griego kʼop-ae ya skʼan ya yal «mulel ta jaʼ». Jaʼ yuʼun te ichʼjaʼ ta swenta te j-abatetik yuʼun te Diose, ya yichʼik mulel ochel ta jaʼ skojtol te sbakʼetalike.

4. ¿Bin ya yakʼ ta ilel te kʼalal ay machʼa ya yichʼ jaʼe?

⁴ Spisil te machʼatik ya skʼan lek ya x-ayinik ta stojol te Jehová ya skʼan ya yichʼik jaʼ. Te kʼalal ay machʼa ya yichʼ jaʼe, ya yakʼ ta ilel ta komon sitil te yuʼun ya skʼan ya yakʼ sba ta abatinel ta stojol te Diose sok te ya smulan spasbeyel te skʼanojel yoʼtane (Salmo 40:7, 8). Jaʼukmeto, swenta ya xjuʼ ya kichʼtik jaʼ ayme bintik ya skʼan ya jpastik nailuk.

5. 1) ¿Bin-a te nail ya skʼan ya apas swenta ya xjuʼ ya awichʼ jaʼe? 2) ¿Bin yuʼun te tulan skʼoplal te tsoblejetik yuʼun te stestigotak Jehovae?

⁵ La awakʼix ta ilel te bin sbabial ya skʼan pasele. ¿Bin-a? Jaʼ te bitʼil yakat ta snaʼbeyel sba te Jehová Dios  sok te Jesucristoe, ta swentaniwan te nojptesel yakat ta yichʼel yuʼun te Bibliae (kʼopona te sjun Juan 17:3). Jaʼukmeto mame jaʼuknax-abi yatome xjuʼ ya anopxan bael. Te j-abatetik yuʼun te Diose ya skʼanik «te yacuc snojesbeyex ta awoʼtanic snaʼel bin ya scʼan yoʼtan» te Diose (Colosenses 1:9). Te tsoblejetik te ya spasik te stestigotak Jehovae ya xjuʼ ya skoltayatxan ta swenta ini. Jaʼ yuʼun tulan skʼoplal te manchuk ya achʼaye (Hebreos 10:24, 25). Teme spisil-ora ya xbaat ta tsobleje, yame xmukʼubxan te bintik ya anop ta stojol te Diose.

6. ¿Puersabal nail ya skʼan ya anaʼbey swentail te bin ya yal te Biblia swenta ya xjuʼ ya awichʼ jaʼ?

⁶ Swenta ya xjuʼ ya awichʼ jaʼ ma puersauk te spisil ya skʼan ya anaʼbey swentail te bin ya yal te Bibliae. Jaʼukmeto, julukme ta awoʼtan te etíope winike, manchukme  snaʼojbeyix chaʼoxchajp skʼoplal-a te bintik ya yalbey skʼoplal te sJun Diose, jaʼukmeto lato yichʼ koltayelxan (Hechos 8:30, 31). Jaʼnix jich-euk te jaʼate aytome bintik ya skʼan ya anopxan. Ta melel maʼyuk bin-ora ya xlaj awoʼtan ta snopel te bintik ay ta naʼel ta swenta te Diose (Eclesiastés 3:11). Swenta ya xjuʼ ya awichʼ jaʼ, ya skʼan ya anaʼbey swentail sok te ya achʼuun te bintik nail ya skʼan ya anaʼbey skʼoplal ta Bibliae (Hebreos 5:12). Yame skʼan ya xkʼot ta awoʼtan te bin-utʼil ayik te machʼatik lajemikixe sok bin yuʼun te ay bayal skʼoplal te sbiil te Diose sok te Ajwalinel yuʼune.

7. Kʼalal ya yichʼ nopel te Bibliae, ¿bin ya skʼan ya yichʼ akʼel ta ilel?

⁷ Ma tikʼuk-a te jaʼnax ya anaʼbey swentail te bintik ya yal te Bibliae, melel «teme mayuc schʼuhunel-oʼtanil, ma xhuʼ te lec yoʼtan Dios yuʼun» (Hebreos 11:6). Te Bibliae ya scholbey skʼoplal te bin la spasik chaʼoxtul swinkilel te antiguo lum Corinto te kʼalal la schʼam yaʼiyik te bintik cholbot yaʼiyik yuʼun te jchʼuunjeletike, «la schʼuhunic soc la yichʼic haʼ» (Hechos 18:8). Jaʼniwan jich ya apas-euk te jaʼate. Bayal ta tul te machʼatik ya snopik te Bibliae, ya yakʼ schʼuunel yoʼtanik te yuʼun-nix jaʼ lokʼem ta yoʼtan Dios-a te bin ya yal tey-ae. Jaʼnix jich ya yakʼ schʼuunel yoʼtanik te bitʼil ya xkʼot ta pasel te bintik yaloj te Diose sok te ya xjuʼ ta tael kolel ta swenta te bitʼil la yakʼ sba ta lajel te Jesuse (Josué 23:14; Hechos 4:12; 2 Timoteo 3:16, 17).

8. ¿Bin-a te ya stijbat awoʼtan ta yalel te bin anopojixe?

⁸ Te kʼalal ya xkʼubxan ta lek te schʼuunel awoʼtane, jichme maʼyuk bin ya skomat ta yalel te bintik anopojixe (Jeremías 20:9). Yame awil te bin-utʼil ya stijbat awoʼtan  ta yalbeyel skʼoplal te Diose sok te bintik snopoj ya spase (kʼopona te 2 Corintios 4:13).

9, 10. 1) ¿Machʼatik ya xjuʼ xjajch acholbey yaʼiy te smelelil kʼop yuʼun te Bibliae? 2) ¿Bin ya skʼan ya apas teme ya akʼan ya acholix skʼop Dios sok te stestigotak Jehová te chajpanbil ta lek yuʼunike?

⁹ Te bin-utʼil ya xjuʼ xjajch apase, jaʼ te yakuk acholbey yaʼiy sok slamalil awoʼtan te smelelil kʼop ta Biblia te jayeb machʼatik ay awuʼune, te awamigotake, te apatxujke sok te ajoʼtak ta aʼtele. Ta patil, yaniwan akʼan ya xlokʼat ta scholel skʼop Dios jich bitʼil ya spasik te stestigotak Jehová te chajpanbil yuʼunik ta leke. Te kʼalal ya xkʼot yorail-abi, albeya yaʼiy te Testigo te yak yakʼbelat anop te Bibliae. Teme tsʼakal ya yil te bin ya xkʼanbotate, yame yichʼ lebeyel skʼajkʼalel te bin-ora ya xjuʼ xkʼopojex sok chaʼtul ancianoetik ta kongregasion.

¹⁰ Jichme ya anaʼbeyxan sba ta lek chaʼoxtul ancianoetik, te jaʼik te machʼatik ya skanantayik te tuminchijetik yuʼun te Diose (Hechos 20:28; 1 Pedro 5:2, 3). Jaʼikme te machʼatik ya yilik teme kʼoemix ta awoʼtan te bintik nail ya skʼan ya anaʼbey skʼoplal ta Bibliae sok teme spisil achʼuunejixe, jaʼnix jich teme yakat ta spasel ta akuxlejal te bintik ya yal te Bibliae soknix teme yuʼun-nix ya akʼan ya x-ochat ta testigo yuʼun Jehová-ae. Teme jich la yilik-abi, yame yakʼbatik anaʼ te tsʼakal ay awuʼun te bin ya yichʼ kʼanel yuʼun ya x-ochat ta scholel skʼop Dios, manchukme mato awichʼojuk jaʼ, jichme ya xjuʼ ya achol skʼop Dios ta komon sitil.

11. ¿Bintikwan ya skʼan ya yijkʼitayik spasel te machʼatik ya skʼan ya scholikix te skʼop Dios ta komon sitile?

¹¹ Ay ya staik ta ilel te ancianoetik te yato skʼan ya sjeltayxan skuxlejal te machʼa ya skʼan ya scholix skʼop Dios ta komon sitile. Jich bitʼil te yaniwan skʼan ya yijkʼitay spasel te bintik muken ya spase. Jaʼ yuʼun-abi, te kʼalal mato x-ochat ta scholel skʼop Dios-ae, yame skʼan te  maba ya apasix te tulan muliletike, jich bitʼil te mulil ya spasbey sbaik ta sbakʼetalik te ants winiketike, te yakubel sok te stuuntesel drogaetike (kʼopona te 1 Corintios 6:9, 10; Gálatas 5:19-21).

12. ¿Bin yuʼun te tulan skʼoplal te ya jsujtes koʼtantike?

¹² Swenta ya xjuʼ ya awichʼ jaʼ, aytoxan bintik ya skʼan ya apas. Te jpuk-kʼop Pedro jich la yal: «Ha yuʼun suhtesa awoʼtanic soc suhtanic tal ta stojol Dios scuenta yuʼun ya yichʼ tupʼel amulic» (Hechos 3:19). Te kʼalal ay machʼa ya sujtes yoʼtan ta smelelile, kʼax ma lekuk ya yaʼiy sba yuʼun ta swenta te bintik spasoje. Jaʼukmeto ma jaʼuknax te machʼatik kʼayemik ta spasel tulan mulil te ya skʼan ya sujtes yoʼtanike, jaʼnix jich ya skʼan ya spasik-euk te machʼatik leknix jtebuk stalelike. ¿Bin yuʼun? Jaʼ ta swenta te bitʼil jpisiltik jmulawilotik sok ya jkʼantik te perdón yuʼun te Diose (Romanos 3:23; 5:12). Te kʼalal mato anopojuk-a te bin ya yal te Bibliae, ma anaʼojuk bin-a te skʼanojel yoʼtan te Diose. Jaʼ yuʼun maba ya apas ta akuxlejal-a te bintik pajal ay sok te skʼanojel yoʼtane, ¿mabal jichuk? Jich yuʼun tulanme skʼoplal te ya jsujtes koʼtantike.

13. ¿Bin smakoj te skʼatpʼunel kuxlejalile?

¹³ Te kʼalal la asujtesix awoʼtan-ae yame akʼatpʼun te akuxlejale. Jaʼ ini ya skʼan ya yal te ya sujtat tal ta be te banti atʼunoj-ae. Ta swenta-abi ya xjuʼ ya kiltik te ma jaʼuknax ya skʼan ya amel awoʼtan yuʼun te bintik apasoje, jaʼnix jich ya skʼan ya awijkʼitay te apokol kuxlejale. Ta yorail-abi, yame skʼan te awakʼojix ta awoʼtan spasel-a te bintik leke. Te sujtesel oʼtanil sok te skʼatpʼunel kuxlejalile, jaʼme te chaʼchajp ya skʼan pasel te kʼalal mato awichʼojuk jaʼ-ae.

14. ¿Binxan yan tulan skʼoplal ya skʼan ya apas te kʼalal mato awichʼojuk jaʼ-ae?

¹⁴ Te yanxan bin tulan skʼoplal ya skʼan ya yichʼ pasel te kʼalal mato kichʼojtik jaʼ-ae, jaʼ te ya kakʼ jbatik ta stojol te Jehová.

15, 16. ¿Bin ya skʼan pasel te kʼalal ya kakʼ jbatik ta stojol te Diose sok bin ya stijbotik koʼtantik ta spasel?

¹⁵ Te bin ya skʼan pasel te kʼalal ya kakʼ jbatik ta stojol te Jehovae, jaʼ te ya jkʼopontik ta smelelil te banti jamal ya kalbeytik te spisil-ora, te jaʼ ya kichʼtik ta mukʼ ta stukelnaxe (Deuteronomio 6:15, XCD). Jaʼukmeto, ¿bin yuʼun te jich ya skʼan pasel-abi? Akʼa jnop kaʼiytik te ay jtul kerem te ya yalbey jtul achʼix te ya skʼan ya snaʼbeyxan sbae. Te kʼalal ya yilbeyxan te lekil taleliletik yuʼune, jich ya xnitbotxan yoʼtan yuʼun. Te bin ya xkʼot ta pasele, jaʼ te bitʼil ya xkʼot yorail te ya yalbey te ya skʼan ya xnujpun soke. Jaʼnax yuʼun te yame staxan bayal yaʼtel yuʼun te kʼalal nujpunemix-ae. Jaʼukmeto te skʼuxul yoʼtan ta stojole jaʼme ya xtijbot yoʼtan ta spasel te bin kʼax tulan skʼoplal-abi.

¹⁶ Te kʼalal la jnaʼbeytikix sba sok te kʼuxix ta koʼtantik-a te Jehovae, jaʼme ya stijbotik koʼtantik ta spasbeyel te yaʼtel te bantito kʼalal ya xjuʼ kuʼuntike. Te machʼa ya skʼan ya stʼun te sNichʼan te Diose, jaʼ te Jesucristoe, ya skʼan ya slokʼes sba ta yoʼtan (Marcos 8:34). Jaʼ-abi, jaʼ te kʼalal ma jaʼuk ya kakʼ skomotik ta schʼuunbeyel smantal Dios ta swenta te bintik ya skʼan koʼtantik sok te bintik ya jkʼan ya jpastik ta jkuxlejaltike. Jich yuʼun-abi te kʼalal mato awichʼojuk jaʼ-ae yame skʼan te jaʼ ayix ta awoʼtan spasel ta akuxlejal te skʼanojel yoʼtan Jehovae (kʼopona te 1 Pedro 4:2).

17. ¿Bin yuʼun ay chaʼoxtul te ma skʼan ya yakʼ sbaik ta stojol te Diose?

¹⁷ Ay machʼatik ma skʼan ya yakʼ sbaik ta stojol te Jehová yuʼun ya xiwik ta spasel te bin kʼax tulan skʼoplal ini. Jaʼniwan ya sxiʼik te ya yichʼik ichʼbeyel ta wenta yaʼtelik yuʼun te Dios teme yakʼojix sbaik ta stojol-ae. Yaniwan skuyik te ya xjuʼ xchʼayik te jich ya yakʼbeyik smel yoʼtan te Jehovae, jaʼ yuʼun ma skʼan ya xyakʼ sbaik ta stojol.

18. ¿Bin ya stijbat awoʼtan te ya awakʼ aba ta stojol te Jehovae?

¹⁸ Te kʼalal ya xmukʼubxan te skʼuxul awoʼtan ta stojol te Jehovae, jaʼme ya stijbat awoʼtan te ya awakʼ aba ta stojol sok te ya apas tulan te ya akʼotes ta pasel te bin la awalbey ta stojole (Eclesiastés 5:4). Te kʼalal la awakʼix aba ta stojol te Diose, yaniwan akʼan te jich ya x-ayinat «te bin utʼil ya scʼan te Cajwaltic, [Jehová] te lecuc yoʼtan» yuʼune (Colosenses 1:10). Ta swenta te skʼuxul awoʼtan ta stojol te Diose jichme maba tulan ya awaʼiy spasel te skʼanojel yoʼtane. Jaʼniwan jich ya awal-euk te bin-utʼil la yal te jpuk-kʼop Juan: «Yuʼun chican te cʼux ta coʼtantic te Dios teme ya jchʼuhumbetic te mandariletic yuʼune. Ma ba wocol ta chʼuhunel te mandariletic yuʼune» (1 Juan 5:3).

19. ¿Bin yuʼun te ma skʼan ya axiʼ te ya awakʼ aba ta stojol te Diose?

¹⁹ Te Diose ma puersauk ya skʼan tojil ants winik te machʼa ya yakʼ sba ta stojole. Jaʼ yuʼun ya snaʼ te bantito kʼalal ya xjuʼ kuʼuntik spasel te aʼtelile sok te banti ma xjuʼ kuʼuntik spasele (Salmo 103:14). Jaʼme ya skoltayat, melel ya skʼan te lekuk ay te akuxlejale (kʼopona te sjun Isaías 41:10). Soknix teme jaʼ jkʼaxel ya smukʼulin awoʼtan te Jehovae, jaʼme «ya stojobtesbat te behetic awuʼun» (Proverbios 3:5, 6).

20. ¿Bin yuʼun te ya skʼan te ma jaʼukatnax ya anaʼ te la awakʼix aba ta stojol te Jehovae?

²⁰ Te kʼalal ya xkʼot ta awoʼtan te bin la kilbeytikix skʼoplale, yaniwan akʼan ya awakʼ aba ta stojol te Jehová ta swenta te kʼalal ya akʼopon ta atukelnaxe. Jaʼukmeto te machʼa yuʼun-nix kʼux ta yoʼtan-a te Diose aytome bin ya skʼan ya spas, jaʼ te ya yal jamale (Romanos 10:10). ¿Bin-utʼil ta pasel-abi?

21, 22. ¿Bin-utʼil ya xjuʼ ya awal ta jamal sok ya awakʼ ta ilel ta komon sitil te schʼuunel awoʼtane?

 ²¹ Albeya te coordinador yuʼun te jtsojb ancianoetik ta akongregasion te bitʼil ya akʼan ya awichʼ jaʼe. Jaʼme ya sle chaʼoxtul ancianoetik yuʼun ya awilbeyik skʼoplal bayal ta chajp jojkʼoyeletik ta swenta te bintik nail ya skʼan ya anaʼbey skʼoplal ta Bibliae. Teme tsʼakal ay awuʼun te bin ya awichʼ kʼanbeyel yuʼun te ichʼjaʼe, te ancianoetik yame yalbatik te ya xjuʼ ya awichʼ jaʼ ta mukʼul tsoblej te nopol  ya yichʼix pasele. * Te kʼalal ya x-ayin ichʼjaʼe, ya yichʼ kʼasesel jun discurso te banti ya yichʼ cholbeyel skʼoplal te bin swentail te ichʼjaʼe. Ta slajibal-abi, te machʼa yak ta yakʼel te discursoe ya spas cheb jojkʼoyeletik ta stojol te machʼatik ya yichʼik jaʼe, jich yuʼun yame skʼan tulan ya sjakʼik. Te kʼalal jich ya yichʼ pasel ini jichme ya yichʼ alel ta jamal ta komon sitil te schʼuunel oʼtanile.

²² Te ichʼjaʼe, jaʼme ya yakʼ ta ilel ta komon sitil te awakʼojix aba ta stojol te Diose sok te ochatix ta testigo yuʼun Jehovae. Te machʼatik ya yichʼik jaʼe skojtol ya yichʼik mulel ta jaʼ, jich ya yakʼik ta ilel te yakʼojix sbaik ta stojol te Jehovae.

23. ¿Bin ya skʼan ya yal te ichʼjaʼ «ta scuenta te Tatil, te Nichʼanil soc te Chʼul Espirítu[e]»?

²³ Te Jesús la yal te yalaj yichʼik jaʼ te jnopojeletik yuʼun «ta scuenta te Tatil, te Nichʼanil soc te Chʼul Espíritu» (Mateo 28:19). Jaʼ-abi ya skʼan ya yal te ya yichʼik ta mukʼ te yaʼtel yichʼoj te Jehová Diose sok te Jesucristoe (Salmo 83:18; Mateo 28:18). Jaʼnix jich ya yichʼik ta mukʼ te bin-utʼil ya x-aʼtej te chʼul espiritu yuʼun te Diose, te jaʼ yip te Diose (Gálatas 5:22, 23; 2 Pedro 1:21).

24, 25. 1) ¿Bin señail kʼoem te ichʼjaʼe? 2) ¿Bin jojkʼoyel ya yichʼ akʼbeyel sujtib?

²⁴ Te ichʼjaʼe mame jaʼuknax te ya amul aba ta jaʼe, melel te kʼalal jich ya apase jaʼ señail kʼoem te «ya xlajate», jaʼ-abi jaʼ te ya awijkʼitay jilel te apokol kuxlejale. Te kʼalal ya xlokʼat tal ta jaʼe, yame yakʼ ta naʼel te jaʼ ya apasix ta akuxlejal te skʼanojel yoʼtan te Jehovae. Mame skʼan ya xchʼay ta awoʼtan te jaʼ awakʼojix aba ta stojol te Jehová Diose,  mame jaʼuk ta swenta jun aʼtelil, jtul ants winik o jun organisasion. Te bitʼil awakʼojix aba ta stojol te Diose sok te la awichʼix jaʼe jaʼme sjajchibaltonax te bitʼil ya awamigoin te Diose sok te jich lek ya awil aba soke (Salmo 25:14).

²⁵ Jaʼukmeto te ichʼjaʼe mame yuʼunuk ya skʼan ya yal te yuʼun kolematixe. Te jpuk-kʼop Pablo jich la stsʼibay: «Ta scuenta xiwel soc nihquel aʼtelinahic spasel bin pasel ya scʼan te bin utʼil colemexixe» (Filipenses 2:12). Te ichʼjaʼe jaʼtonaxme sjajchibal te bitʼil la awakʼix aba ta stojol te Diose. Jaʼ yuʼun ay jun jojkʼoyel, ¿bin-utʼil ya xjuʼ te jun koʼtantik ya kakʼ jbatik ta stojol Dios ta spisil-orae sok te ya x-ayinotik ta skʼuxul yoʼtane? Te slajibal kapitulo yuʼun te libro ini ya yakʼbey sujtib te jojkʼoyele.