Te Jehová la spas jun tsʼumbil kʼinal ta jun lugar te Edén sbiile. Ta tsʼumbil kʼinal-abi ay nichimetik, teʼetik sok chambalametik. Ta patil, te Dios la spas te sbabial winik te Adán sbiile. La spas ta tsʼubil lum, ta patil la sjujchʼiybey sniʼ. ¿Yabal anaʼ bin kʼot ta pasel? ¡Kuxaj te winike! Te Jehová la yalbey te Adán te akʼa skanantay te tsʼumbil kʼinal sok te akʼa yakʼbey sbiil spisil te chambalametike.

Te Jehová ay bin mukʼ skʼoplal la yalbey te Adán. La yalbey: “Ya xjuʼ ya aloʼbey sit spisil te teʼetike, pero ay jpejt teʼ te ma xjuʼ ya aloʼbey sit, melel mukʼ skʼoplal. Teme ya aloʼe yame xlajat yuʼun”.

Ta patil, te Jehová la yal: “Ya xbajtʼ jpas te machʼa ya xkoltayot yuʼun te Adane”. Jaʼ yuʼun la yakʼ kʼubuk swayel te Adán, la stuuntesbey jchʼix sbakel smoch yuʼun ya spasbey te yiname, te Eva sbiile. Te Adán sok te Eva jaʼik te sbabial familiae. ¿Bin yaʼiyel la yaʼiy sba te Adán kʼalal la yil te  yiname? Kʼax tseʼel yoʼtan yuʼun te jich la yal: “¡Ilawil te bin la spas te Jehová sok te jchʼix sbakel jmoch! ¡Ayix yan jich bitʼil te joʼone!”.

Te Jehová la yalbey te Adán sok te Eva te ya xjuʼ sta bayal yal snichʼnabik swenta ya snojesik te Balumilale. La skʼan te tseʼeluk yoʼtan ya x-aʼtejik ta jun-nax swenta ya spasik ta nichimal kʼinal te Balumilale. Ya xkʼot ta jun tʼujbil parke, jich bitʼil te tsʼumbil kʼinal Edén. Pero ma jichuk kʼot ta pasel. ¿Bin yuʼun? Ya kiltik ta yan kapitulo.