Te Jehová Dios jaʼ Jpaswanej kuʼuntik. Jaʼ la spas spisil te bintik aye, te bintik ya xjuʼ ya kiltik sok te bintik ma xjuʼ ya kiltike. Kʼalal mato spasoj-a te bintik ya kiltik ta ora ini, la spas bayal ta tul chʼul-abatetik. ¿Yabal anaʼ machʼatik-a te chʼul-abatetike? Jaʼ j-abatetik yuʼun Jehová te pajal yilelik soke. Te joʼotik ma xjuʼ ya kiltik te Jehová, ni jaʼuk te chʼul-abatetik. Te sbabial chʼul-abat la spas te Jehová kʼot ta jkoltaywanej yuʼun. Te jkoltaywanej-abi, jaʼ la skoltay te Jehová ta spasel te ekʼetik, planetaetik sok te yantikxan biluketik. Jun planeta te la spase, jaʼ te Balumilal te banti nainemotik te kʼax tʼujbile.

Ta patil, te Jehová la schajpan te Balumilal swenta ya xjuʼ xkuxinik te chambalametik sok te ants winiketik. La yakʼ te ya xojobaj te kʼajkʼal ta Balumilal. Jaʼnix jich la spas te witstikil, te maretik sok te mukʼul jaʼetik.

¿Bin kʼot ta pasel ta patil? Te Jehová jich la yal: “Ya kakʼ chʼiuk yaxal jaʼmal, bikʼtal jaʼmal sok teʼetik”. Jich yuʼun te lumkʼinal kaj yakʼ bayal ta chajp sit teʼetik, bok-itajetik sok nichimetik. Jaʼnix jich te Jehová bayal ta chajp chambalametik la spas jich bitʼil te ya xwilik, ya xnuxik sok te ya stas sbaik ta lume. La spas tut chambalametik, jich bitʼil te tʼul sok la spas mukʼul chambalametik jich bitʼil te tsemen. ¿Bin chambalamil ya amulan te jaʼate?

Jich yuʼun te Jehová la yalbey te sbabial chʼul-abate: “Ya jpastik te winike”. Te ants winiketik ma pajaluk sok te chambalametik, melel te  ants winiketik ya xjuʼ ya schiknajtes biluketik, ya xkʼopojik, ya stseʼenik sok ya skʼoponik Dios. Ya skanantayik te Balumilal sok te chambalametik. ¿Yabal anaʼ machʼa-a te sbabial winike? Kiltik.