Te Ester jaʼ jtul judía-achʼix te yak ta kuxinel ta lum Susa te ay ta Persia. Ayix bayal jaʼbil te la yichʼ lokʼesel tal te sfamilia ta Jerusalén yuʼun te ajwalil Nabucodonosor. Jaʼ la yichʼ chʼitesel yuʼun te Mardoqueo te sprimoe, te jaʼ jtul j-abat yuʼun te ajwalil Asuero yuʼun Persia.

Te ajwalil Asuero la skʼan jtul yachʼil ajwalil ants. Jich yuʼun te j-abatetik yuʼune, la yikʼik tal te antsetik te kʼax tʼujbilik te ayik ta lume, tey ochem skʼoplal-a te Ester. Ta spisil te antsetik, te ajwalil jaʼ la stsa te Ester swenta ya x-och ta ajwalil. Te Mardoqueo la yalbey te Ester te maʼyuk machʼa ya yalbey te jaʼ judía-antse.

Jtul winik te bayal stoybail te Amán sbiile, jaʼ te jwolwanej yuʼun spisil te principaletik. Jaʼ la skʼan te spisiluk ya snijan sbaik ta stojole. Pero te Mardoqueo ma la spas stukel. Bayal ilin yuʼun te la skʼan smile. Kʼalal te Amán la snaʼ stojol te jaʼ judío-winik te Mardoqueo, ay bin la schap swenta ya smiltiklan spisil te judioetik ta lum-abi. La yalbey te ajwalil: “Te judioetik ya x-utsʼinwanik. Akʼa yichʼik milel ta spisilik”. Te Asuero jich la sut: “Pasa te bin ya akuy te lek ta pasele”. La yakʼbey permiso ta spasel jun ley. Te ley-abi ya yal te ya yichʼik milel te judioetik ta 13 skʼajkʼalel yuʼun te u adar. Pero te Jehová yak ta yilel spisil-abi.

Te Ester ma snaʼojuk ta swenta te ley-abi. Jich yuʼun te Mardoqueo la stikunbey jun kopia sok jich la yalbey: “Yame skʼan ya xkʼopojat sok te ajwalil”. Te Ester jich la sut: “Machʼauk-a te ya xbajtʼ yil te ajwalil teme maba ikʼbil yuʼune, ya yichʼ milel. Ayix 30 kʼajkʼal te maba kichʼoj ikʼel yuʼun te ajwalile. Pero ya xboon ta stojol. Teme ya stuch te sbaston te ajwalil ta jtojole, mame xlajon. Pero teme maba jich ya spase, yame xlajon”.

Te Ester bajtʼ ta yamakʼul sna te ajwalil. Te kʼalal ilot yuʼun te ajwalile, la sjach te sbaston ta stojol te Estere. Te Ester noptsaj  ta stojol te ajwalil sok jich jojkʼoybot: “¿Bin ya akʼan Ester?”. Jich la yal te Ester: “Ya jkʼan te yakuk xtalat sok te Amán ta kʼin te ya jpase”. Te kʼalal ayik ta kʼin-ae, la schaʼikʼtiklan ta yan kʼin. Te kʼalal ayik ta schebal buelta ta kʼine, te ajwalil la sjojkʼoybey yan buelta te Ester: “¿Bin-a te ya akʼane?”. Jich la yal te Ester: “Ay machʼa ya skʼan ya smilon sok te jlumale. Awokoluk, koltayawonkotik”. La sjojkʼoy te ajwalile: “¿Machʼa-a te ya skʼan ya smilate?”. Jich la yal te Estere: “Jaʼ te winik ini, te Amán te kʼax chopole”. Kʼax bayal ilin te Asuero te jich la yakʼ ta milel ta oranax te Amán.

Pero maʼyuk machʼa ya xjuʼ ya stupʼbey skʼoplal te ley la spas te Amán, ni jaʼuk te ajwalile. Jich yuʼun te ajwalil la yakʼ ta jwolwanej yuʼun principaletik te Mardoqueo sok la yakʼbey permiso ta spasel jun yachʼil ley. Ta ley-abi la yal te ya xjuʼ ya skoltay sbaik te judioetik te kʼalal ya yichʼik ochintayele. Ta 13 skʼajkʼalel yuʼun te u adar, te lum judío la stsalik te skontratak. Teyto-abi, te judioetik kaj snaʼulanik jujun jaʼbil te tsalawe.