Te Nabucodonosor la yikʼtiklan bael te principaletik yuʼun Judá ta Babilonia sok la yakʼbey ta skʼab te Aspenaz te machʼa ya swentain te j-aʼteletik. Jaʼnix jich la stikun ta leel keremetik te lekik ta ilel sok te ayuk spʼijilik ta yolil te principaletik-abi. Te keremetik-abi yame yichʼik pʼijubtesel oxeb jaʼbil swenta ya yichʼ tulan yaʼtelik ta Babilonia. Yame snopbeyik skʼop te babilonioetik, ta stsʼibayel soknix ta skʼoponel te junetike. Sok jaʼnix ya stuuntesik te weʼelil ya yichʼ akʼel ta smukʼul na te ajwalile. Te sbiil te chantul keremetike jaʼik: Daniel, Ananías, Misael sok Azarías. Pero te Aspenaz la sjeltiklanbey sbiil ta kʼopil babilonio: Beltsasar, Sadrac, Mesac sok Abed-nego. ¿Yabal akuy te ya xjuʼ ya yijkʼitayik Jehová ta skaj te pʼijubtesel ya yichʼike?

 Te chantul keremetik-abi ay ta yoʼtanik te ya schʼuunbeyik skʼop te Jehovae. Snaʼojik te maba lek te ya stuuntesik te weʼelil yuʼun te ajwalile, melel ay chaʼoxchajp te weʼeliletik-abi te jamal yaloj te Ley yuʼun te Jehová te ma xjuʼ ta tuuntesele. Jaʼ yuʼun la yalbeyik te Aspenaz: “Awokoluk, ma xa sujotik ta stuuntesel te weʼelil ya sweʼ te ajwalile”. Pero te Aspenaz jich la yaltiklanbey: “Teme maba ya xweʼex ta lek sok teme ay achamel ya yilex te ajwalile, yame smilon”.

Te Daniel ay bin la snop ta yoʼtan te ya spase. La yalbey te jkanan: “Awokoluk, akʼbotiknax bok-itajetik, sit awaltsʼunubil sok jaʼ kuchʼkotik ta lajunebnax kʼajkʼal. Ta patil ya apajotik sok te yantik keremetik te ya stuuntesik te weʼelil yuʼun te ajwalile”. Te jkanan lek la yaʼiy.

Kʼalal kʼax te lajuneb kʼajkʼale, te Daniel sok te oxtul yamigotake, jaʼ lekikxan ta ilel te bitʼil te yantik keremetike. Te Jehová kʼax tseʼel yoʼtan yuʼun, melel la schʼuunbeyik te skʼope. Soknix la yakʼbey spʼijil te Daniel swenta ya xkʼot ta yoʼtan te najalsitiletik sok te wayichiletike.

Kʼalal tsʼakaj te oxeb jaʼbil yuʼun te pʼijubtesele, te Aspenaz la yikʼtiklan bael te keremetik ta stojol te Nabucodonosor. Te ajwalil kʼopoj sok te keremetike pero la yil te jaʼ kʼax pʼijikxan te Daniel, Hananías, Misael sok te Azarías te bitʼil te yantik keremetike. Jich yuʼun jaʼ la stsatiklan yuʼun ya x-aʼtejik ta sna te ajwalil. Ta patil-abi, te ajwalil bayal buelta la skʼantiklanbey tsitsel ta swenta te bintik tulanik skʼoplale. Te Jehová jaʼ la yakʼtiklanbeyxan bayal spʼijilik te bitʼil yantik pʼijil winiketik yuʼun te ajwalil sok te machʼatik ya snaʼik spasel magia.

Te Daniel, Hananías, Misael sok te Azarías maba ayik ta slumal, pero maʼyuk bin-ora chʼay ta yoʼtanik te jaʼ yichʼojik ta mukʼ te Jehová. ¿Jaxan te jaʼate? ¿Yabal anaʼulan spisil-ora te Jehová manchukme maba ajokinej-a te ameʼ atate?