Te Jehová la stsa te Jeremías swenta ya xkʼot ta j-alwanej ta lum yuʼun Judá. La stikun ta scholel skʼop Dios ta stojol te ants winiketik ta lum-abi sok te ya yaltiklanbey te yakuk yijkʼitayik spasel te bin chopole. Pero te Jeremías jich la yalbey te Jehová: “Keremonto, ma jnaʼ bin ya kal ta stojol te ants winiketike”. Te Jehová jich la yalbey ta jamal: “Ma xiwat, joʼon ya jkoltayat sok ya kalbat te bin ya acholbey skʼoplale”.

Te Jehová la yalbey te Jeremías te akʼa stsob te ancianoetik yuʼun te lume, te yakuk swuy jun oxom ta stojolik sok te jich ya yaltiklanbey: “Jaʼnix jich ya xkʼot ta pasel ta stojol te Jerusalén”. Kʼalal jich la spas te Jeremiase, te ancianoetik bayal ilinik yuʼun. Jtul sacerdote te Pasur (Pasjur) sbiil la smaj te Jeremías sok la yakʼ ta jun jotbil teʼ, jaʼ te la stenbey jilel yok skʼab ta tablaetik. Te Jeremías maba juʼ stij sba sjunal ajkʼabal. Te Pasur la skoltay ta yan kʼajkʼal. Te Jeremías jich la yal: “Ma stsʼijkix kuʼun. Ma jcholix te skʼop Diose”. Pero ¿jichbal la spas? Maʼuk. Te Jeremías la snopxan ta lek sok jich la yal: “Te skʼop Jehová jich kʼoem bitʼil kʼajkʼ ta koʼtan. Ma xjuʼ ya jkom jba ta scholel te skʼop Diose”. Jich yuʼun te Jeremías maba la skom sba ta sjultesbeyel yoʼtan te ants winiketik.

Kʼax bael bayal jaʼbil, och jtul yachʼil ajwalil ta Judá. Te sacerdoteetik sok te lotil j-alwanejetik maba la skʼan yaʼiyik stojol te bin yak ta yalel te Jeremiase. Jaʼ yuʼun jich la yalbeyik te principaletik: “Te winik ini snujpʼ te ya yichʼ milele”. Te Jeremías jich la yal: “Teme ya amilonike, yame amilik jtul winik te maʼyuk smule. Jaʼnaxme yakon ta yalel te bin ya yalbon te Jehová, ma jaʼuk te bin ya skʼan koʼtane”. Kʼalal la yaʼiyik stojol te principaletike, jich la yalik: “Te winik ini ma snujpʼuk te ya yichʼ milele”.

 Te Jeremías maba la skom sba ta scholel skʼop Dios, jich yuʼun te principaletik kʼax bayal ilinik yuʼun te jich la skʼanbeyik te ajwalil te akʼa yakʼ ta milele. Te ajwalil la yal te ya xjuʼ ya spasbeyik chikan te bin ya skʼanike. Jich yuʼun la stsakik sok la schʼojik ochel ta poso te nojel ta ajchʼal swenta tey ya xlaj-a. Te Jeremías kʼunkʼun kʼub ochel ta ajchʼal.

Jich yuʼun, jtul kapitan yuʼun soldadoetik te Ebed-melec sbiile, la yalbey te ajwalil: “Te principaletik la schʼojik ochel ta jun poso te Jeremías. Teme tey ya kijkʼitaytik-ae, yame xlaj”. Te ajwalil la yalbey ta mantal te Ebed-melec te akʼa yikʼ bael 30 ta tul winiketik yuʼun ya slokʼesik te Jeremías ta poso. Te Jeremías maʼyuk bin komot yuʼun ta scholel te skʼop Diose. ¿Melel te ya akʼan te jichukat-euke?