Ta jun ajkʼabal, te ajwalil Nabucodonosor ay bin chajpnax la swayichin. Bayal la smel yoʼtan te ma och swayel yuʼune. La yikʼtiklan tal te machʼatik ya snaʼik spasel magia sok la yaltiklanbey: “Cholbonik te bin la jwayichine”. Jich la yalik: “Albotik te bin la awayichine”. Pero te Nabucodonosor jich la yaltiklanbey: “¡Maʼuk! Jaʼex ya awalbonik te bin la jwayichine, teme maba ya awalbonike, yame jmilex”. Jich la yalbeyik yan buelta: “Albotik te bin la awayichine, ta patil ya kalbatkotik te bin ya skʼan ya yale”. Jich la yal te ajwalile: “Awoʼtan ya aloʼlayonik. ¡Albonik te bin la jwayichine!”. Jich la sutik: “Maʼyuk jtuluk ta Balumilal te ya xjuʼ ya spas te bin yakat ta skʼanele. Ma xjuʼ ta pasel”.

Te Nabucodonosor kʼax ilinem-a te la stikun ta milel spisil te pʼijil winiketik ta lum. Jaʼnix jich kʼan smilik te Daniel, Sadrac, Mesac sok te Abed-nego. Pero te Daniel la skʼanbey tiempo te ajwalil. Jich yuʼun te Daniel sok te yamigotak la skʼoponik te Jehová ta skʼanbeyel koltayel. ¿Bin la spas te Jehovae?

Te Jehová la yakʼbey yil te Daniel ta najalsitil te swayich te Nabucodonosor sok la yalbey te bin swentaile. Ta yan kʼajkʼal, te Daniel bajtʼ skʼopon te j-abat yuʼun te ajwalil sok jich la yalbey: “Mame xa amilik jtuluk te pʼijil winiketike. Joʼon ya xjuʼ ya jcholbey skʼoplal te swayich te ajwalile”. Te j-abat la yikʼ bael te Daniel ta stojol te Nabucodonosor. Te Daniel jich la yalbey te ajwalile: “Te Dios ya yakʼbat anaʼ te bin ya xkʼot ta spasel ta pajel chaʼbeje. Te awayiche jaʼ ini: la awil jun mukʼul lokʼomba te pasbil ta oro te sjole, pasbil ta plata te stan sok te skʼabe, pasbil ta cobre te schʼujtʼ sok te yaʼe, pasbil ta hierro te yakane sok te yoke pasbil ta hierro te kapbil ta ajchʼal. Ta patil, lokʼ tal pʼij ton ta jun wits sok tulan jul smajbey yok te mukʼul lokʼombae. Wuy te lokʼomba sok tsʼubiltik jil, pujk bael ta oranax yuʼun te ikʼe. Te ton la skʼatpʼun sba ta mukʼul wits te la snojes spisil te Balumilale”.

 Ta patil jich la yal te Daniel: “Te wayichile jaʼme ya skʼan yal ini: te jolol pasbil ta oro jaʼme te wentainel awuʼune. Te bin pasbil ta plata jaʼ jun wentainel te ya xchiknaj te kʼalal kʼaxemix-a te awuʼune. Te cobre jaʼ yan wentainel te ya xchiknaj ta patil sok ya swentain swolol te Balumilale. Te yan wentainele bayalme yip ya xkʼot jich bitʼil te hierro. Ta slajibal yame xchiknaj jun wentainel te xatoj sbae, te xajtʼ tulan ya xkʼot jich bitʼil te hierro, te yane maʼyuk yip jich bitʼil te ajchʼale. Te ton te ya xkʼatpʼuj ta witse, jaʼme te Wentainel yuʼun te Dios te ya slajin spisil te yantik ajwaliletik sok sbajtʼelkʼinal ya xjil stukel”.

Te Nabucodonosor la skejan sba sok la snijan koel sjol ta stojol te Daniel sok jich la yal: “Te Dios awuʼun la yakʼbat anaʼ te wayichile. Maʼyuk yan dios jich bitʼil te Dios awuʼune”. Te ajwalil maba la smil te Daniel, te bin la spase jaʼ te la yakʼbey yaʼtel ta jwolwanej yuʼun spisil te pʼijil winiketik sok te ya swentain spisil te skʼinal Babilonia. ¿Labal awil te bin-utʼil sutbot skʼop yuʼun Jehová te Daniele?