Ta patil bael kʼalal la swayichin mukʼul lokʼomba te Nabucodonosor, la yakʼ ta pasel jun mukʼul lokʼomba te pasbil ta oro. La yakʼ ta spamlej yuʼun Dura sok la stsob spisil te ants winiketik te mukʼ skʼoplalike, tey ochem skʼoplalik-euk-a te Sadrac, Mesac sok Abed-nego. Te ajwalil la yal ta mantal: “Kʼalal ya awaʼiyik stojol te ya yichʼ tijel te kornetaetik, arpaetik sok gaita yame akejan abaik ta stojol te mukʼul lokʼombae. Yame yichʼ kastigo ta orno yuʼun kʼajkʼ te machʼa maba ya spase”. ¿Bin ya awal yuʼun? ¿Labal skejan sbaik te oxtul hebreoetik ta stojol te mukʼul lokʼombae? ¿Jaʼnaxbal la yichʼik ta mukʼ te Jehovae?

Jich yuʼun te ajwalil la yal te akʼa yichʼ tijel te musika. Spisil la skejan sbaik ta yichʼel ta mukʼ te mukʼul lokʼombae. Pero te Sadrac, Mesac sok te Abed-nego maba la yichʼik ta mukʼ stukelik. Ay chaʼoxtul winiketik te la staik ta ilele sok la yalbeyik te ajwalile: “Te oxtul hebreoetik ini maba yakik ta yichʼel ta mukʼ te lokʼomba awuʼune”. Te Nabucodonosor la stikun ta ikʼel te oxtul keremetike sok jich la yaltiklanbey: “Yame kalbeyex ta yan buelta swenta ya awichʼik ta mukʼ te lokʼombae. Teme maba ya apasike, yame awichʼik chʼojel ochel ta orno yuʼun kʼajkʼ. Maʼyuk jtuluk dios te ya skoltayex ta jkʼab”. Jich la sutbeyik: “Ma puersauk te ya awalxan te ya yichʼ pasele. Te Dios kuʼunkotik ya xjuʼ skoltayonkotik. Manchukme ma skoltayonkotik, mananix ya kichʼtik ta mukʼ-a te lokʼombae”.

Te Nabucodonosor bayal ilin yuʼun. La yaltiklanbey te swiniktak: “¡Toybeyaikxan skʼajkʼal jukeb buelta te ornoe!”. Ta patil, la stikun bael te soldadoetik yuʼun:  “Chukbeyaik yok skʼab te keremetik ini sok chʼojaik ochel tey-a”. Kʼax toyem skʼajkʼal-a te orno te kʼalal noptsajik te soldadoetike lajik yuʼun. Te oxtul hebreoetik chʼayik ochel ta kʼajkʼ. Ta patil te Nabucodonosor noptsaj bael ta orno sok la yil te ay chantul winiketik yakik ta beel ta yutil te orno, ma oxebukxanix. Bayal xiw yuʼun sok la sjojkʼoybey te jkoltaywanejetik yuʼun: “¿Mabal jichuk te oxtul keremetik la jchʼojtik ochel ta kʼajkʼe? Chantul yakon ta yilel, ¡te jtule, chʼul-abat yilel!”.

Te Nabucodonosor noptsajxan bael ta orno sok jich tulan awun: “¡Lokʼanik tal, j-abatetik yuʼun Dios te Toyol aye!”. Chamnax yoʼtanik yuʼun kʼalal la yilik te yakik ta lokʼel tal te Sadrac, Mesac sok te Abed-nego ta yolil te kʼajkʼ sok te maʼyuk bin pasbotik yuʼune. Maba kʼajkʼ te sbakʼetalik, stsotsil sjolik, skʼuʼ spakʼik ni jaʼuk te ay yikʼik ta chʼaile.

Te Nabucodonosor la yal: “¡Te Dios yuʼun Sadrac, Mesac sok te Abed-nego bayal yuʼel stukel! La stikun chʼul-abat ta skoltaylanel. Maʼyuk yan dios jich bitʼil te Dios yuʼunike”.

Te oxtul hebreoetik snopoj ta yoʼtanik te jun yoʼtan ya yakʼ sbaik ta stojol te Jehová, chikan te bin ya xkʼax ta stojolike. ¿Yabal akʼan te jun awoʼtan ya awakʼ aba-euke?