Sujtukotik cheʼoxebuk jaʼbil ta patil. Te Nehemías jaʼ jtul israel-winik te nain ta Susa, te ay ta Persia. Jaʼ j-abat yuʼun te ajwalil Artajerjes. Ta jun buelta, te sbankil yijtsʼin tal ta Judá, ay bin maba lek jul yalbey te Nehemías: “Te israeletik te sujtik bael ta Jerusalén maba lek kanantaybilik. Te tsʼajkʼetik sok te puertaetik yuʼun te lum te la sjinik te babilonioetike, maba yichʼoj chaʼpasel”. Bayal la smel yoʼtan yuʼun te Nehemías. Ya skʼan ya xkoltaywan, jich yuʼun la skʼopon Dios swenta ya x-akʼot bael yuʼun te ajwalil ta Jerusalén.

Ta patil bael, te ajwalil la yil te yak ta mel-oʼtan te Nehemías. La yalbey: “Maʼyuk bin-ora jich kilojat-a. ¿Bin ya apas?”. Te Nehemías jich la yal: “Te jlumal Jerusalén jinem, ¿bin-utʼil-a te ma jmel koʼtane?”. Te ajwalil la sjojkʼoy: “¿Bin ya xjuʼ ya jpas swenta ya jkoltayat?”. Ta oranax-abi, te Nehemías la skʼopon Jehová ta yoʼtan. Ta patil la yalbey: “Awokoluk, akʼawon bael ta Jerusalén yuʼun ya xbajtʼ jchaʼpas te tsʼajkʼetike”. Te ajwalil Artajerjes la yakʼbey permiso. Soknix la yakʼbey te bin ya xtuun yuʼun ta namal beel ya spase. Jaʼnix jich la yotses ta gobernador yuʼun Judá sok la yakʼbey bael teʼetik yuʼun ya yichʼ pasel-a te puertaetik yuʼun te lume.

Kʼalal kʼot ta Jerusalén te Nehemías, bajtʼ yil te bin-utʼil ay te tsʼajkʼetike. Ta patil, la stsob te sacerdoteetik sok te gobernadoretik, jich la yaltiklanbey: “Maba lek ta ilel. Yame skʼan ya x-aʼtejotik”. Te lume la yalik te akuerdo ayike, jich ochik ta schaʼpasel te tsʼajkʼetike.

Ay chaʼoxtul skontratak te israeletik te kajik ta labanel yuʼun sok jich la yaltiklanik: “Te tsʼajkʼ yakex ta spasele, ya xjin koel te yakuk xmo jkojtuk wax tey-ae”. Pero te j-aʼteletik maba la yichʼik ta wenta, maba la skom sbaik ta aʼtel. Kʼunkʼun kaj ta toyel moel yuʼunik te tsʼajkʼ sok tulanxan la stsak yip.

Jich yuʼun, bayal skontratak te talemik ta yantik lumetik la schap skʼopik ta yochintayel te Jerusalén ta oranax. Kʼalal la yaʼiyik stojol te judioetike bayal xiwik yuʼun. Pero te Nehemías jich la yal: “Mame xiwex. Sjokinejotik te Jehová”. La yakʼtiklan jkananetik swenta ya skanantay  te j-aʼteletike. Jich yuʼun te skontratakik ma juʼ yuʼunik yochintayel.

Te tsʼajkʼetik sok te puertaetike juʼ ta pasel ta 52 kʼajkʼalnax. Swenta ya spasbeyik skʼinul te aʼtelil te Nehemías la yikʼ tal te levitaetik ta Jerusalén. La schap ta cheb grupo te machʼatik ya xkʼayojinike. Te Esdras la yikʼ bael jun grupo, te Nehemías la yikʼ bael te yane. Moik bael ta eskalera ta Puerta yuʼun Slokʼib jaʼ. Ta patil, jujun grupo ochik ta beel ta jujunjejch ta sba te tsʼajkʼetik ta sjoyobal te Jerusalén. Yakik ta stijel te kornetaetik, platillo takʼin sok arpaetik, yakik ta skʼayojtayel te Jehová jaʼto kʼalal la sta sbaik ta templo. Te winiketik, antsetik sok alaletik la yakʼik chikʼbil majtʼanil ta stojol Jehová sok la spasik te kʼine. Kʼax tseʼelnax yoʼtanik te jich chiknaj ta namalto te skʼopike.