Ta patil bael, te Belsasar och ta ajwalil yuʼun Babilonia. Ta jun ajkʼabal, la spas mukʼul kʼin swenta ya xkʼotik jmil ta tul ants winiketik. Jaʼik te machʼa kʼax ichʼbilik ta mukʼ ta lum-abi. La stikun te j-abatetik yuʼun ta slokʼesel tal te basoetik te pasbil ta oro te la yichʼ lokʼ el tal te Nabucodonosor ta templo yuʼun Jehová. Te Belsasar sok te machʼa la yikʼtiklan ta kʼin la stuuntesik te basoetik sok la yichʼik ta mukʼ te diosetik yuʼunike. Ta oranax chiknaj skʼab jtul winik te kaj stsʼibay kʼopetik te ma xnaʼbaj swentail ta pajkʼ ta snail te kʼine.

Te Belsasar bayal xiw yuʼun. La yikʼtiklan tal te machʼatik ya snaʼik spasel magia sok jich la yaltiklanbey ta jamal: “Te machʼa ya yalbon te bin swentail te kʼopetik ini, jaʼme yoxebal winik te mukʼ skʼoplal ya xkʼot kuʼun ta Babilonia”. La spasik tulan ta snaʼbeyel swentail, pero maʼyuk machʼa juʼ yuʼun. Tey-abi kʼot te ajwalil ants sok jich la yal: “Jtul winik te Daniel sbiil la snaʼ yalbeyel skʼoplal te wayichiletik sok te chujkʼul kʼopetik yuʼun te Nabucodonosor. Jaʼ ya xjuʼ ya yakʼbat anaʼ te bin ya skʼan ya yal te kʼopetik ini”.

Te Daniel bajtʼ yil te ajwalil. Kʼalal kʼot ta stojole, te Belsasar jich la yal: “Teme ya xjuʼ awuʼun skʼoponel sok scholbeyel swentail te kʼopetik ini, yame kakʼbat jun ualil te pasbil ta oro sok ya xkʼoat ta yoxebal winik te mukʼ skʼoplal ta Babilonia”. Te Daniel jich la sutbey: “Ma jkʼan te ya awakʼbon jmajtʼane. Pero ya kalbat te bin ya skʼan ya yal te kʼopetik ini. Te atat Nabucodonosor, bayal la stoy sba, te Jehová la yakʼbey snop te pekʼel-oʼtanile. Te jaʼate anaʼojix spisil te bin kʼot ta stojol te atate, pero maba la awichʼ ta mukʼ te Jehová. La atuuntes te basoetik yuʼun te templo ta yuchʼel vino. Jaʼ yuʼun te Dios la stsʼibay te kʼopetik ini: MENE, MENE, TEKEL sok PARSIN. Jaʼ ya skʼan ya yal te ya yuʼuninik Babilonia te medoetik sok te persaetike sok ya awichʼ lokʼesel ta ajwalil”.

Jich yilel te maʼyuk machʼa ya xjuʼ yuʼunin te Babilonia. Te lum-abi joytaybil ta mukʼul tsʼajkʼetik sok ta mukʼul jaʼ. Pero ta ajkʼabal-abi, te  medoetik sok te persaetik la yochintayik te Babilonia. Te ajwalil Ciro yuʼun te persaetik, la sjelbey bael sbe te mukʼul jaʼ swenta ya xkʼotik te soldadoetik ta banti te mukʼul puertaetik yuʼun te mukʼul lume. Te kʼalal kʼotike, ¡jamal te puertaetike! Te soldadoetik oranax ochintaywanik, la yuʼuninik te lum sok la smilik te ajwalile. Jich yuʼun te Ciro jaʼ och ta ajwalil yuʼun Babilonia.

Ta sbabial jaʼbil te yak ta wentainwaneje, te Ciro la yal: “Te Jehová la yalbon te akʼa jchaʼpas te templo yuʼun ta Jerusalén. Te judioetik te ya skʼan ya xkoltaywanike, ya xjuʼ xbajtʼik”. Jaʼ yuʼun bayal ta tul sujt ta slumalik te kʼalal kʼaxemix 70 jaʼbil-a te la yichʼ lajinel te Jerusalene. Jich kʼot ta pasel te bin jamal yaloj Jehová te ya spase. Jaʼnix jich, te Ciro la sujtes spisil te basoetik te pasbil ta oro sok plata soknix te yantikxan biluketik te la slokʼes tal ta templo te Nabucodonosor. ¿Labal awil bin-utʼil te Jehová la stuuntes te Ciro swenta ya skoltay te lum yuʼune?