Ta parte ini ya xbajtʼ jkʼopontik te bintik ya yal te Escrituras Griegas Cristianas. Yame jnoptik bael te ayin te Jesús ta jun familia te maʼyuk lek stakʼinik te nainik ta jpam lume sok aʼtej sok te stat te jaʼ karpintero. Te Jesuse jaʼ ya xkʼot ta Jkoltaywanej yuʼun te ants winiketike. Te Jehová la stsa yuʼun jaʼ ya x-och ta Ajwalil yuʼun te Wentainel ta chʼulchane. Teme ay awal anichʼnabe koltaya yuʼun ya xkʼot ta yoʼtan te bin-utʼil te Jehová la stsa ta lek te machʼa ya xkʼot ta sfamilia te Jesús swenta lek ya xchʼi-a. Cholbeya yaʼiyik te kanantayot yuʼun Jehová te kʼalal kʼan milotuk yuʼun te Herodese. Maʼyuk bin ya xjuʼ xmakot te Jehová yuʼun ya skʼotes ta pasel te skʼanojel yoʼtane. Akʼbeyaik snop te bitʼil te Jehová jaʼ la stsa te Juan yuʼun ya schajpanbey sbe te Jesuse. Cholbeyaik ta lek te bitʼil ta yalalilto  te Jesús kʼux ta yoʼtan te pʼijilal yuʼun te Jehová sok la smukʼulin yoʼtan te tojobtesel yuʼun te Diose, ma jaʼuk te snopjibal yuʼune.