Te Juan jaʼ alnichʼanil yuʼun te Zacarías sok te Elisabet. Te Jehová la yakʼbey yaʼtel ta j-alwanej sok la stuuntes ta yalel te nopol ya xjulix te Mesiase. Pero maba la scholbey skʼoplal ta mukʼul lumetik o ta sinagogaetik, la spas ta jochol takin kʼinal. Bayal ta tul ants winiketik ta Jerusalén sok ta sjoyobal Judea, bajtʼ schʼam yaʼiyik te bin ya yal te Juane. La yal te akʼa yijkʼitayik ta spasel te bintik chopol yuʼun lek ya x-ilotik yuʼun-a te Diose, jaʼ te tseʼeluk yoʼtan yuʼunike. Jaʼ yuʼun bayal machʼa la sujtes yoʼtanik yuʼun te smulike sok akʼbotik yichʼik jaʼ yuʼun te Juan ta mukʼul jaʼ Jordán.

Te Juan maba la sle bayal sbiluk. Te skʼuʼe jaʼ te stsotsil kameyo sok la sweʼ kʼulubetik sok chab. Te ants winiketik la skʼan snaʼbeyik sba ta lek machʼa-a. Jaʼnix jich te jtoyba fariseoetik sok te saduceoetik la skʼan snaʼbeyik sba, jich bajtʼ yilik. Jich albotik yuʼun te Juane: “Yame skʼan ya asujtes awoʼtanik sok ya ajel te atalelike. Mukʼ akʼoplal ya akuy abaik, melel ya awalik te jaʼ yal snichʼnabex te Abraham, pero ma skʼan ya yal te jaʼ yal snichʼnabex te Diose”.

Bayal ants winiketik la sjojkʼoybeyik te Juan: “¿Bin ya skʼan ya jpastik swenta lek ya yilotik-a te Diose?”. Jich albotik: “Teme ay chaʼlijkʼ akʼuʼike akʼbeyaik jlijkʼuk te machʼa ya xtuun yuʼune”. ¿Yabal anaʼ bin yuʼun te jich la yale? Jaʼ la skʼan te yakuk xkʼot ta yoʼtanik te jnopojeletik yuʼune, ya skʼan te kʼuxuk ta yoʼtanik te ants winiketik swenta lek ya x-ilotik yuʼun-a te Diose.

Jaʼnix jich la yalbey te jkʼanpatanetike: “Mame xa awaʼiyik elekʼ sok mame ayuk machʼa ya aloʼlayik”. Sok jich la yalbey te soldadoetike: “Mame xa awalik lot sok mame xa atsakik takʼin yuʼun”.

 Te sacerdoteetik sok te levitaetik bajtʼ yilik-euk te Juan sok jich la yalbeyik: “Spisil te ants winiketik ya skʼan ya snaʼbat aba”. Te Juan la yal: “Joʼon te machʼa ya xkʼopoj ta jochol takin kʼinal te ya yalbey te ants winiketik te akʼa stʼunik te Jehová jich bitʼil la yal te j-alwanej Isaías”.

Te ants winiketik la smulanik te bin la yakʼ ta nopel te Juan sok bayal machʼatik la skʼan snaʼik stojol teme jaʼ te Mesiase. Jaʼ yuʼun te Juan jich la yal: “Te machʼa patil ya xtale, jaʼ bayalxan yuʼel. Sok maba ya xtuunon ta stilbeyel skʼab te stepe. Te joʼone jaʼnax ya kakʼbeyex awichʼik jaʼ, yan stukel ya yakʼbeyex awichʼik te chʼul espiritu”.