Te José, te María sok te Jesús soknix te yantik yal snichʼnabik, ayik ta nainel ta Nazaret. Te José ya x-aʼtej ta karpintero swenta ya smakʼlin te sfamilia. Jaʼnix jich ya yakʼtiklanbey snop ta swenta Jehová sok te Ley yuʼune. Te familia-abi kʼayemik te ya xbajtʼik ta sinagoga swenta ya yichʼik ta mukʼ Jehová tey-a sok te ya x-bajtʼik ta Jerusalén ta spasel te Pascua ta jujun jaʼbil.

Kʼalal ayix 12 yaʼbilal-a te Jesuse, te sfamilia bajtʼik ta Jerusalén jich bitʼil kʼayemik ta spasele. Te mukʼul lum nojel ta ants winiketik te jaʼnix jich kʼotik ta spasel te kʼin Pascua. Kʼalal laj yoʼtanik ta spasel te kʼin, te José sok te María jajchik ta namal beel yuʼun sujt ta snaik sok la skuyik te teynix ay euk-a te Jesús sok te yantik sfamiliae. Pero te kʼalal kaj sleike, maba la staik.

Jich yuʼun chaʼsujtik ta Jerusalén, oxeb kʼajkʼal la sleik te Jesuse. Kʼot staik ta templo. Nakal ta yolil maestroetik yuʼun te Leye, yak ta schʼamel yaʼiy te bin ya yalik sok yak ta spastiklanbeyel jojkʼoyeletik. Te maestroetik yuʼun te Ley chamnax yoʼtanik yuʼun ta swenta te bintik  ya yal te Jesuse, jich yuʼun jaʼ jajch spasbeyik jojkʼoyel, chamnax yoʼtanik yuʼun te sujtib ya yakʼe. Kʼot ta yoʼtanik te ya snaʼbey ta lek swentail te Ley yuʼun te Jehovae.

Te José sok te María bayal smeloj yoʼtanik. Te María jich la yal: “Kal, yak jlebelatkotik ta bayuk. ¿Banti ayat-a?”. Te Jesús jich la yal: “¿Yuʼunbal ma xa anaʼik te ya skʼan ya x-ayinon ta sna te jTate?”.

Te Jesús la sjokin sujtel ta Nazaret te smeʼ state. Te José la snojptes te Jesús ta aʼtelil yuʼun karpintero. ¿Bin ya anop yuʼun? ¿Binwan yilel-a te Jesús te kʼalal jchʼielto-ae? Te Jesús xkechkon ta chʼiel sok ta stael spʼijil. Sok xkechkon ta toyel te bitʼil kʼux ya x-aʼiyot yuʼun te Diose sok te ants winiketike.