Te ants winiketik te ayik ta jpam lum ta este yuʼun Israel ya schʼuunik-a te ya xtojobtesotik yuʼun te ekʼetike. Ta jun ajkʼabal, chaʼoxtul winiketik te talemik te banti ya xlokʼ tal te Kʼajkʼal la yilik ta chʼulchan te chiknaj jpʼij ekʼ te xlemetnax yak ta tilel sok ya stij sba, jich la stʼunik. Te “ekʼ-abi” la stʼunik bael jaʼto kʼalal ta Jerusalén. Te winiketik-abi la sjojkʼoylanik ta stojol te ants winiketik: “¿Banti ay te alal kerem te ya x-och ta ajwalil yuʼun te judioetike? Ya jkʼan ya jnijan jbakotik ta stojol”.

Te Herodes, ajwalil yuʼun Jerusalén, la yaʼiy stojol te ay yachʼil ajwalile. Bayal la smel yoʼtan sok la sjojkʼoybey te principal sacerdoteetik: “¿Banti ya x-ayin te ajwalil-abi?”. Jich la yalik: “Te j-alwanejetik la yalik te ya x-ayin ta Belén”. Jich yuʼun te Herodes la yikʼtiklan tal te winiketik te talemik te banti ya xlokʼ tal te Kʼajkʼale sok jich la yaltiklanbey: “Baanik ta Belén sok leaik te alal kereme. Ta patil, ya sujtex tal ta jtojol yuʼun ya awalbonik te banti aye, melel ya jkʼan ya jnijan jba ta stojol-euk”. Pero lotil-abi.

Te “ekʼe” kaj stij sba yan buelta, jich te winiketik la stʼunik bael jaʼto kʼalal ta Belén. Te “ekʼe”, la skom sba ta beel ta sba jun na, te winiketik ochik bael sok la staik te Jesús sok te smeʼe, te Mariae. La snijan sbaik ta stojol te alal kereme sok la yakʼbeyik smajtʼan jich bitʼil oro, pom sok mirra. Pero ¿yuʼun-nixbal jaʼ tikunbilik yuʼun Jehová-a te winiketik ta stojol te Jesuse? Maʼuk.

Ta ajkʼabal-abi, te Jehová la yalbey te José ta jun wayichil: “Te Herodes ya skʼan ya smil te Jesús. Ikʼa bael te awinam sok te anichʼane, baanik ta Egipto. Jilanik tey-a sok mame sujtex tal jaʼto kʼalal ya kalbeyex te maʼyukix-a te utsʼinele”. Jich yuʼun te José sok te sfamilia bajtʼik ta oranax ta Egipto.

Jaʼnix jich, te Jehová la yaltiklanbey te winiketik te talemik te banti ya xlokʼ tal te Kʼajkʼal te manchuk ya sujtik ta stojol Herodes. Kʼalal la snaʼ stojol te Herodes te maba sujtikix tal te winiketike, bayal ilin yuʼun. Jich bitʼil te ma juʼ yuʼun stael te Jesuse, la yal ta mantal  te akʼa yichʼ milel spisil te alal keremetik ta Belén te pajal yaʼbilalik sok te Jesuse. Pero maʼyuk bin la spasbeyik te Jesús, melel ay ta Egipto.

Kʼalal kʼax bael te jaʼbile, laj te Herodes. Jich yuʼun te Jehová la yalbey te José: “Maʼyukix utsʼinel. Sujtanikix tal”. Te José, te María sok te Jesús sujtik ta Israel sok jilik ta nainel ta Nazaret.