Ay jtul sacerdote te Zacarías sbiil, Elisabet sbiil te yiname, ayik ta nainel ta nopol Jerusalén. Ay kʼaxemix 400 jaʼbil jaʼto te kʼalal la schaʼpasik te tsʼajkʼetik yuʼun te Jerusalén. Te Zacarías sok te Elisabet bayal jaʼbil nujpunemikix, pero maʼyuk yal snichʼnabik. Ta jun buelta, kʼalal te Zacarías yak ta schikʼel pom ta chʼul awilal yuʼun te templo, chiknaj te chʼul-abat Gabriel ta stojol. Te Zacarías bayal xiw, pero te Gabriel la yal: “Mame xiwat. Ay bin tal kalbat te talem ta stojol Jehová. Te Elisabet te awiname, yame sta jtul alal, yame sbiilin Juan. Te Jehová jaʼ stsaoj te Juan yuʼun ya spas jun aʼtelil te mukʼ skʼoplale”. Te Zacarías la sjojkʼoy: “¿Bin-utʼil ya jnaʼ teme melel te bin ya awalbone? Te joʼon sok te kiname ayix kaʼbilaltik swenta ya jtatik jtul alal”. Te Gabriel jich la yal: “Te Dios jaʼ stikunejon tal ta yalel ta atojol te lekil kʼop ini. Jich bitʼil te ma la achʼuune, ma xjuʼ ya xkʼopojat jaʼto kʼalal ya x-ayin te alale”.

Te Zacarías jalaj ta chʼul awilal te maʼyuk jich spasoj-a. Te kʼalal lokʼ tale, te ants winiketik te yakik ta maliyel yuʼune ya skʼan ya snaʼik te bin kʼot ta pasele. Pero te Zacarías ma xjuʼ xkʼopoj, jaʼnax la spas seña. Jich yuʼun te ants winiketik la snaʼik stojol te ay bin la yichʼ albeyel yuʼun te Diose.

Ta patil bael, te Elisabet la sta yal, jich ayin te alal bitʼil la yal te chʼul-abate. Te yamigotak sok te sfamilia te Elisabet talik ta snaʼbeyel sba te alal sok tseʼelnax yoʼtanik ta stojol. Te Elisabet jich la yal: “Juan ya sbiilin”. Jich la sutik: “Maʼyuk machʼa jich sbiil ta afamilia. Jaʼ lek te Zacarías ya awakʼe jich bitʼil sbiil te state”. Pero te Zacarías la stsʼibay: “Juan te sbiile”. Ta oranax-abi, te Zacarías lokʼ skʼop ta yan buelta. Te alal pujk skʼoplal ta spamal Judea, te ants winiketik ya sjojkʼoybey sbaik: “¿Bin ya xbajtʼ spas te alal ini te kʼalal ya xchʼie?”.

Jich yuʼun te Zacarías noj ta chʼul espiritu sok la yal albilkʼop: “¡Kalbeytik yutsilal te Jehová! Melel la yalbey ta jamal te Abraham te ya stikun tal jtul jkoltaywanej, jaʼ te  Mesías, swenta ya skoltayotik. Sok te Juan jaʼ jtul j-alwanej te ya schajpanbey sbe te Mesiase”.

Jaʼnix jich ay bin mukʼ skʼoplal kʼot ta stojol jtul sfamilia te Elisabet jaʼ te María sbiile. Yame kiltik ta yan kapitulo.