Te kʼalal ayniwanix jun jaʼbil sok olil-a te yak ta scholel skʼop Dios te Jesuse, ay bin la spas te tulan skʼoplale. ¿Machʼatik la stsa yuʼun jun-nax ya x-aʼtejik sok te Jesús? ¿Sok machʼatik la stsa yuʼun ya swolik te kongregasion yuʼun te jchʼuunjeletike? Te kʼalal mato ayuk machʼa stsaoj-ae, te Jesús la sle koltayel ta stojol Jehová. Jaʼ yuʼun bajtʼ ta jun wits swenta stukel ya x-ayin tey-a sok sjunal ajkʼabal la skʼopon Dios. Ta sakubel kʼinal, te Jesús la stsob chaʼoxtul jnopojeletik yuʼun, tey la stsa-a te 12 ta tul jpuk-kʼopetik yuʼune. ¿Yabal anaʼbey sbiil ta jujuntul? Jaʼ sbiilik Pedro, Andrés, Jacobo (Santiago), Juan, Felipe, Bartolomé, Tomás, Mateo, Jacobo (Santiago) snichʼan Alfeo, Tadeo, Simón sok Judas Iscariote.

Te 12 ta tul winiketik la sjokinik ta beel te Jesús. Te Jesús la snojpteslan ta scholel te skʼop Dios, ta patil la stikunlan ta stukelik. Jaʼnix jich, te Jehová la yakʼtiklanbey yuʼel yuʼun ya slokʼesik chopol espirituetik sok te ya slekubtesik jchameletik.

Te Jesuse yamigotak la yil te 12 ta tul jpuk-kʼopetik sok la yakʼ smukʼul yoʼtan ta stojolik. Te fariseoetik la skuyik te maʼyuk bin  ya snaʼik te jpuk-kʼopetike. Pero te Jesús ma jichuk la yil stukel. La snojpteslan ta lek yuʼun ya spas te yaʼtelike. Ya sjokinik te Jesús ta yorail te bin ya xkʼot ta pasel ta skuxlejal te mukʼ skʼoplale. Jich bitʼil la sjokinik te kʼalal mato yichʼoj milel-ae sok te kʼalal chaʼkuxajemix-ae. Jteb ma spisilukik talemik ta Galilea jich bitʼil te Jesuse. Ay chaʼoxtulik te nujpunemike.

Te jpuk-kʼopetik maba tojil winiketik-a, jaʼ yuʼun ay banti chʼayik. Ay baeltik ma la snaʼik te bin la yalike sok ay la spasik te bin maba leke. Ma spisiluk-ora la snaʼik smaliyel. Jaʼnix jich ay la stij sbaik ta kʼop ta swenta te machʼa mukʼ skʼoplal ta yolilike. Pero kʼux la yaʼiy ta yoʼtanik te Jehová. Jaʼik te machʼatik kʼotik ta yiptajib te kongregasion te kʼalal maba ayix ta Balumilal-a te Jesuse.