Te kʼalal kʼaxemix-a te kʼin Pascua, te Jesús sok te jnopojeletik yuʼune sujtik ta Galilea. Kʼaxik ta Samaria sok la skux yoʼtanik ta stsʼeel te lum Sicar ta poso yuʼun Jacob. Te Jesús la skux jilel yoʼtan tey-a te kʼalal bajtʼik ta smanel weʼelil te jnopojeletik yuʼune.

Jtul ants tal ta slokʼesel jaʼ ta poso sok jich albot yuʼun te Jesuse: “Akʼbon jaʼ kuchʼ”. Te antse la sjojkʼoy: “¿Bin yuʼun te ya akʼoponone, melel samaritanaon? Te judioetik ma xkʼopojik sok te samaritanoetike”. Pero jich la yal te Jesús: “Te yakuk anaʼ machʼaon-ae, jaʼat ya akʼanbon jaʼ awuchʼ te jichuke, jaʼ ya kakʼbat awuchʼ te jaʼ yuʼun kuxlejalile”. Te ants jich la yal: “¿Bin ya skʼan ya yal te bin ya awale? Melel maʼyuk bin yak alokʼes tal-a te jaʼe”. Te Jesús la yalbey: “Te machʼa ya yuchʼ te jaʼ te joʼon ya kakʼbeye, maʼyuk bin-ora ya xtakijxan yoʼtan”. Te ants jich la yal: “Akʼbon kuchʼ te jaʼ-abi kajwal”.

Te Jesús la yalxan: “Albeya te amamlal te akʼa taluke”. Jich la sut: “Maʼyuk jmamlal”. Te Jesús la yal: “Melel te bin ya awale, melel joʼeb buelta nujpunemat, ta ora ini ayat sok jtul winik te maba nujpunemat soke”. Jich la yal te antse: “Ya kil te j-alwanejate. Te jlumale ya yal te liʼ ya skʼan ya kichʼtik ta mukʼ te Dios ta wits ini, pero te judioetik ya yalik te jaʼnax ya skʼan ichʼel ta mukʼ te Dios ta Jerusalén. Schʼuunej koʼtan te kʼalal ya xjul te Mesías, jaʼ ya snojptesotik bin-utʼil ya kichʼtik ta mukʼ te Diose”. Jich yuʼun te Jesús ay bin la yalbey te maʼyuk machʼa jich yalojbey-ae: “Joʼon te Mesiase”.

 Te antse animalnax bajtʼ ta slumal sok jich la yalbey te samaritanoetik: “Jich yilel te la jtaix te Mesiase. La yalbon spisil te bintik jpasoje. Laʼik sok ilawilik”. Jich yuʼun la sjokinik bael te ants ta poso swenta ya schʼam yaʼiyik te bintik ya yakʼ ta nopel te Jesuse.

Te samaritanoetik la skʼanbeyik te Jesús te yakuk xjil tey-ae. Jil cheb kʼajkʼal ta lum-abi sok bayal bintik la yakʼ ta nopel, bayal machʼatik la yakʼ schʼuunel yoʼtanik ta stojol. Ta patil jich la yalbeyik te samaritana: “Te kʼalal laj koʼtantik ta yaʼiyel te bin la yal te winik ini, la jnaʼtikix te jaʼnix-a te machʼa ya skoltay te machʼatik ayik ta Balumilale”.