Te Jesús juʼ yuʼun slekubtesel jchameletik sok schaʼkuxajtesel te machʼatik lajemikixe. Jaʼnix jich juʼ yuʼun skomel te ikʼ sok te jaʼale. Te kʼalal laj yoʼtan ta skʼoponel Dios ta witse, te Jesús la yil koel te mar yuʼun Galilea sok la yil tulan yikʼal jaʼal. Te jpuk-kʼopetik yuʼun yakik ta stijel jun barko sok spisil yipik ta yolil te tulan yikʼal jaʼale. Jich yuʼun te Jesús ko tal ta wits sok och ta beel ta ba jaʼ te banti ay te barkoe. Kʼalal te jpuk-kʼopetik la yilik te ay machʼa yak ta beel ta ba jaʼe, bayal xiwik yuʼun. Pero te Jesús la yal: “Joʼonme. Mame xiwex”.

Te Pedro la yal: “Kajwal, teme jaʼatnix-ae, albon te ya xboon ta atojole”. Te Jesús la yal: “¡Laʼ!”. Jich yuʼun te Pedro lokʼ ta barko, been bael ta ba jaʼ te banti ay te Jesús ta yolil te tulan yikʼal jaʼale. Pero te kʼalal yak ta noptsajel-a te Pedro ta stojol te Jesuse, la yil te yikʼal jaʼal sok xiw yuʼun. La yaʼiy te kaj mulel koel ta jaʼ sok jich awun: “¡Kajwal, koltayawon!”. Te Jesús la stsakbey skʼab sok la yalbey: “¿Bin yuʼun te chebaj awoʼtane? ¿Yuʼunbal maʼyuk schʼuunel awoʼtan?”.

Te Jesús sok te Pedro ochik ta barko, te tulan yikʼal jaʼale la skom sba ta oranax. ¿Yabal xkʼot ta awoʼtan te bin yaʼiyel la yaʼiy sbaik te jpuk-kʼopetike? La yalik: “Ta smelelil, jaʼatnix-a te sNichʼan te Diose”.

Ma junuknax buelta te jich la spas te Jesús te la skombey yip te bintik pastiklanbile. Ta yan buelta, kʼalal te Jesús sok te jpuk-kʼopetik yakik ta bael ta barko ta yan jejch mar, te Jesús kʼub swayel ta nopol yit te barkoe. Te kʼalal wayal-ae jajch tulan yikʼal jaʼal. Te yip te jaʼe ya smaj sba sok te barko, jich kaj ta nojel ta jaʼ. Te jpuk-kʼopetik bajtʼ stijik te Jesús: “¡Maestro, ya xlajotik! ¡Koltayawonkotik!”. La stejkʼan sba te Jesús sok la yalbey te mar: “¡Chʼaban! ¡Lamajan!”. Ta yorail-abi, te ikʼ sok te mar lamajik. Jich yuʼun te Jesús la sjojkʼoylanbey te jpuk-kʼopetik: “¿Yuʼunbal maʼyuk schʼuunel awoʼtanik?”. Jich talel kʼaxel la yalbey sbaik: “¡Ya xchʼuunbot skʼop yuʼun te ikʼ sok te mar!”. Te jpuk-kʼopetik kʼot ta yoʼtanik teme jaʼ ya yakʼ smukʼul yoʼtanik ta jkʼaxel ta stojol te Jesús, ma skʼan te ay bin ya xiʼike.