Te Juan jaʼ yak ta scholbeyel skʼoplal ini: “Ay machʼa nopol ya xjulix te jaʼ bayalxan yuʼel te bitʼil joʼone”. Te kʼalal ayniwan 30 yaʼbilal-a te Jesuse, jajch tal ta Galilea, tal ta mukʼul jaʼ Jordán. Tey yak ta yakʼbeyel yichʼ jaʼ-a te ants winiketik te Juane. Te Jesús la skʼanbey te Juan te yakuk x-akʼbot yichʼ jaʼe, pero te Juan jich la yal: “Te joʼone maba ya kakʼbat awichʼ jaʼ. Jaʼat ya awakʼbon kichʼ jaʼ te jichuke”. Te Jesús jich la yal: “Te Jehová jaʼ ya skʼan te jaʼat ya awakʼbon kichʼ jaʼe”. Jich yuʼun ochik ta mukʼul jaʼ Jordán, te Juan la smul koel skojtol ta jaʼ te Jesuse.

Kʼalal lokʼ tal ta jaʼ te Jesús la skʼopon te Jehová. Ta oranax-abi, jam te chʼulchan ko tal te schʼul espiritu jich bitʼil stsumut jul ta stojol. Te Jehová kʼopoj kʼalalto ta chʼulchan: “Jaʼ jNichʼanat te kʼuxat ta koʼtan. Jaʼat te bayal yutsil koʼtan ta atojol”.

Jich la yichʼ te espiritu yuʼun Jehová te Jesuse, jaʼ te bin-ora och ta Cristo o Mesías. Jich jajch spas te aʼtelil akʼbil yuʼun Jehová te ya spas ta Balumilale.

Te kʼalal yichʼbeltonax jaʼ-ae, te Jesús bajtʼ ta jochol takin kʼinal sok jalaj 40 kʼajkʼal tey-a. Te kʼalal sujt tale bajtʼ yil te Juan. Te Juan la yil te yak ta talel te Jesús sok jich la yal: “Jaʼ te Jkolel Tuminchij yuʼun Dios te ya schʼaybey smul te ants winiketik”. Jich la yal ta swenta skoltay te ants winiketik ta snaʼel te jaʼ Mesías te Jesuse. ¿Yabal anaʼ bin kʼot ta stojol te Jesús kʼalal ay ta jochol takin kʼinal-ae? Yame kiltik.