Te fariseoetik la slab oʼtantayik te Jesús sok la sleik bin-utʼil ya stsakik. La yalik te ma xjuʼ ya slekubtes jchameletik ta sábado, melel skʼajkʼalel kux-oʼtan. Ta jun sábado, te Jesús la yil jtul jtsʼoʼsit winik te yak ta skʼanel takʼin ta kaye. Jaʼ yuʼun jich la yalbey te jnopojeletik yuʼune: “Ilawilik bin-utʼil te yuʼel te Dios ya slekubtes te winik ini”. Jich te Jesús la swotsʼ ajchʼal sok yaʼlel ye. Ta patil la sjaxbey jtebuk ta sit te winik sok jich la yalbey: “Baan sok poka te asit ta tanke yuʼun Siloé (Siloam)”. Te winike la spas, jich la yil kʼinal ta sbabial buelta ta skuxlejal.

Te ants winiketik chamnax yoʼtanik yuʼun sok jich la yalik: “¿Mabal jaʼuk te winik ini te ya snajkan sba ta kʼanbajele? ¿O yanbal machʼa-a te pajal yilel soke?”. Jich la sut te winik: “Joʼon te machʼa jtsʼoʼsit ayine”. Jich jojkʼoybot yuʼun te ants winiketik: “¿Bin-utʼil jam te asite?”. Jich yuʼun la schol te bintik kʼot ta pasel ta stojole. Jaʼ yuʼun la yikʼik bael swenta ya scholbey yaʼiy te fariseoetik.

Te winik jich la yalbey te fariseoetike: “Te Jesús la sjaxbon ajchʼal ta jsit sok la yalbon te akʼa jpok lokʼele. Jich la jpas, jaʼ yuʼun ya kilix kʼinal”. Te fariseoetik jich jajch yalik: “Teme ya xlekubteswan ta sábado te Jesuse, maba talem ta stojol Dios te yuʼele”. Pero ay yantik te jich la yalike: “Teme maba talem ta stojol Dios te yuʼele, ¿bin-utʼil-a te ya xjuʼ ya slekubtes te jchameletike?”.

 Te fariseoetik la yikʼbeyik tal smeʼ stat te winike sok la sjojkʼoybeyik: “¿Bin-utʼil ay-a te ya xjuʼ ya yilix kʼinal te awal anichʼanike?”. Te smeʼ stat te winike ayik ta xiwel-a, melel te fariseoetike schapojik te ya slokʼesik ta sinagoga spisil te machʼa ya yakʼ schʼuunel yoʼtan ta stojol te Jesuse. Jich yuʼun la sutik: “Ma jnaʼkotik. Jojkʼoybeyaik”. Te fariseoetik la schaʼjojkʼoybeyik te winike, jich la sut: “La kalbeyexix spisil te bin ya jnaʼe. ¿Bin yuʼun ya akʼan ya awaʼiyikxan?”. Te fariseoetik ilinik yuʼun sok la stenik lokʼel.

Ta patil-abi, te Jesús bajtʼ yil te winik sok jich la sjojkʼoybey: “¿Aybal schʼuunel awoʼtan ta stojol te Mesiase?”. Te winik jich la sut: “Te yakuk jnaʼ machʼa-ae ya kakʼ schʼuunel koʼtan ta stojol te jichuke”. Te Jesús jich la yalbey: “Joʼon te Mesiase”. ¿Mabal jichuk te la yakʼ ta ilel slekil yoʼtan te Jesús ta stojol te jtsʼoʼsit winike? La slekubtes soknix la skoltay ta stael schʼuunel yoʼtan.