Te Jesús ay oxtul lekil yamigotak te nainemik ta Betania. Te sbiilik jaʼ Lázaro, María sok Marta, sbankil yijtsʼin sbaik ta yoxebalik. Ta jun buelta, te Jesús ay ta jejch mukʼul jaʼ Jordán-a, te María sok te Marta la stikunik ta albeyel ta oranax te Jesuse: “Te Lázaro ay ta tulan chamel. Awokoluk, laʼme ta ora”. Pero te Jesús maba bajtʼ ta ora. La smaliy cheb kʼajkʼal, ta patil la yalbey te jnopojeletik yuʼune: “Konik ta Betania. Te Lázaro wayal ya xbajtʼ jtij jajchel”. Te jpuk-kʼopetik la yalbeyik: “Teme wayalnax te Lázaro ya xlekub”. Jaʼ yuʼun te Jesús la yal ta jamal: “Lajemix te Lázaro”.

Te kʼalal kʼot ta Betania te Jesús, schanebalix kʼajkʼal ay ta mukenal-a te Lázaro. Bayal ants winiketik kʼot yakʼbeyik smukʼul yoʼtan te Marta sok te María. Te Marta la yaʼiy stojol te julix te Jesús, jich animalnax bajtʼ ta stojol. La yalbey: “Kajwal, te liʼuk ayat-ae maba laj te Lázaro te jichuke”. Te Jesús la yal: “Ya xchaʼkuxaj te Lazaroe. ¿Yabal achʼuun-abi, Marta?”. Te Marta jich la sut: “Jnaʼoj te ya xchaʼkuxaj ta yorail te chaʼkuxajele”. Jich yuʼun te Jesús la yalbey: “Joʼon chaʼkuxajelon sok kuxlejalon”.

Ta patil, te Marta bajtʼ yalbey te María: “Liʼ ayix te Jesuse”. Te María animalnax bajtʼ te banti ay te Jesuse, tʼunot bael yuʼun te ants winiketike. Te kʼalal kʼote, la skejan sba kʼoel ta yeʼtal yok sok maba kom ta okʼel. La yalbey: “Kajwal, te liʼuk ayat-ae maba laj te Lázaro te jichuke”. Te Jesús la yil te yak ta kʼaxel bayal swokol, jich kaj ta okʼel-euk. Te machʼatik tey ayik-ae la yilik te yak ta okʼel te Jesús sok jich la yalik: “Ta melel te Jesús yuʼun-nix kʼux ta yoʼtan-a te Lázaro”. Pero ay machʼatik jich la sjojkʼoybey sbaik: “¿Bin yuʼun maba la skoltay te yamigoe?”. ¿Bin ya spasix-a te Jesuse?

Te Jesús bajtʼ ta mukenal te jaʼ jutbil chʼen te makal yochibal ta mukʼul ton. Jich la yal ta mantal: “Lokʼesaik te tone”. Te Marta jich la yal: “Tuixniwan, melel kʼaxemix chaneb kʼajkʼal”. Manchukme jich-abi, la slokʼesik te tone sok la skʼopon Dios te Jesuse: “Jtat, ya kalbat wokol yuʼun te ya awaʼiybon te jkʼope”. Ya jnaʼ te spisil-ora ya awaʼiybon te jkʼop, pero tulan ya xkʼopojon yuʼun ya schʼuunik-a te machʼatik liʼ ayik te jaʼat la  atikunon tale”. Jich yuʼun tulan la yal: “¡Lázaro, lokʼan tal!”. Ta oranax, ay bin chajpnax kʼot ta pasel: Te Lázaro lokʼ tal ta smukenal bechʼtiklanbil yok skʼab ta pakʼ. Te Jesús la yal: “Lokʼesbeyaik te spojtsil sok akʼa bajtʼuk”.

Bayal machʼatik la yilik te bin kʼot ta pasele sok la yakʼ schʼuunel yoʼtanik ta stojol te Jesús, pero ay machʼatik bajtʼ yalbeyik te fariseoetik. Jaʼto ta skʼajkʼalel-abi, te fariseoetik la schapik te bin-utʼil ya smilik te Lázaro sok te Jesús. Te Judas Iscariote te jaʼ jtul jpuk-kʼop yuʼun te Jesús, muken bajtʼ ta stojol te fariseoetike: “¿Jayeb ya atojonik teme ya jkoltayex ta stael te Jesuse?”. Japbot 30 ta sejp plata, te Judas la stsak sok la sle bin-utʼil la yakʼ ta kʼabal te Jesuse.