Ta yaʼbilal 32 kʼalal junchebxanix kʼajkʼal ya skʼan pasel-a te Pascua, te jpuk-kʼopetik sujtik tal te banti xkʼotukik ta scholel te skʼop Dios. Kʼax lujbenik-a, jich yuʼun te Jesús la yikʼtiklan bael ta jun barko ta Betsaida yuʼun ya skux yoʼtanik. Kʼalal yakik ta noptsajel ta stiʼil te mare, te Jesús la yil te bayal ants winiketik tʼunotik bael yuʼun teyto-a. Te Jesús la skʼan te stukel ya x-ayin sok te jpuk-kʼopetik yuʼune, pero la yakʼ ta ilel slekil yoʼtan ta stojol te ants winiketike. La slekubteslan jchameletik sok bayal bintik la yakʼtiklanbey snop. La scholbey skʼoplal te Wentainel yuʼun te Dios ta sjunal kʼajkʼal. Ta tibiltik, te jpuk-kʼopetik jich la yalbeyik te Jesús: “Te ants winiketik bayalniwan swiʼnalik. Albeya te akʼa bajtʼukik ta sleel sweʼelik”.

Pero te Jesús la yal: “Ma puersauk te ya xbajtʼike. Akʼbeya sweʼelik te jaʼexe”. Te jpuk-kʼopetik jich la sjojkʼoybeyik: “¿Yabal akʼan te ya xboonkotik ta smanel pan yuʼun ya sweʼik?”. Te Felipe te jaʼ jpuk-kʼop-euke, jich la yal: “Manchukme bayal jtakʼintik, mananix xjuʼ kuʼunkotik smanel-a te pane, melel bayal te ants winiketike”.

Te Jesús jich la sjojkʼoylanbey: “¿Jayeb weʼelil ay kuʼuntik?”. Jich la sut te Andrés: “Ay kuʼuntik joʼpejch pan sok chaʼkojt chay. Pero ma tikʼuk-a, melel ay bayal ants winiketik”. Te Jesús la yal: “Ichʼbonik tal te panetik sok te chayetike”. Ta patil la skʼanbey te ants winiketik te akʼa sjujkan sbaik ta akiltik ta 50 sok 100 ta jujuntsojb. Jich yuʼun la stsak te panetik sok te chayetik, la yil moel te chʼulchan sok la skʼopon te Diose. Ta patil la yakʼtiklanbey te weʼelil te jpuk-kʼopetik swenta jaʼ ya spuktiklanbey  te ants winiketike. Te 5,000 ta tul winiketik weʼik jaʼto kʼalal noj schʼujtʼik soknix te antsetik sok te alaletike. Ta slajibal, te jpuk-kʼopetik la stsobik te sobrail weʼelil swenta ma xchʼay-a. ¡Noj 12 moch! ¿Mabal jichuk te chajpnax ta ilel-a te milagro la yichʼ pasele?

Te ants winiketik chamnax yoʼtanik yuʼun, jaʼ yuʼun la skʼan yotsesik ta ajwalil te Jesuse. Pero te Jehová mato skʼan te ya x-och ta ajwalil, melel mato yorailuk, te Jesús snaʼoj-abi. Jich yuʼun la stikunlan bael te ants winiketik sok la yaltiklanbey te jpuk-kʼopetik yuʼun te akʼa bajtʼukik ta jejch mar yuʼun Galilea. Jich bajtʼik ta barko, yan stukel te Jesús mo bael ta wits. ¿Bin yuʼun? La skʼan te ayuk stiempo ta skʼoponel te sTate. Te Jesús spisil-ora la slokʼes tiempo ta skʼoponel te Diose, manchukme bayal yaʼtel-a.