Te Jesús xtaluk ta Balumilal ta scholel te lek yachʼil kʼop yuʼun te Wentainel yuʼun te Diose. Jaʼnix jich, te Jehová la yakʼbey chʼul espiritu swenta ya spastiklan milagroetik sok te ya yakʼ ta ilel te bin ya xbajtʼ spas te kʼalal ya x-och ta Ajwalile. Te Jesús juʼ yuʼun slekubtesel te ants winiketik te yichʼojik biluk chamel. Chikan te banti bajtʼe kʼanbot koltayel yuʼun te jchameletike, spisil la slekubteslan. Te jtsʼoʼsitetik la yilik kʼinal, te jkojkʼchikinetik la yaʼiyik kʼop sok te machʼatik chamen yok skʼabik beenik. Ay jaʼnax la spikbeyik stiʼil skʼuʼ te Jesús, lekubik. Jaʼnix jich la slokʼeslan chopol espirituetik. Bayuk la yichʼ tʼunel yuʼun te ants winiketik, te Jesús maʼyuk machʼa la spʼaj, ni jaʼuk te kʼalal la skʼan te stukel ya x-ayin-ae.

Ta jun buelta, te banti ay-a te Jesús ikʼbot tal jtul winik te chamen yok skʼab. Ta swenta te bayal ants winiketik tey-a ma juʼ yuʼunik ochel, jich yuʼun la sjamik te sjol te na yuʼun tey ya skoesik-a te winike. Jich yuʼun te Jesús jich la yalbey: “Jajchan sok beenan”. Te kʼalal kaj ta beel te winike chamnax yoʼtanik yuʼun te ants winiketike.

Ta yan kʼajkʼal, te Jesús kʼot ta jpam lum sok ay 10 ta tul winiketik te yichʼojik kʼaʼel chamel la yawtayik te Jesús: “¡Jesús, koltayawonkotik!”. Ta kʼajkʼal-abi, te machʼatik yichʼojik kʼaʼel chamele ma xjuʼ xnoptsajik ta stojol te yantik ants winiketik. Jaʼnix jich, te Ley yuʼun te Jehová ya yal te ya skʼan ya xbajtʼik ta templo te kʼalal lekubenikix-ae. Jaʼ yuʼun te Jesús la yaltiklanbey te akʼa bajtʼukik tey-ae. Kʼalal yakik ta bael ta templo-ae, te winiketik-abi lekubik. Ay jtul te kʼalal la yil sba te lekubenixe, sujt bael ta yalbeyel wokol  te Jesús sok la yalbey yutsilal te Diose. Te 10 ta tul winiketike jaʼnax jtul la yalbey wokol te Jesuse.

Ay jtul ants te ayix 12 jaʼbil te ay ta chamel la skʼan te ya xlekube, melel ma stsʼijkix yuʼun te swokole. Jich yuʼun och bael ta yolil te ants winiketik noptsaj bael ta spat te Jesús sok la spikbey stiʼil te skʼuʼe. Ta oranax lekub te antse. Jich la sjojkʼoy te Jesuse: “¿Machʼa la spikon?”. Xiw te antse, noptsaj bael ta stojol te Jesús sok la scholbey yaʼiy spisil. Te Jesús la slamantesbey yoʼtan sok la yalbey: “Kantsil nichʼan, lamaluk awoʼtan ya xbaat”.

Jtul ajwalil te Jairo sbiil la skʼanbey wokol te Jesús: “Laʼ ta jna. Te kantsil nichʼan ay ta tulan chamel”. Te kʼalal mato xkʼot-a te Jesús ta sna te Jairoe, te tut achʼixe laj. Kʼalal kʼot te Jesuse la yil te bayal machʼatik yakik ta okʼel sok te sfamiliatak te tut achʼixe. Te Jesús jich la yal: “Ma x-okʼex wayalnax”. La stsakbey skʼab te tut achʼix sok la yalbey: “Tut achʼix, ¡jajchan!”. Te tut achʼix jajch ta oranax, jich te Jesús la yalbey te smeʼ stat te akʼa yakʼbeyik sweʼele. ¡Nopanax awaʼiy te bin yaʼiyel la yaʼiy sbaik te smeʼ state!