Spisil te bintik la spas te fariseoetike jaʼnax la spasik yuʼun te chajpnax ya x-ilotik yuʼun-a te yantike. Teme ay bin lek ya spasike, jaʼnax ya spasik yuʼun ya yichʼik ilel. Jich bitʼil, ya skʼoponik Dios te banti ay bayal ants winiketik yuʼun ya x-ilotik-a. Kʼax najtʼ te bitʼil ya skʼoponik te Diose sok snopoj ta yoʼtanik, jich ya yalulanik ta sinagogaetik soknix ta kayeetik swenta ya yaʼiy stojol-a te ants winiketik. Jaʼ yuʼun chajpnax la yaʼiyik-a te bin la yal te Jesuse: “Mame jichuk xa akʼoponik Dios bitʼil te fariseoetike. Ya skuyik te chajpnax ya x-ilotik yuʼun-a te Dios teme ya yalik bayal kʼopetik, pero ma jichuk. Te kʼalal ya akʼopon te Jehovae jaʼatnax yakʼat ta kʼop sok. Mame junuknax te bin ya awalulane. Te Jehová jaʼ ya skʼan te ya awalbey te bin yaʼiyel ya awaʼiy aba ta smelelile”.

Te Jesús la scholbeyxan skʼoplal te bin-utʼil ta kʼoponel te Diose:  “Jtatik te ayat ta chʼulchan akʼa yichʼ chʼultesel te abiile. Akʼa taluk te Wentainel awuʼune. Akʼa kʼotuk ta pasel skʼanojel awoʼtan ta Balumilal jich bitʼil yak ta pasel ta chʼulchan”. Te Jesús jaʼnix jich la yal te ya skʼan ya skʼoponik Dios ta swenta te sweʼelik yuʼun jujun kʼajkʼal sok skʼanel perdon yuʼun te smulik soknix yantik biluketik te ya xtuun yuʼunike.

Jaʼnix jich la yalxan te Jesús: “Mame ayuk bin-ora ya akom aba ta skʼoponel te Diose. Spisil-ora kʼanbeya Jehová te bin leke. Spisil te meʼil tatiletik ya smulanik yakʼbeyel te bin lek te yal snichʼnabike. Teme ya skʼanbat pan te anichʼane, ¿yabal awakʼbey pʼij ton sweʼ? Sok teme ya skʼanbat jkojt chay, ¿yabal awakʼbey chan sweʼ?”.

Jich yuʼun te Jesús la scholbey skʼoplal te bin ya xjuʼ ya jnoptik ta swenta te bin lajelto yalele: “Teme ya anaʼ yakʼbeyel lekil majtʼanil te awal anichʼnabike, ¡jaʼuktobalix-a te aTat Jehovae, yame yakʼbat te chʼul espiritue! Jaʼnax te bin ya skʼan ya apase, jaʼ te ya akʼanbeye”. ¿Yabal apas te bin la yal te Jesuse? ¿Bin ya akʼanbey Jehová te kʼalal ya akʼopone?