Ta patil te kʼalal laj te Jesuse, jtul jkʼulej winik te José sbiil la skʼanbey permiso te Pilato yuʼun ya yichʼbey bael sbakʼetal te Jesús te jipil ta jchʼix teʼe. Te José la spotsbey sbakʼetal te Jesús ta lekil pakʼ te pasbil ta lino, la stuuntes te bintik bujtsʼanax yikʼ sok la yakʼ ta jun yachʼil mukenal. Ta patil la yakʼ ta balchʼunel mukʼul ton swenta ya smakbey stiʼil-a te mukenale. Te principal sacerdoteetik la yalbeyik te Pilato: “Ya jmel koʼtantik yuʼun teme ay tal yelkʼanbeyik bael te sbakʼetal te Jesús te jnopojeletike sok teme ya yalik te chaʼkuxajixe”. Jich yuʼun te Pilato la yaltiklanbey: “Makaik ta lek te mukenal sok akʼaik jilel jkananetik tey-a”.

Oxeb kʼajkʼal ta patil, chaʼoxtul antsetik sabto bajtʼik ta mukenal. La yilik te ay machʼa la sbalchʼunix lokʼel te tone, jamalix te mukenale. Ta yutil te mukenal ay jtul chʼul-abat tey-a te jich albotik yuʼune: “Mame xiwex. Chaʼkuxajemix te Jesuse. Albeyaik te jnopojeletik te akʼa bajtʼukik ta Galilea yuʼun ya sta sbaik sok tey-a”.

Te María Magdalena bajtʼ sle ta oranax te Pedro sok te Juan. La yaltiklanbey: “Ay machʼa la yichʼbey bael sbakʼetal te Jesuse”. Te Pedro sok te Juan animalnax bajtʼik ta mukenal. Te kʼalal la yilik te jocholixe, sujtik bael ta snaik.

Ta patil, te María chaʼsujt bael ta mukenal. Ta yutil te mukenale la yil chaʼtul chʼul-abatetik sok la yaltiklanbey: “Ma jnaʼ te banti la yichʼbeyik bael sbakʼetal te Kajwale”. Te María la yil jtul winik sok la skuy te jaʼ te jkanantsʼunubile. La sjojkʼoybey: “Awokoluk, albon kaʼiy te banti la awakʼbey te sbakʼetale”. Pero te winik la yal: “¡María!”, la snaʼ ta oranax te jaʼ te Jesuse. Te María la yalbey: “¡Maestro!”, sok la sjojkʼan sba ta stojol. Te Jesús la yalbey: “Albeya te kermanotak te la awilonixe”. Te María animalnax bajtʼ sok la yaltiklanbey yaʼiy te jnopojeletik te la yilix te Jesuse.

Ta kʼajkʼalnix-abi, chaʼtul jnopojeletik te ayik ta Jerusalén bajtʼik ta Emaús. Kʼalal yakik ta beel-ae, jokinotik yuʼun jtul winik sok la sjojkʼoy bin-a te yakik ta yalbeyel skʼoplale. Jich la yalbeyik: “¿Yuʼunbal ma anaʼojuk? Ayix oxeb kʼajkʼal, te principal sacerdoteetik la yakʼik ta milel te Jesuse. Ta ora ini ay chaʼoxtul antsetik yakik ta yalel te kuxul te Jesuse”.  Jich jojkʼoybotik yuʼun te winike: “¿Yuʼunbal ma xa achʼuunik te bin ya yal te j-alwanejetike? La yalik te ya xlaj te Cristo sok te ya xchaʼkuxaj ta patile”. Cholbotikxan yaʼiy te bin ya yal te sKʼop Diose. Te kʼalal kʼotik ta Emaús la skʼanbeyik te yakuk xjokinotik jilel yuʼune. Ta weʼel uchʼel, te winik-abi la skʼopon Dios yuʼun te pane, jich la snaʼik te jnopojeletik te jaʼ te Jesuse. Ta patil sakchʼay bael.

Te chaʼtul jnopojeletik-abi animalnax bajtʼik ta Jerusalén. Kʼotik ta na te banti stsoboj sbaik te jpuk-kʼopetik sok la scholtiklanbey yaʼiyik te bin kʼot ta pasele. Te kʼalal tey ayik-ae, te Jesús chiknaj ta yolilik. Ta sjajchibal, te jpuk-kʼopetik ma la schʼuunik teme jaʼnix-a te Jesuse. Pero jich albotik yuʼun: “Ilawilik te jkʼabe, pikawonik. Jich tsʼibaybil jilel te ya yichʼ chaʼkuxajtesel te Cristo ta yolil te machʼatik chamenike”.