Te judioetik ya spasik te kʼin Pascua ta jujun jaʼbil ta 14 yuʼun nisán. Jich ya xjul ta yoʼtanik-a te la yichʼik akʼel ta libre yuʼun Jehová ta mosoinel ta Egipto sok te la yichʼik akʼbeyel te Kʼinal te Albil skʼoplal ya yichʼike. Ta jaʼbil 33, te Jesús sok te jpuk-kʼopetik la spasik te kʼin Pascua ta jun kuarto te ay ta schaʼkajal na ta Jerusalén. Kʼalal laj yoʼtanik ta weʼel uchʼel, te Jesús la yal: “Jtul ta awolilik yame yakʼon ta kʼabal”. Te jpuk-kʼopetik chajpnax la yaʼiyik-a sok la sjojkʼoyik: “¿Machʼa-a?”. Te Jesús la sut: “Jaʼ te machʼa ya kakʼbey jxejtʼuk te pan ini”. Jich la yakʼbey jxejtʼ pan te Judas Iscariote. Ta patil, te Judas lokʼ bael.

Ta patil te Jesús la skʼopon Dios, la sxetʼ te pan sok la spuktiklanbey te jpuk-kʼopetik yuʼun te jilik soke. Te Jesús jich la yaltiklanbey: “Weʼaik te pan ini. Jaʼ señail te jbakʼetal te ya kakʼ ta atojolike”. Ta patil, la skʼopon Dios ta swenta te vino, la skʼasesbey te jpuk-kʼopetik yuʼune sok jich la yaltiklanbey: “Uchʼaik te vino ini. Jaʼ señail te jchʼichʼel te ya jmal ta swenta tael perdon yuʼun te mulile. Yame kalbeyex ta jamal te yame ajokinonik ta mantalteswanej ta chʼulchan. Pasaik ini ta jujun jaʼbil ta swenta jnaʼojibal”. Ta jujun jaʼbil te jchʼuunjeletik yuʼun te Jesuse yato stsob sbaik ta fecha-abi te kʼalal yak ta ijkʼubel-a te kʼinale. Te tsoblej-abi jaʼ sbiil Weʼel Uchʼel yuʼun Kajwaltik.

 Te kʼalal laj yoʼtanik ta weʼel uchʼel, te jpuk-kʼopetik kaj stij sbaik ta kʼop ta swenta te machʼa mukʼ skʼoplal ta yolilike. Pero te Jesús la yaltiklanbey: “Te machʼa ya skʼan mukʼ skʼoplal ya xkʼot ta awolilike, yame skʼan te pekʼel ya yakʼ sba”.

Te Jesús jaʼnix jich la yaltiklanbey: “Te jaʼexe kamigoex. Jaʼ yuʼun ya kalbeyex spisil te bin ya skʼan te jTat te ya kalbeyexe. Jtebxanix ya skʼan ya sujton bael ta chʼulchan te banti ay te jTate. Pero te jaʼexe liʼ ya xjilex, te ants winiketike yame yilik te jaʼex jnopojelex kuʼun ta swenta te kʼux ya awaʼiy abaike. Ya skʼan te talel kʼaxel kʼux ya awaʼiy abaike jich bitʼil te kʼux la kaʼiyexe”.

Ta slajibal, te Jesús la skʼopon Jehová ta skʼanbeyel te akʼa skanantay te jnopojeletik sok te akʼa skoltaylan te junuknax ya x-aʼtejik sok lamalkʼinal. Jaʼnix jich la skʼan te akʼa yichʼ chʼultesbeyel sbiil te Jehová. Ta patil, te Jesús sok te jpuk-kʼopetik yuʼune la skʼayojtayik te Jehová sok lokʼik bael. Jtebxanix ya skʼan-a te ya stsakik te Jesuse.