Te principal sacerdoteetik la yikʼik bael te Jesús ta smukʼul na te gobernador. Tey-abi, te Pilato la sjojkʼoylanbey: “¿Bin smul ataojbeyik te winik ini?”. La sutik: “¡Ya yal te jaʼlaj ajwalile!”. Te Pilato la sjojkʼoybey te Jesús: “¿Jaʼatbal te ajwalil yuʼun te judioetike?”. Te Jesús la sut: “Te Wentainel kuʼune ma liʼuk ta Balumilal”.

Ta patil, te Pilato la stikun bael te Jesús ta stojol te Herodes, te jaʼ gobernador ta Galilea, swenta ya yil teme ya stabey smule. Te Herodes la yil te maʼyuk smul te Jesuse, jich la schaʼtikun ta stojol Pilato. Jich te Pilato la yalbey te ants winiketike: “Te joʼon sok te Herodes maʼyuk la jtabeytik smul te Jesuse. Ya kakʼ ta libre”. Pero te ants winiketik la yalik ta aw: “¡Akʼa yichʼ milel! ¡Akʼa yichʼ milel!”. Te soldadoetik la smajik ta chikote te Jesuse, la stubtayik sok la spujik ta majel. La yakʼbeyik scorona te pasbil ta chʼix sok jich la slabanik: “¡Talonme, ajwalil yuʼun te judioetik!”. Te Pilato la yalbey yan buelta te ants winiketike: “Ya kil te maʼyuk bin chopol spasoj te winik ini”. Pero te ants winiketik yakik ta aw: “¡Jijpana ta jchʼix teʼ!”. Jich yuʼun te Pilato la yakʼ ta kʼabal te Jesús yuʼun ya yichʼ milel.

Jich yuʼun la yikʼik bael te Jesús ta jpam kʼinal te Gólgota sbiile. La sjijpanik ta jchʼix teʼ, tey jipil la yijkʼitayik-a. Te Jesús la skʼopon te Jehová: “Jtat, pastiklanbeya perdon, melel ma snaʼik te bin ya spasike”. Te ants winiketike jich la yalik ta slabanel te Jesuse: “¡Teme sNichʼanat te Diose, koan tal te banti jipilat sok koltaya aba!”.

Jtul te chopol winik te jipil ta stsʼeel te Jesús la yal: “Naʼawon te kʼalal ya x-ochat ta Wentainwanej”. Jich jamal albot yuʼun te Jesuse: “Yame ajokinon ta Nichimal Kʼinal”. Ta tibiltik, ijkʼub kʼinal te jalaj oxeb orae. Ay chaʼoxtul jnopojeletik tey jilik ta stsʼeel te banti jipile, tey ay-a te María te smeʼ te Jesuse. Te Jesús la skʼanbey te Juan te yakuk skanantay te María jich bitʼil smeʼ.

Ta slajibal, te Jesús la yal: “¡Kʼotix ta pasel!”. La snijan koel sjol sok la yichʼxan ikʼ ta slajibal. Ta yorail-abi, tal tulan nijkʼel. Te mukʼul kortina yuʼun te templo te xatoj te Chʼul Awilal sok te Mero Chʼul Awilal la sjats  sba ta olil. Jich yuʼun jtul jwolwanej yuʼun soldadoetik la yal: “Melelnix-a te jaʼ sNichʼan Dios te winik ini”.