Kʼalal te Jesús ayto sok-a te jpuk-kʼopetik yuʼun ta kuarto te banti junxanix buelta weʼ uchʼike, jich la yaltiklanbey: “Apisilik yame awijkʼitayonik te ajkʼabal ini”. Te Pedro jich la yal: “Te joʼone ma jichuk ya jpas. Manchukme jich ya spas te yantike, te joʼone maʼyuk bin-ora ya kijkʼitayat”. Pero te Jesús jich la sutbey te Pedro: “Te kʼalal mato x-okʼ-a te tat mute, oxeb buelta ya awal te ma xa anaʼbon jbae”.

Kʼalal te soldadoetik la yikʼik bael te Jesús ta sna te Caifase, jteb ma spisiluk te jpuk-kʼopetik lokʼemikix ta anel-a. Pero ay chaʼtul te la stʼunik bael te ants winiketike. Te jtule jaʼ te Pedro. Och bael ta yamakʼul sna te Caifás sok noptsaj bael ta kʼajkʼ swenta ya skʼixnay sba. Ta swenta xojobil te kʼajkʼe, jtul sirbienta la snaʼbey sba te Pedro sok la yal: “¡Ya jnaʼbat aba! ¡Jaʼ ajoy te Jesuse!”.

Te Pedro la sut: “Maʼuk. Ma smeleliluk-abi. Ma xkʼot ta koʼtan te bin yakat ta yalele”, bajtʼ ta tiʼ puerta. Pero ilot yuʼun yan sirbienta sok jich la yalbey te yantike: “¡Te winik ini jaʼ sjokinej-a te Jesuse!”. Te Pedro jich la sut: “¡Jkʼaxel ma jnaʼ machʼa-a te Jesuse!”. Jaʼnix jich ay jtul winik jich la yal: “Jaʼat jnopojelat yuʼun. Chikan ta aʼiyel, jich ya xkʼopojat te bitʼil galileoetike, jich bitʼil te Jesuse”. Pero te Pedro jich jajch yal ta jamal: “¡Ma jnaʼbey sba te winike!”.

Ta yorail-abi, okʼ jkojt tat mut. Te Pedro la yil te yak ta ilel yuʼun te Jesús, jich jul ta yoʼtan te bin albot yuʼune. Lokʼ bael sok bayal la yokʼetay sba.

Kʼalal jich yak ta kʼoel ta pasel-abi, te Sanedrín stsoboj sbaikix ta sna-a te Caifás yuʼun ya yichʼik ta kʼop te Jesús. Te Sanedrín jaʼ tribunal yuʼun te jwolwanej yuʼun te relijionetike. Chapbilix yuʼunik-a te ya smilike jaʼxanix yakalik ta sleel te bin ya yakʼbeyik smuline. Pero ma la stabeyik. Ta slajibal, te Caifás la sjojkʼoybey te Jesús: “¿Jaʼatnixbal-a te sNichʼan te Diose?”. Te Jesús la sut: “Jaʼ, joʼon-abi”. Te Caifás la yal: “Ma xtuunix kuʼunkotik bayal prueba. ¡Bolkʼoptayel-abi!”. Pajal la schap skʼopik te tribunal sok jich la yalik: “Akʼa yichʼ milel te winik ini”. La smajbeyik scho,  la stubtayik, la smakbeyik sit, la spujik ta majel sok jich la yalbeyik: “¡Teme j-alwanejate ala kaʼiytik te machʼa la smajate!”.

Te kʼalal sakub te kʼinale, la yikʼik bael te Jesús ta yutil na te banti ay te Sanedrín sok jich la sjojkʼoybeyik yan buelta: “¿Jaʼatnixbal-a te sNichʼan te Diose?”. Te Jesús la sut: “Jaʼ. Jaʼexnix yakex ta yalel te joʼone”. Jich yuʼun la yakʼbeyik smulin te yak ta sbolkʼoptayel te Diose, jich la yikʼik bael ta smukʼul na te gobernador yuʼun Roma, te Poncio Pilato. ¿Bin kʼot ta pasel ta patil? Yame kiltik.