Te jpuk-kʼopetik la schʼuunik spasel te mantalil yuʼun te Jesús te ya skʼan ya scholbeyik skʼoplal te lek yachʼil kʼop yuʼun Dios ta swolol Balumilal. Ta jaʼbil 47, te hermanoetik ta Antioquía la stikunik bael te Pablo sok te Bernabé ta scholel skʼop Dios. Ta schebalik sok sbujtsʼ yoʼtanik la scholik skʼop Dios ta skʼinal Asia Menor, jich bitʼil ta Derbe, Listra sok Iconio.

Te Pablo sok te Bernabé la scholbeyik skʼop Dios spisil ants winiketik jich bitʼil jkʼulejetik sok pobreetik, jchʼieletik sok te machʼatik ayix yaʼbilalike. Bayal machʼatik la schʼuun te smelelil kʼop yuʼun te Cristo. Te Pablo sok te Bernabé jaʼnix jich la scholbeyik skʼop Dios te gobernador yuʼun Chipre te Sergio Paulo sbiile, pero kʼan yichʼik komel yuʼun jtul winik te ya snaʼ spasel magia. Te Pablo jich la yalbey te winike: “Te Jehová kontra ya yilat”. Ta oranax-abi, te winik te ya snaʼ spasel magia jtsʼoʼsit jil. Kʼalal la yil te gobernador Sergio Paulo te bin kʼot ta pasele, och ta jchʼuunjel.

Te Pablo sok te Bernabé la scholik skʼop Dios ta bayuk jich bitʼil ta nanatik, ta merkadoetik, ta beetik sok ta sinagogaetik. Ta jun buelta, la slekubtesik jtul koxo winik ta Listra. Te kʼalal la yilik te bin la spas te Pablo sok te Bernabé, la skuyik ta diosetik sok kʼan yichʼik ta mukʼ. Te Pablo sok te Bernabé ma la skʼanik ichʼel ta mukʼ, jich la yalik: “¡Jaʼnax ya skʼan ichʼel ta mukʼ te Diose! Te joʼonkotike, winikotiknax”. Kʼotik chaʼoxtul judioetik te la stijbeyik yoʼtan te ants winiketik ta skontrainel te Pabloe. Te ants winiketik la schʼojik ta ton te Pablo sok la sjochik lokʼel ta stiʼil te lum la skuyik te lajemixe. ¡Pero kuxul te Pabloe! Ta oranax kʼot chaʼoxtul hermanoetik ta skoltayel sok la yikʼik ochel ta lum. Ta patil, te Pablo sujt bael ta Antioquía.

 Ta jaʼbil 49, te Pablo bajtʼ ta yan buelta ta yilel te hermanoetik ta lum Asia Menor ta patil la scholbey skʼoplal te lek yachʼil kʼop yuʼun Dios kʼalalto ta skʼinal Europa. Bajtʼ ta Atenas, Éfeso, Filipos, Tesalónica sok yantikxan lumetik. Te kʼalal bajtʼe, jokinot yuʼun te Silas, Lucas sok jtul jchʼiel kerem te Timoteo sbiile. Jun-nax aʼtejik ta sjachel yachʼil kongregasionetik sok ta yakʼbeyel yip. Te Pablo jaʼnix jich jil jun jaʼbil sok olil ta Corinto swenta ya yakʼbey yip yoʼtan te hermanoetike. La schol skʼop Dios, pʼijubteswan sok la stsʼibay kartaetik ta stojol bayal kongregasionetik. Jaʼnix jich aʼtej ta spasel nail pakʼetik. Ta patil, te Pablo sujt bael ta Antioquía.

Ta patil bael, ta jaʼbil 52, te Pablo bajtʼ ta yoxebal buelta ta scholel skʼop Dios te jajch ta Asia Menor. Bajtʼ ta norte kʼalal ta Filipos, ta patil ko bael ta Corinto. Jaʼnix jich bayal jaʼbil jil ta Éfeso ta pʼijubteswanej, ta slekubtesel jchameletik sok ta skoltayel te kongregasionetike. Sok la yakʼ discursoetik ta komon sitil ta jujun kʼajkʼal ta jun eskuela. Bayal machʼatik la schʼuunik te bin la yale sok la sjel te skuxlejalike. Te kʼalal bayuk la scholix-a te lek yachʼil kʼop yuʼun te Diose, te Pablo sujt ta Jerusalén.