Te kʼalal kʼaxemix lajuneb kʼajkʼal sujtel bael ta chʼulchan-a te Jesuse, te jnopojeletik la yichʼik chʼul espiritu. Ta yorail Kʼin Pentecostés ta yaʼbilal 33, bayal ta tul ants winiketik talemik ta yanyantik lum kʼotik ta Jerusalén swenta ya spasik te kʼine. Ayniwan 120 ta tul jnopojeletik yuʼun Jesús te stsoboj sbaik ta jun kuarto te ay ta schaʼkajal na, ta oranax ay bin chajpnax kʼot ta pasel. Chiknaj kʼajkʼ ta sba sjolik ta jujuntul te jnopojeletike, ta spisilik jajchik ta kʼop ta yanyantik kʼopiletik. Jaʼnix jich, ay bin xjuʼet tal jich bitʼil tulan ikʼ ta yutil te nae.

Te ants winiketik te talemik ta yanyantik nasion te kʼoemik ta Jerusalene, te kʼalal la yaʼiyik stojol te ay bin xjuʼetnaxe, animalnax bajtʼik ta yilel te bin yak ta kʼoel ta pasele. Chamnax yoʼtanik yuʼun te kʼalal la yaʼiyik te ya xkʼopojik ta yanyantik kʼopiletik te jnopojeletike. Jich la yalik: “Te ants winiketik ini talemik ta Galilea, ¿bin-utʼil-a te ya xkʼopojik ta kʼopil te ya xkʼopojotike?”.

Jich yuʼun te Pedro sok te yantik jpuk-kʼopetik la stejkʼan sbaik ta stojol te ants winiketike. Te Pedro jich la yal: “Jaʼex la amilik te Jesús, pero te  Jehová la schaʼkuxajtes. Ta ora ini te Jesús ayix ta chʼulchan ta swaʼel kʼab te Diose. Sok la yakʼbotikix te chʼul espiritu te yalojbotik ta jamal te ya yakʼbotike. Jaʼ yuʼun la awilik sok la awaʼiyik stojol te milagroetik ini”.

Chamnax yoʼtan yuʼun te ants winiketike. Te bintik la yal te Pedro tijbot yoʼtanik yuʼun, jaʼ yuʼun la sjojkʼoyik: “¿Bin ya skʼan ya jpastik?”. Jich la yal: “Sujtesa awoʼtanik yuʼun te amulik sok ichʼaik jaʼ ta swenta sbiil te Jesuse. Ta patil yame awichʼik-euk te chʼul espiritu te jaʼ jun majtʼanile”. Ayniwan 3,000 ta tul ants winiketik la yichʼik jaʼ ta kʼajkʼal-abi. Jaʼto-abi, kaj ta pʼolel te jnopojeletik ta Jerusalén. Te jpuk-kʼopetik la sjachik bayal kongregasionetik ta swenta te chʼul espiritue. Jich juʼ yuʼunik snojptesel te machʼatik ochik ta jnopojel te bintik la yal ta mantal te Jesuse.