Te yoxebal buelta te lokʼ bael ta scholel skʼop Dios te Pablo, tsʼakaj yuʼun ta Jerusalén. Tey la yichʼ chukel-a. Ta jun ajkʼabal, te kʼalal ay ta karsel-a te Pablo, ay bin albot yuʼun te Jesús ta najalsitil: “Ya xbaat ta Roma sok ya acholbey skʼop Dios te lume”. Jich yuʼun la yikʼik bael te Pablo ta Cesarea. Tey la yichʼ chukel cheb jaʼbil-a. Ta jun buelta, te kʼalal ay ta tribunal ta stojol te ajwalil Festo, te Pablo la skʼanbey: “Jaʼ ya jkʼan te ya schajpanon te César ta Roma”. Te Festo la yal: “La akʼan te ya schajpanat te César, ta stojol César ya xbaat”. Jaʼ yuʼun te Pablo la yikʼik bael ta barko te ya xbajtʼ ta Roma. Jokinot bael yuʼun chaʼtul hermanoetik jaʼ te Lucas sok te Aristarco.

Te kʼalal ayik ta mar-ae, makalik jilel ta yolil tulan yikʼal jaʼal te jalaj cheʼoxeb kʼajkʼale. La skuyik te ya xlajike. Pero te Pablo la yaltiklanbey: «Winiketik, jtul chʼul-abat la yalbon ta jun wayichil: “Mame xiwat. Yame xkʼoat ta Roma sok spisil te machʼatik sjokinejat ta barko”. Jaʼ yuʼun, ¡ayukme yip awoʼtanik! Maba ya xlajotik».

Te kʼalal kʼaxemix 14 kʼajkʼal-a te la yil swokolik ta skaj te tulan yikʼal jaʼale, la staik ta ilel stiʼil te mar. Jaʼ te isla yuʼun Malta. Kajtsʼaj jilel te barko sok jin spisil, pero te 276 ta tul te ayik ta barko-ae kʼotik ta stiʼil te mar. Ay machʼatik nuxik lokʼel sok ay yantik te la skoltay sbaik lokʼel ta xejtʼelul te barkoe. Kanantayotik yuʼun te ants winiketik ta Malta sok la spasik kʼajkʼ yuʼun ya skʼixnay sbaik te machʼatik kʼotik tey-ae.

Oxeb u ta patil, te soldadoetik la yikʼik bael te Pablo ta yan barko ta Roma. Te hermanoetik ta Roma bajtʼ staik tal te Pablo te kʼalal kʼote. Kʼalal jich la yil te Pablo la yalbey wokol Dios yuʼun sok la yichʼ yip yoʼtan yuʼun. Manchukme chukul-a te Pablo, la yichʼ akʼel ta jun na te yichʼoj majanel sok kanantaybil yuʼun jtul soldado. Tey ayin cheb jaʼbil-a. Ya xkʼot ta ilel yuʼun te ants winiketike, jich te Pablo ya scholtiklanbey yaʼiy ta swenta te Wentainel yuʼun te Diose sok ya snojpteslan ta swenta te Jesús. Jaʼnix jich te Pablo la stsʼibay kartaetik ta stojol te kongregasionetik yuʼun Asia Menor sok te Judea. Jamal chikan ta ilel te tuuntesot yuʼun Jehová te Pablo ta scholel te lek yachʼil kʼop yuʼun te Dios ta spisil nasionetik.