KAPITULO 102
Te najalsitiletik yuʼun te Juan
Te kʼalal chukul te jpuk-kʼop Juan ta isla yuʼun Patmos, te Jesús la yakʼbey yil 16 najalsitil o lokʼombaetik ta swenta te bin ya xkʼot ta pasel ta pajel chaʼbej. Te najalsitiletik-abi, te Juan la yil te bin-utʼil ya yichʼ chʼultesbeyel sbiil te Jehová, te bitʼil ya xtal te Wentainel yuʼun sok te bin-utʼil ya xkʼot ta pasel te skʼanojel yoʼtan liʼ ta Balumilal jich bitʼil ta chʼulchan.
Ta jun najalsitil, te Juan la yilbey yutsilal te Jehová ta smukʼul juktajib ta chʼulchan. Ta sjoyobal te juktajibal ay 24 ancianoetik. Slapojik sakil kʼuʼul sok ay scoronaik te pasbil ta oro. Ta juktajibal ya xlokʼ tal xojobil tsantsewal sok bayal kʼop jich bitʼil chawuk. Te 24 ancianoetik ya snijan sbaik ta stojol te Jehová sok ya yichʼik ta mukʼ. Ta yan najalsitil, te Juan la yil ipal ants winiketik o bayal ta tul ants winiketik te ya yichʼik ta mukʼ te Jehová te talemik ta yanyantik nasion, lumetik sok yanyantik skʼopik. Te Jkolel Tuminchij, jaʼ te Jesuse, jaʼ te machʼa ya xkanantayotik yuʼun sok ya xtojobtesotik bael ta jaʼ yuʼun kuxlejalil. Ta patil, la yil yan najalsitil, te Jesús och ta mantalteswanej jich bitʼil ajwalil ta chʼulchan sok te 24 ta tul ancianoetik. Ta yan najalsitil, te Juan la sta ta ilel te Jesús te yak ta guerra sok te Dragón, jaʼ te Satanás soknix te chopol espirituetik yuʼune. La slokʼeslan ta chʼulchan sok la schʼojtiklan koel tal ta Balumilal.
Ta patil, te Juan la yil jun tʼujbil najalsitil ta swenta te Jkolel Tuminchij sok te 144,000 ta tul te tekʼajtik ta wits Sión. Jaʼnix jich la yil jtul chʼul-abat te yak ta wilel ta swolol Balumilal sok yak ta yalel: “Ichʼaik ta mukʼ te Dios sok albeyaik yutsilal”.
Ta yan najalsitil, la yil te guerra yuʼun Armagedón. Ta guerra-abi, te Jesús sok te machʼatik ya xjokinot yuʼune ya slajinik te chopol balumilal yuʼun te Satanase. Ta slajibal te najalsitile, te Juan la yil te ayix lamalkʼinal ta chʼulchan sok ta Balumilal. Jaʼnix jich la yil te ya yichʼ lajinel te Satanás sok te stsʼumbal o te machʼatik ya xtʼunot yuʼune. Ta chʼulchan sok ta Balumilal ya schʼultesbeyik sbiil te Jehová sok jaʼnax stukel ya yichʼik ta mukʼ.
«Ya cacʼ te contra yac awil aba soc te antse, soc te atsʼumbal contra ya yil sba soc te stsʼumbale; ha ya yehchentesbat ajol, yan te haʼate yit nax yoc yac awehchentesbe stuquel» (Génesis 3:15).
Yaniwan amulan-euk sk'oponel ini
JOJKʼOYELETIK TA SWENTA TE BIBLIA
¿Bin-a te Armagedón?
Te kʼopil Armagedón jun-nax buelta ya xchiknaj ta Biblia, pero ta spajkal te Biblia ya yalbey skʼoplal te guerra-abi.
