Te Timoteo jaʼ jtul jchʼiel hermano-a te ay ta kongregasion yuʼun Listra. Te state griego-winik, yan te smeʼe judía-ants. Te smeʼe Eunice sbiil, te schuchuʼe Loida sbiil. Ta schebalik la snojptesik te Timoteo ta yalalilto ta swenta te Jehovae.

Kʼalal te Pablo bajtʼ yulaʼtay te Listra ta schebal buelta ta scholel skʼop Dios, tey la yil-a te Timoteo te yuʼun-nix kʼux ta yoʼtan-a te yermanotak sok te spisil-ora ya skoltaylane. Jaʼ yuʼun te Pablo la yikʼ bael te Timoteo swenta ya xjokinot yuʼun te banti ya xbajtʼ ta scholel te skʼop Diose. Ta patil bael, te Pablo la spʼijubtes te Timoteo swenta ya xkʼot ta lekil jpʼijubteswanej sok ta lekil jcholkʼop yuʼun te lek yachʼil kʼop yuʼun te Diose.

Te Pablo sok te Timoteo la yichʼik tojobtesel yuʼun te chʼul espiritu chikan te banti bajtʼike. Ta jun ajkʼabal, te Pablo la yil jun najalsitil. La yil jtul winik te albot yuʼun te akʼa bajtʼukik ta Macedonia yuʼun ya skoltay te ants winiketike. Jich yuʼun te Pablo, Timoteo, Silas sok te Lucas bajtʼik ta scholel skʼop Dios tey-a sok la sjachik jilel yachʼil kongregasionetik.

Te lum Macedonia yuʼun Tesalónica bayal ta tul winiketik sok antsetik ochik ta jnopojel yuʼun Cristo. Pero ay chaʼoxtul judioetik te ay sbikʼtal yoʼtanik ta stojol te Pablo sok te sjoʼtake. La stsobik bayal chopol ants winiketik sok la sjochik bael te hermanoetik ta stojol te mukʼul ajwaliletik yuʼun te lume. Jich la yalik ta aw te judioetik: “¡Te winiketik ini yakik ta skontrainel te ajwalil yuʼun Roma!”. Te Pablo sok te Timoteo kʼan yichʼik milel, jaʼ yuʼun anik bael ta ajkʼabal ta lum Berea.

Te ants winiketik ta Berea la smulanik yaʼiyel te lek yachʼil kʼop yuʼun te Dios, bayal ta tul griegoetik sok judioetik ochik ta jnopojel. Pero ay chaʼoxtul judioetik te ayik ta Tesalónica talik ta sjachel kʼop. Jich yuʼun te Pablo bajtʼ ta Atenas. Te Timoteo sok te Silas jilik ta Berea yuʼun ya yakʼbeyik smukʼul yoʼtan te hermanoetike. Ta patil bael, te Pablo la schaʼtikun bael te Timoteo ta Tesalónica swenta ya skoltaylan te  hermanoetik ta stsʼikel te tulan nutsel tey-ae. Ta patil, te Pablo la stikun bael te Timoteo ta yulaʼtayel sok ta yakʼbeyel yip yoʼtan te yantik kongregasionetike.

Te Pablo jich la yalbey te Timoteo: “Spisil te machʼa ya skʼan ya x-abatin ta stojol te Jehová yame yichʼ nutsel”. Te Timoteo kʼax swokol ta nutsel sok la yichʼ chukel-euk ta swenta te schʼuunel yoʼtane. Pero tseʼelnax yoʼtan la yaʼiy sba, melel jich juʼ yuʼun yakʼel ta ilel te jun yoʼtan ta stojol te Jehovae.

Te Pablo jich la yaltiklanbey te machʼatik ayik ta Filipos: “Ya jtikunbeyex tal te Timoteo. Jaʼme ya yakʼbeyex anopik bin-utʼil ya xbeenex ta sbelal te smelelil kʼop sok bin-utʼil ya acholik te skʼop Diose”. Te Pablo la yakʼ smukʼul yoʼtan ta stojol te Timoteo. Bayal jaʼbil la sjokin sbaik ta abatinel ta stojol Dios sok la yamigoin sbaik ta lek.