Te Jehová jich jamal yaloj: “Maʼyukix okʼel, te bin kʼux, chamel sok lajel. Yame jkustiklanbey yaʼlel te asitike. Maba ya xjulix ta awoʼtanik te wokolil te ay ta nailal-ae”.

Te Jehová la yakʼ ta tsʼumbil kʼinal Edén te Adán sok te Eva swenta tseʼel yoʼtanik sok lamalkʼinal ya xkuxinik. La skʼan yichʼik ta mukʼ te sTatik te ay ta chʼulchan sok te ya sta bayal yal snichʼnabik swenta ya snojesik te Balumilale. Te Adán sok te Eva la skʼaxuntaybeyik smantal te Jehová, pero te skʼanojel yoʼtan te Jehovae, maba jelonem. Ta Libro ini la jnoptikix te spisil ya xkʼot ta pasel yuʼun Jehová te bin jamal ya yale. Te Wentainel yuʼune yame yichʼ tal bayal lekil bendisionetik ta swolol Balumilal, jichme ya xkʼot ta pasel te bin jamal la yalbey te Abrahame.

Nopolme ya yichʼ lajinel te Satanás, te chopol espirituetik yuʼune sok te chopol ants winiketike. Spisil te ants winiketik ta Balumilal yame yichʼik ta mukʼ te Jehová. Maba ya stsakotikix chamel, maʼyuk machʼa ya xlajix, te bin kʼax leke, jaʼ te aynanix kiptik ya kaʼiy jbatik-a te kʼalal ya  xjajchotik ta jujun kʼajkʼale sok te tseʼel koʼtantik yuʼun te kuxulotike. Yame xpastaj ta nichimal kʼinal te Balumilale. Jpisiltik yame x-ayin bujtsʼan weʼelil kuʼuntik sok lekil naetik. Maba ya x-ayinix chopol ants winiketik, spisil lek yoʼtanik. Te jtiʼawal chambalametike maba ya xiʼotikix, jaʼnix jich te joʼotike, maba ya jxiʼtikix-euk.

Yame yakʼbotik bayal stseʼelil koʼtantik te kʼalal ya schaʼkuxajtes Jehová te machʼatik lajemikixe. Yame jpatbeytik yoʼtan te ants winiketik te ya xchaʼkuxajik tal te kuxinik ta namey kʼinale, jich bitʼil te Abel, Noé, Abraham, Sara, Moisés, Rut, Ester sok te David. Yame skoltayotik ta spasel ta nichimal kʼinal te Balumilale. Spisilme-ora bayal bintik tʼujbil ya xbajtʼ jpastik.

Te Jehová ya skʼan te ya xkuxinat ta Nichimal Kʼinal. Bayalme te bintik ya jnoptik ta stojol te Dios te maʼyuk jich jnopojtik-ae. Jich yuʼun, ¡noptsajukotikxan ta stojol Jehová ta jujun kʼajkʼal ta ora ini soknix ta sbajtʼelkʼinal!