Ta jun kʼajkʼal, kʼalal stukel ay-a te Eva, kʼoponot yuʼun jkojt chan. Jich la sjojkʼoy te chane: “¿Melelbal te ma xyakʼ Dios te ya aloʼbeyik sit spisil te teʼetike?”. Te Eva jich la sutbey: “Ya xjuʼ ya jloʼtik spisil, jaʼnax ay jpejt sit teʼ te ma xjuʼ ya jloʼtike. Melel teme jich ya jpastik ya xlajotik yuʼun”. Te chan jich la yal: “Ma xlajex. Teme ya aloʼbeyik te site, pajal ya xkʼoex sok Dios”. ¿Melelbal-abi? Maʼuk. Lotil, pero te Eva la schʼuun. Te bitʼil maba la skom sba ta yilel te sit teʼe, bikʼtaj yoʼtan yuʼun jich la sloʼ. Ta patil la yakʼbey-euk te Adán. Te Adán snaʼoj te ya xlajik teme ya skʼaxuntaybeyik skʼop te Diose, pero la sloʼ.

Ta patil, ta kʼajkʼal-abi, te Jehová la skʼopon te Adán sok te Eva. La sjojkʼoylanbey bin yuʼun la skʼaxuntaybeyik te skʼope. Te Eva la yakʼbey smulin te chane, te Adán la yakʼbey smulin te Eva. Jich bitʼil la skʼaxuntayik kʼop te Adán sok te Eva, te Jehová la slokʼeslan ta tsʼumbil kʼinal. Jaʼnix jich, la yakʼ chʼul-abatetik sok jun espada te yak ta tilel ta yochibal te tsʼumbil kʼinal swenta ma xjuʼ ya sujtik ochel.

Te Jehová la yal te jaʼnix jich ya yakʼbey kastigo te machʼa la sloʼlay te Eva. Ta melel manix jaʼuk-a te chan te kʼopoj sok te Evae. Te Jehová maba la spas chanetik te ya xkʼopojike. Jaʼ jtul chʼul-abat te kʼax chopol te la yakʼ kʼopojuk te chane. La snop ta yoʼtan te ya sloʼlay te Evae. Te chʼul-abat-abi Satanás sok Pukuj sbiil. Ta pajel chaʼbej, te Jehová yame slajin te Satanás. Jich maba ya sloʼlayix-a te ants winiketik ta spasel te bintik chopole.