Kʼalal kʼax bael te tiempoe, noj ta bayal ants winiketik te Balumilale. Jteb ma spisiluk chopol te ants winiketike. Jaʼnix jich ay chaʼoxtul chʼul-abatetik te la spas sbaik ta chopol. La yijkʼitayik te chʼulchan te banti ayik-ae sok koik tal ta Balumilal. ¿Yabal anaʼ bin yuʼun te jich la spasike? Swenta ya skʼatpʼun sbaik ta winik yuʼun ya xnujpunik sok te antsetike.

Te chʼul-abatetik-abi la sta yal snichʼnabik sok te antsetike. Kʼalal kajik ta chʼiel te yal snichʼnabik la stsak bayal yipik, utsʼinwanik sok la spasik te bin chopol ta stojol te ants winiketik. Te Jehová maba la yakʼ te jich ya xkʼotxan ta pasel-abi. Jich yuʼun la snop te ya yakʼ tal jun pulemal ta slajinel te machʼatik chopolike, la yakʼ tal tulan jaʼal te la snojes swolol te Balumilale.

Pero ay jtul winik te kʼux ta yoʼtan te Jehová. Noé te sbiile. Ay yinam sok ay oxtul snichʼnab te jaʼik te Sem, Cam sok Jafet te sbiilike. Te snichʼnabe ay yinamik. Te Jehová la yalbey te Noé te akʼa spas jun arka, te jaʼ jun mukʼul kaja te pasbil ta teʼ te ya xlikot moel yuʼun te jaʼe. Jich te Noé sok te sfamilia ya xjuʼ xkolik jilel yuʼun te Pulemale. Jaʼnix jich te Jehová la yalbey te Noé te akʼa yotses bayal chambalametik ta arka, swenta jich ya xkolik jilel-euk.

Ta oranax te Noé kaj spas te arkae. Aʼtejik 50 jaʼbil sok te sfamilia ta spasel te arka sok jich la spasik te bitʼil la yichʼik albeyel yuʼun Jehová. Te jayeb jaʼbil aʼtejike, te Noé la yaltiklanbey te ants winiketik te ya xtal te Pulemal, pero maʼyuk machʼa la schʼuun.

La sta yorail te ochik ta arka. ¿Yabal akʼan ya anaʼ bin kʼot ta pasel ta patil?