Te Noé, te sfamilia sok te chambalametik ochik ta arka. Te Jehová la smakbey te spuertail te arka sok tal te jaʼale. Bayal la yakʼ te jaʼal te jich likot moel yuʼun jaʼ te arkae. Jich kʼunkʼun mukul jilel ta jaʼ spisil te lumkʼinal. Spisil te chopol ants winiketik te maba ochik ta arka lajik. Pero te Noé sok te sfamilia maba lajik, melel ayik ta yutil te arkae. ¿Yabal xkʼot awoʼtan bin yaʼiyel la yaʼiy sbaik ta skaj te la schʼuunbeyik skʼop te Jehová?

La yakʼ tulan jaʼal 40 kʼajkʼal sok 40 ajkʼabal, ta patil kom te jaʼale. Kʼalal kʼax bael te kʼajkʼale, ko snojelal te jaʼe. Ta patil, te arka kajal jilel ta sba jun wits. Jich bitʼil ayto bayal jaʼ ta lumkʼinal, te Noé sok te sfamilia maba ora juʼ lokʼik ta arka.

Kʼax bael te kʼajkʼal, kʼunkʼun ko snojelal te jaʼe. Kʼaxem ta jun jaʼbil ayik ta yutil arka te Noé sok te sfamiliae. Ta patil, te Jehová la yaltiklanbey te ya xjuʼ xlokʼik ta arka. Te kʼalal lokʼike, kʼax tʼujbil la yilik te kʼinale, melel maʼyukix chopol ants winiketik. La yalik bayal wokol, melel la yichʼik koltayel yuʼun te Jehovae, jich yuʼun la spasbeyik jun chikʼbil majtʼanil.

Lek la yil Jehová te chikʼbil majtʼanil-abi sok la yal ta jamal te maʼyukix bin-ora ya slajin te bintik ay ta Balumilal ta pulemal. Swenta ya yakʼbey señail te bin jamal la yale, la yakʼ chiknajuk ta sbabial buelta jun arkoiris ta chʼulchan. ¿Aybal awiloj te arkoiris?

Jaʼnix jich te Jehová la yalbey te Noé sok te sfamilia te ya xjuʼ sta yal snichʼnabik yuʼun ya snojesik te Balumilale.