Te Isaac ayix 40 yaʼbilal-a te kʼalal nujpun sok te Rebeca. Bayal kʼux la yaʼiy ta yoʼtan. Ta patil bael la staik lo-alal keremetik.

Esaú sbiil te ba alale, Jacob sbiil te ijtsʼinale. Te Esaú jaʼ bayal ya smulan beel ta jaʼmaleltik sok ya snaʼ ta lek nutsojel. Pero te Jacob jaʼ ya smulan te ya x-ayin ta na te ya xkoltaywan ta spasel aʼtelil.

Ta skʼajkʼalel-abi, te ba alal jaʼ bayalxan ya yichʼ akʼbeyel skʼinal sok takʼin te bitʼil te yantik kʼalal ya xlaj te tatil yuʼunike. Jaʼ-abi, jaʼ te bintik ay ta swenta yichʼel te ba-alale. Ta sfamilia te Isaac, te bintik ay ta swenta yichʼel, jaʼnix jich smakojbey skʼoplal te bintik jamal yaloj te Jehová ta stojol te Abraham. Te Esaú maʼyuk skʼoplal ta yoʼtan te bintik jamal yaloj te Jehová. Pero te Jacob snaʼoj te kʼax tulanik skʼoplale.

Ta jun buelta, te Esaú kʼax lujben kʼot ta sna ta skaj te sjunal kʼajkʼal la yaʼiy nutsojel. Jich yuʼun, la yaʼiybey yikʼ te weʼelil yak ta spasel te Jacob, jich la yal: “¡Ya xlajonix ta wiʼnal! ¡Akʼbon jtebuk te tsajal weʼelile!”. Te Jacob la yalbey: “Jichuk, pero albon nailuk te ya awakʼbon te bin ay ta awenta yichʼele”. Te Esaú jich la sujtes: “¡Maʼyuk skʼoplal ta koʼtan-abi! Ichʼa jilel. Te bin ya jkʼane jaʼ te ya xweʼone”. ¿Yabal akuy te ay spʼijil yoʼtan te Esaú te kʼalal jich la spase? Maʼuk. Ay bin mukʼ skʼoplal la spʼaj ta skajnax jun plato weʼelil.

 Kʼalal mamalix-a te Isaac, la sta yorail te ya yakʼbey bendision te sba snichʼane. Pero te Rebeca la skoltay te Jacob te jaʼ ijtsʼinale, swenta jaʼ ya x-akʼbot bendision yuʼun te state. Te Esaú la yaʼiy stojol, jich yuʼun bayal ilin sok la schap bin-utʼil ya smil te yijtsʼine. Te Isaac sok te Rebeca la skʼan skoltayik te Jacob, jaʼ yuʼun la yalbeyik: “Baan, jilan sok te atajun Labán, te sbankil te ameʼe, jaʼto te kʼalal ya xlamaj yilinba te Esaú”. Te Jacob la schʼuunbey skʼop te smeʼ stat jich an bael swenta maba ya xmilot yuʼun te sbankile.