Te Lot yak ta nainel sok te stajun Abraham ta lumkʼinal Canaán. Pʼol bayal schambalamik te maʼyukix banti ya yakʼike. Jaʼ yuʼun te Abraham la yalbey te Lot: “Ma xjuʼix te jun ya x-ayinotike. Awokoluk tsaa bin jejch ya akʼan ya xbaat, te joʼone ya xboon ta yan jejch”. ¿Mabal jichuk te kʼax lek yoʼtan te Abrahame?

Te Lot la yil te ay jsejp kʼinal te kʼax tʼujbile, bayal jaʼ sok yaxal jaʼmal tey-a. Jich yuʼun jaʼ la stsa te kʼinal-abi, jich bajtʼ sok te sfamilia ta nainel tey-a, ta stsʼeel te mukʼul lum Sodoma sbiile.

Te ants winiketik ta Sodoma sok ta Gomorra te nopol yiloj sbaike, kʼax chopolik. Kʼax chopolik ta jkʼaxel te jich la slajin Jehová te chaʼpam lume. Pero te Dios la skʼan te ya xkol jilel te Lot sok te sfamiliae, jaʼ yuʼun la stikun chaʼtul chʼul-abatetik te jich la yalik: “¡Ta oranax! ¡Lokʼanik bael ta lum ini! ¡Te Jehová yame slajin!”.

Pero te Lot maba lokʼ ta oranax. Jich yuʼun te chʼul-abatetik la stsaktiklanbey skʼab te Lot, te yinam sok te chaʼtul yantsil snichʼnab, la slokʼeslanik ta oranax ta lum-abi. Jich la yalik te chʼul-abatetike: “¡Ananik lokʼel! ¡Ananik lokʼel swenta ma xlajex sok mame xa asut asitik! Teme jich ya apasik yame xlajex”.

Kʼalal kʼotik ta lum Zoar, te Jehová la yakʼ kouk tal kʼajkʼ sok azufre ta Sodoma soknix ta Gomorra. Te chaʼpam lum-abi la yichʼ lajinel ta jkʼaxel.  Te yinam te Lot la skʼaxuntaybey skʼop te Jehová, la sut sit ta spat jich kʼatpʼuj ta tekʼel balal atsʼam. Pero te Lot sok te yantsil snichʼnab kolik jilel, melel la schʼuunik kʼop. Laniwan smel yoʼtanik yuʼun te ma la schʼuun kʼop te yinam te Lote, pero tseʼel yoʼtanik ta skaj te la schʼuunbeyik skʼop te Jehová.