Te Abraham la snojptes te Isaac ta skʼuxultayel te Jehová sok ta yakʼel smukʼul yoʼtan ta swenta te bintik jamal yaloj ya spase. Pero te kʼalal jteb ma sta 25 yaʼbilal-a te Isaac, te Jehová la skʼanbey te Abraham te ay bin ya spas te kʼax tulan ta pasele. ¿Yabal anaʼ bin-a te la skʼanbey te Abrahame?

Te Dios la yalbey te Abraham: “Awokoluk, ikʼa bael te jip jtul anichʼan ta wits ta skʼinal Moriah swenta ya awakʼ ta chikʼbil majtʼanil”. Te Abraham maba snaʼoj bin yuʼun te jich kʼanbot yuʼun te Jehovae, manchukme jich-abi la schʼuun spasel.

Ta yan kʼajkʼal ta sakubel kʼinal, te Abraham la yikʼ bael te Isaac sok chaʼtul j-abatetik ta skʼinal Moriah. Kʼalal kʼaxemix oxeb kʼajkʼal-ae, la staik ta ilel ta namal te witsetik. Te Abraham la yalbey te j-abatetik yuʼun te ya xbajtʼ sok te Isaac ta yakʼel chikʼbil majtʼanil, jich yuʼun la skʼantiklanbey te ya xmaliwanike. Te Abraham la yichʼ bael te kuchiyo sok jaʼ la yakʼbey bael skuch siʼ te snichʼane. Te Isaac la sjojkʼoybey te state: “¿Banti ay te chambalam te ya kakʼtik ta chikʼbil majtʼanile?”. Te Abraham jich la sutbey: “Jnichʼan, jaʼ ya yakʼbotik te Jehová”.

Kʼalal kʼotik ta wits la spasik te skajtijib te chikʼbil majtʼanil. Ta patil te Abraham la schukbey yok skʼab te Isaac, jich la yakʼ ta skajtijib te chikʼbil majtʼanile.

Te Abraham la stsak te kuchiyo. Ta yorail-abi te chʼul-abat yuʼun Jehová la yal kʼalalto ta chʼulchan: “¡Abraham! ¡Mame ayuk bin ya apasbey te kereme! Jnaʼojix te  ay schʼuunel awoʼtan ta stojol te Diose, melel jun awoʼtan kʼan awakʼ ta chikʼbil majtʼanil te anichʼane”. Jich yuʼun, te Abraham la yil jkojt tuminchij te katsʼal ta chʼixtikil te xulube. Ta oranax la skoltay te Isaac, jaʼ la yakʼ ta chikʼbil majtʼanil te tuminchije, ma jaʼuk te snichʼane.

Teyto-abi, te Jehová la yal te jaʼ yamigo te Abrahame. ¿Yabal anaʼ bin yuʼun? Jaʼ ta skaj te la spas spisil te bin kʼanbot yuʼun te Jehovae, manchukme ma kʼoem ta yoʼtan te bin yuʼun te jich kʼanbote.

Te Jehová la schaʼal te bin jamal yaloj ta stojol te Abraham: “Ya kakʼbat bendision sok mukʼ ya xkʼot te atsʼumbal, ya x-ayin bayal awal anichʼnab”. Jaʼ ya skʼan ya yal te ya yakʼbey bintik lek spisil te lekil ants winiketik ta swenta te sfamilia te Abrahame.