Te José jaʼ ijtsʼinal ta spisil te snichʼnab te Jacob. Te sbankiltak la snaʼik stojol te jaʼ kʼax kʼanbil yuʼun statik te Josee. ¿Bin-utʼil ya akuy te la yaʼiy sbaike? Bayal sbikʼtal yoʼtanik ta stojol sok la spʼajik. Ta jun buelta, ay bin chajpnax la swayichin sok la yaltiklanbey te sbankiltake. La skuyik te bitʼil te wayichiletik-abi ya skʼan ya yal te ya xkʼot yorail te ya snijan sbaik ta stojol te José. Jaʼ yuʼun la spʼajikxan ta jkʼaxel.

Ta jun buelta, te sbankiltak te José yakik ta skanantayel tuminchijetik ta nopol lum Siquem. Te Jacob la stikun te José ta yilel te bin-utʼil ayik te yantik skerem snichʼnabe. Kʼalal namalto la yilik te yak ta talel te José, jich kaj yalik: “Yak ta talel te jwayichil winik. ¡Laʼik, jmiltik!”. Jich yuʼun la stsakik la schʼojik ochel ta chʼen. Pero te Judá, te bankilale, jich la yal: “Ma xa amilik. Jaʼ lek te ya jchontik yuʼun ya xkʼot ta mosoil”. Jich la spasik. La schonik bael te José ta 20 ta sejp plata ta stojol jchonbajeletik yuʼun Madián te yakik ta bael ta Egipto.

Ta patil, te sbankiltak la smulik ta schʼichʼel jkojt tentsun te skʼuʼ te José, jich la yichʼbeyik bael ta stojol te statik sok jich la sjojkʼobeyik: “¿Mabal jaʼuk yuʼun te anichʼan te kʼuʼul ini?”. Te Jacob la skuy te la yichʼ milel ta jkojt chambalam te José, jich bayal la smel yoʼtan. Maʼyuk machʼa juʼ yuʼun yakʼbeyel smukʼul yoʼtan.

Kʼalal kʼotik ta Egipto, jtul jwolwanej yuʼun soldado te kʼax mukʼ skʼoplal te Potifar sbiil, la sman te José swenta ya xkʼot ta moso yuʼun. Pero te Jehová sjokinej te José. Te Potifar la yil te bitʼil te José ya spas ta lek te yaʼtel sok te ya xjuʼ ya yakʼ smukʼul yoʼtan ta stojole. Maba kʼax bayal tiempo la swentain spisil te bin ay yuʼun te Potifar.

 Te yinam te Potifar la yil te tʼujbil te José sok te bayal yip sok la skʼanulanbey te yakuk xway soke. ¿Bin la spas te José? La spʼaj sok jich la yalulanbey: “Maʼuk, chopol te jich ya jpase. Te kajwal yakʼoj smukʼul yoʼtan ta jtojol, te jaʼate yinamat. Teme ya jokin jbatik ta wayel, ya jta jmul ta stojol te Diose”.

Ta jun buelta, te yinam te Potifar la suj te José yuʼun ya xway sok. La stsak ta skʼuʼ, pero te José lokʼ ta anel. Kʼalal kʼot ta sna te Potifar, te yinam la spas lot, la yal te utsʼinot yuʼune. Te Potifar bayal ilin yuʼun, la yotses ta karsel. Pero te Jehová maba chʼay te yoʼtan te José.