Kʼalal te faraón la yaʼiy stojol te lokʼemikix bael-a te israeletik ta Egipto, jelon yoʼtan yuʼun te bitʼil la stikunlan lokʼele. La yaltiklanbey ta mantal te soldadoetik yuʼune: “Chajpanaik spisil te karretaetik yuʼun guerra sok ya jnutstik bael. Maba lek te la kakʼtik baele”. Jich yuʼun te faraón sok te swiniktak och snutsik te israeletike.

Te Jehová la skanantay te lum yuʼun, la yakʼ tokal ta kʼajkʼaleltik sok la yakʼ kʼajkʼ ta ajkʼabaltik. La yikʼtiklan bael ta stsʼeel mar Rojo sok la yaltiklanbey te ya xjilik tey-ae.

Ta patil, te israeletik la yilik te yakik ta nutsel yuʼun te faraón sok te soldadoetik yuʼune. Te israeletik ma xjuʼ xlokʼik ta anel ta skaj te mar sok te soldadoetik yuʼun Egipto. Jajchik ta aw sok jich la yalbeyik te Moisés: “¡Yame xlajotik! ¿Bin yuʼun la alokʼesotik tal ta Egipto?”. Pero te Moisés jich la sut: “Ma xiwex. Maliyaik sok ilawilik bin-utʼil ya yakʼ jkoleltik te Jehovae”. ¿Mabal jichuk te bayal smukʼul yoʼtan te Moisés ta stojol te Jehovae?

Ta patil bael, te Jehová la yalbey te israeletik te akʼa sjach te skampamentoik. Ta ajkʼabal-abi, te Jehová la stij te tokal la yakʼ ta olil ta stojol te israeletik sok ta stojol te egipcioetik. Te banti ayik te egipcioetik ayik ta ijkʼal kʼinal, yan te banti ayik te israeletike ayik ta sakal kʼinal stukelik.

 Ta patil, te Jehová la yalbey te Moisés te akʼa stoy moel skʼab ta stojol te mar. Jich-abi tal tulan ikʼ sjunal ajkʼabal. Te mar la sjam sba, jich chiknaj be ta yolil. Te bayal miyon ta tul israeletik beenik kʼaxel ta takin lum ta yolil mar jaʼto kʼalal kʼotik ta yan jejch.

Te soldadoetik yuʼun faraón la snutsik te israeletik te yakik ta kʼaxel ta takin lum ta yolil te mare. Pero te Jehová la yakʼ te ya xchʼay yoʼtanik te maba ya snaʼ te bin ya spasik te egipcioetike. Te syantaul skarretaik kajik ta lokʼel. Jich yuʼun te soldadoetik jajchik ta aw: “¡Lokʼukotik bael liʼ ini! Te Jehová yak ta yakʼel guerra ta swenta te lum yuʼune”.

Te Jehová la yalbey te Moisés: “Toya moel akʼab ta stojol te mar”. Ta oranax la snupʼ sba te mar, jich tal ta stojolik te egipcioetike. Te faraón sok spisil te swiniktak lajik. Maʼyuk machʼa kuxul jil.

Ta yan jejch yuʼun te mar, spisil te ants winiketik la yalbeyik yutsilal te Dios sok jun kʼayojil: “Ya jkʼayojtay te Jehová, melel la yakʼ ta ilel yutsil skʼoplal. Te kawuetik sok te machʼatik kajajtik tey-ae, la schʼojtiklan ochel ta mar”. Kʼalal yakik ta kʼayoj-ae, te antsetik yakik ta ajkʼot sok yakik ta stijel panderetaetik. Tseʼel yoʼtanik ta spisilik, melel libre ayikix ta smelelil.