Te kʼalal ayikto ta Egipto-ae, te ants winiketik te talemik ta stsʼumbal Jacob la sbiilinik israeletik. Te kʼalal lajemikix-a te Jacob sok te José, jajch ta mantalteswanej jtul yachʼil faraón. Te faraón-abi ay ta xiwel, melel te israeletik yak ta stsakel yipik kʼaxemto-a te bitʼil egipcioetike. Jich yuʼun la yakʼtiklan ta mosoil. La sujtiklan ta spasel ladriyoetik sok spasel tulan aʼtel ta lumkʼinal. Manchukme kʼaxemtoxan la yichʼik utsʼinel yuʼun te egipcioetike, te israeletik yakik ta pʼolel ta bayal. Te faraón ma la smulan-abi jich yuʼun la stikun ta milel spisil te unin alal keremetik, pero ma la yichʼik milel stukelik te tut achʼixetike. ¿Yabal xkʼot ta awoʼtan te xiwel la yaʼiyik te israeletike?

Jtul israel-ants te Jocabed sbiil ayin jtul yal te kʼax tʼujbile. Swenta ya skoltaybey skuxlejal la yakʼ ta jun moch sok la snakʼ ta yolil jalaliltik ta stsʼeel mukʼul jaʼ Nilo. Te María (Míriam) swix te alale, jil ta stsʼeel swenta ya yil te bin yak ta kʼoel ta pasele.

Te yantsil nichʼan te faraón bajtʼ ta atimal jich la yil te moche. Ta yutil la yil jtul alal te yak ta  okʼel sok la snaʼbey yoʼbolil sba. Te María la sjojkʼoybey: “¿Yabal akʼan ya kikʼ tal jtul ants yuʼun ya schʼitesbat te alale?”. La yal te yake, jich te María jaʼ bajtʼ yikʼ tal te smeʼ. Te yantsil nichʼan te faraón la yalbey te Jocabed: “Ikʼa bael te alale, kanantaybon-a sok ya jtojat”.

Kʼalal mukʼub te alale, te Jocabed la yikʼ bael ta stojol te yantsil nichʼan te faraón. La sbiilintes Moisés sok la schʼites jich bitʼil yal. Te Moisés chʼi jich bitʼil snichʼan ajwalil sok ya xjuʼ ya sta spisil te bin ya skʼane. Pero maʼyuk bin-ora chʼay ta yoʼtan te Jehovae. Te Moisés snaʼoj te jaʼ israel-winik, te ma jaʼuk egipcio-winik sok jaʼ la stsa yichʼel ta mukʼ te Jehovae.

Te kʼalal ayix 40 yaʼbilal-a te Moisese, la snop te ya skoltay te slumale. Ta jun buelta, la yil jtul egipcio-winik te yak ta smajel jtul israel-winik te mosoinbile. Te kʼalal jich la yile, te Moisés kʼax tulan la smaj, jich la smil sok la smuk jilel ta jiʼileltik. Kʼalal la snaʼ stojol te faraón, la skʼan smil te Moisés, pero te Moisés lokʼ bael ta anel, bajtʼ ta lum Madián. Tey la yichʼ kanantayel yuʼun-a te Jehovae.