Te Moisés nain 40 jaʼbil ta lum Madián. Ta yorail-abi nujpun sok ayin snichʼnab. Ta jun kʼajkʼal yak ta skanantayel stuminchij ta nopol wits Sinaí sok ay bin chajpnax la yil tey-a. Jpejt chʼix yak ta tilel, ¡pero maba yak ta kʼajkʼel! Te kʼalal noptsaj bael te Moisés ta yilel te bin yak ta kʼoel ta pasele, la yaʼiy stojol te ay machʼa yak ta kʼop ta yolil te jpejt chʼixe. Jich albot yuʼun: “¡Moisés! Mame xnoptsajatxan tal. Lokʼesa te axanabe, melel chʼultesbil te banti tekʼelate”. Jaʼ te Jehová te la stuuntes jtul chʼul-abat swenta ya skʼopon te Moisés.

Te Moisés bayal xiw yuʼun, la smak sit yelaw. Jich cholbot yaʼiy: “La kilix te yak ta kʼaxel bayal swokol te israeletike. Ya jkoltay lokʼel ta stojol te egipcioetik sok ya kikʼtiklan bael ta jun lekil kʼinal. Sok ya jkʼan te jaʼat ya alokʼes tal te lum kuʼun ta Egipto”. ¿Binwan yaʼiyel la yaʼiy sba te Moisese?

Te Moisés la sjojkʼoybey: “¿Bin ya kal te kʼalal ya skʼan ya snaʼik stojol te machʼa la stikunone?”. Te Dios jich la sutbey: “Ya awaltiklanbey te bitʼil jaʼ la stikunat te Jehová te Dios yuʼun Abraham, te Dios yuʼun Isaac sok te Dios yuʼun Jacob”. Te Moisés la yal: “¿Jaxan teme ma schʼuunbon jkʼop te lume?”. Te Jehová la yakʼbey yil jun señail te yananix skoltay-ae. La yalbey te yakuk schʼoj ta lum te snabateʼ, kʼalal jich la spase, ¡kʼatpʼuj ta chan! Ta patil, te Moisés la stsak ta sne te chane, jich chaʼkʼatpʼuj ta nabateʼ. Te Jehová la scholbey: “Te kʼalal ya apas te milagro ini, ya awakʼ ta naʼel-a te joʼon jtikunejate”.

Pero te Moisés la yal: “Wokol ya xlokʼ jkʼop ta stojol te ants winiketike”. Te Jehová jamal la yalbey: “Joʼon ya kalbat te bin ya awal, ya jtikunat sok te abankil Aarón yuʼun ya skoltayat ta kʼop”. Jich bitʼil la snaʼix te Moisés te ya xkoltayot yuʼun te Jehová, sujt bael ta Egipto sok la yikʼ bael te yinam soknix te snichʼnabe.