Kʼalal ayto ta karsel-a te José, te faraón, te ajwalil yuʼun Egipto, ay bintik la swayichin te maʼyuk machʼa ya xkʼot ta yoʼtan te bin swentaile. Jich yuʼun jtul j-abat yuʼun te faraón la yal te bitʼil te José ya xjuʼ yuʼun yalbeyel swentail te wayichile. Jich te faraón la stikun ta ikʼel ta oranax te José.

Te faraón jich la sjojkʼoybey te José: “¿Yabal xjuʼ ya awalbon bin swentail te bintik la jwayichine?”. Te José jich la sutbey: “Ta Egipto jukeb jaʼbil ya yakʼ bayal weʼelil, ta patil yame xtal wiʼnal jukeb jaʼbil. Tsaa jtul pʼijil winik swenta ya stsob weʼelil jich maba ya xlajik ta wiʼnal-a te ants winiketik”. Te faraón jich la yalbey: “¡Jaʼat ya kakʼbat awentain spisil! Jaʼat schebal ajwalil ya xkʼoat sok bayal yip te mantaltesel awuʼun ta Egipto”. Pero, ¿bin yuʼun te José la snaʼbey swentail te wayichiletik yuʼun te faraone? Melel jaʼ koltayot yuʼun te Jehovae.

Te José jukeb jaʼbil la stsob bayal weʼelil. Ta patil, tal wiʼnal ta spisil te lumkʼinal, jich bitʼil la yalbey skʼoplale, ta bayuknax talik te ants winiketik ta smanel weʼelil. Te Jacob te jaʼ stat te José, la yaʼiy stojol te ay weʼelil ta Egipto, jich yuʼun la stikun bael 10 ta tul snichʼnab ta smanel weʼelil.

Te snichʼnab te Jacob bajtʼ yilik te José, la yichʼ naʼbeyel sbaik ta ora yuʼun. Pero te sbankiltak maba la snaʼbeyik sba te José. La snijan sbaik ta stojol jich bitʼil la swayichin te kʼalal jchʼielto-ae. Te José la skʼan snaʼ stojol teme chopolto yoʼtanik ta stojole, jich yuʼun la yaltiklanbey: “Te jaʼexe jtsajtaywanejex te talex ta yilel te banti maba kanantaybil ta lek te kʼinale”. Jich la sutik: “¡Maʼuk, ma jichuk te bitʼil ya awale! Talemotik ta  Canaán, 12 ta tul alnichʼanotik-a, jtul lajemix yan te ijtsʼinal sjokinej jilel te jtatkotike”. Te José jich la yaltiklanbey: “Ikʼbonik tal te awijtsʼinike, jich ya jchʼuunbeyex te akʼopike”. Jich chaʼsujtik bael ta sna te statike.

Te sfamilia te Jacob chaʼlaj te sweʼelike, jich yuʼun la schaʼtikun bael te snichʼnab ta Egipto. La yikʼikix bael-a te Benjamín te ijtsʼinale. Swenta ya spas ta prueba te sbankiltak, te José la yotses te skopa te pasbil ta plata ta skostal yuʼun weʼelil te Benjamín sok la yal te jaʼ la yelkʼane. Kʼalal te j-abatetik yuʼun te José la staik te kopa ta skostal te Benjamín, te sbankiltak chamnax yoʼtanik yuʼun. La skʼanbeyik te José te jaʼuk ya yichʼik kastigo, te ma jaʼuk ya yichʼ kastigo te Benjamine.

Jich te José la yil te jelonemix stalelik te sbankiltake. Te José ma juʼix yuʼun, kaj ta okʼel sok jich la yal: “Joʼon te José, te awijtsʼinonike. ¿Kuxultobal te jtate?”. Te sbankiltak chamnax yoʼtanik yuʼun. Te José la yaltiklanbey: “Ma xamel awoʼtanik yuʼun te bin la apasbonike. Te Dios la yikʼon tal liʼ ini ta swenta skoltayel akuxlejalik. Pero, ikʼbonik tal ta oranax te jtate”.

Te sbankiltak te José sujtik bael ta snaik ta scholbeyel yaʼiy te statik te bintik lek kʼot ta pasel sok la yikʼik tal ta Egipto. Te bitʼil bayal jaʼbil kʼaxemixe, te José la schaʼil sba sok te stat, jich jun-nax ayinik ta yan buelta.